ប្រទេសថៃ ៖ អ្នកផ្តល់ប្រឹក្សាពាណិជ្ជកម្មរបស់ថៃ មកពី៥៨កន្លែងនៃប្រទេសចំនួន៤៤ បានមើលឃើញពីកំណើននាំចេញអវិជ្ជមានរបស់ថៃនៅឆ្នាំនេះ ដោយសារតែកត្តាខាងក្រៅមិនអាចគ្រប់គ្រងបានដូចជា ការធ្លាក់ចុះនៃកំណើនសេដ្ឋកិច្ចនៅក្នុងទីផ្សារកំពុងរីកចម្រើនជាច្រើន ហើយអាជីវកម្មថៃមួយចំនួនដែលបានវិនិយោគនៅក្នុងប្រតិបត្តិការផលិតកម្មក្រៅប្រទេស គឺមានតម្លៃនាំចេញទាប ។
បើទោះបីជាមានកត្តាអវិជ្ជមានជាច្រើនប៉ះពាល់ដល់ការនាំចេញក្តី ក៏ក្រសួងពាណិជ្ជកម្មថៃ បានព្យាករថា ការនាំចេញនឹងមានភាពវិជ្ជមាននៅឆ្នាំក្រោយ ។ ទន្ទឹមនឹងនេះ ក្រសួងនឹងលើកទឹកចិត្តដល់ក្រុមមន្ត្រីពាណិជ្ជកម្ម ដើម្បីជំរុញកំណើននៃការនាំចេញ នៅក្រោមយុទ្ធសាស្ត្រវិនិយោគខាងក្រៅថ្មីរបស់រដ្ឋាភិបាល និងលើកកម្ពស់យុទ្ធសាស្ត្រនៃការនាំចេញ ។
លោកស្រី Malee Choklumlerd ប្រធាននាយកដ្ឋានផ្សព្វផ្សាយពាណិជ្ជកម្មអន្តរជាតិ បានថ្លែងថា ទោះបីជាមានទស្សនវិស័យអាប់អួសម្រាប់ការនាំចេញក្នុងឆ្នាំនេះក្តី រដ្ឋាភិបាលនឹងធ្វើការយ៉ាងជិតស្និទ្ធជាមួយអ្នកនាំចេញ និងមន្ត្រីពាណិជ្ជកម្ម ដើម្បីពង្រីកខ្លួនចូលទៅក្នុងទីផ្សារបរទេសឲ្យកាន់តែខ្លាំង ។ លោកស្រីបន្តថា ៖ « យើងនឹងមិនជំរុញការនាំចេញទំនិញតែម្យ៉ាងនោះទេ តែយើងនឹងជំរុញទាំងពាណិជ្ជកម្ម សេវាកម្ម និងការវិនិយោគផងដែរ ដើម្បីបង្កើតប្រាក់ចំណូលប្រកបដោយនិរន្តរភាព » ។
ការនាំចេញទៅកាន់តំបន់អាស៊ាន ត្រូវបានគេរំពឹងថា នឹងធ្លាក់ចុះ០,៨% ពីកំណើន៧,៤% កាលពីឆ្នាំមុន ។ ចំណែកកំណើននៃការនាំចេញទៅសហរដ្ឋអាមេរិក ធ្លាក់ចុះពី៥% ទៅ១%។ ការនាំចេញទៅសហភាពអឺរ៉ុបបានធ្លាក់ចុះពី១%ដល់ចន្លោះពី០%-១% ខណៈការលក់ទៅកាន់ប្រទេសជប៉ុន បានកើនឡើង១%នៅក្នុងឆ្នាំ២០១៥ អាចនឹងនៅថេរក្នុងឆ្នាំនេះ ។
មន្ត្រីក្រសួងពាណិជ្ជកម្ម លោកស្រី Apiradi Tantraporn បាននិយាយថា ក្រុមមន្ត្រីពាណិជ្ជកម្ម និងសហគ្រាសឯកជន នឹងដាក់ចេញនូវគោលដៅនាំចេញសម្រាប់ឆ្នាំក្រោយនៅថ្ងៃសុក្រនេះ ។
ស្ថិតក្រោមផែនការលើកកម្ពស់ការនាំចេញថ្មី ក្រសួងនឹងផ្តោតលើការនាំចេញនៃផ្នែកសេវាកម្ម និងទំនិញនៅក្នុងទីផ្សារ ដូចជា ក្រុមមនុស្សវ័យចំណាស់ អ្នកស្រឡាញ់សត្វចិញ្ចឹម គ្រឿងបរិភោគហាឡាល់ ក្រុមអ្នកមាន និងការធ្វើពាណិជ្ជកម្មអនឡាញ ។ ការនាំចេញទៅក្រៅប្រទេស នឹងត្រូវបានផ្សព្វផ្សាយដោយអនុលោមតាមគោលនយោបាយរបស់ថៃ ដោយសង្កត់ធ្ងន់លើតម្លៃបន្ថែម ផលិតផលច្នៃប្រឌិតថ្មី និងសេវាកម្ម ។
លោក Ponpimon Petcharakul អ្នកផ្តល់ប្រឹក្សាពាណិជ្ជកម្មថៃ ប្រចាំទីក្រុងហាណូយ ដែលតំណាងឱ្យទីផ្សារអាស៊ាន បានឱ្យដឹងថា ការនាំចេញរបស់ថៃទៅកាន់តំបន់អាស៊ាន បានប្រឈមមុខនឹងការធ្លាក់ចុះពីមួយឆ្នាំទៅមួយឆ្នាំ ចំនួន០,៨% ស្មើនឹង៥៤,៧ប៊ីលានដុល្លារនៅឆ្នាំ២០១៦ ខណៈដែលក្រុមប្រទេសប្រចាំតំបន់នេះពឹងផ្អែកលើផលិតកម្ម ភាគច្រើនក៏ជួបប្រទះនឹងកំណើនសេដ្ឋកិច្ចធ្លាក់ចុះដូចគ្នា ។
ទោះជាយ៉ាងណា នៅឆ្នាំក្រោយ ការនាំចេញទៅកាន់តំបន់អាស៊ាន ត្រូវបានគេព្យាករថា នឹងវិលត្រឡប់ទៅរកភាពវិជ្ជមានវិញ និងកើនឡើង២,៥% ស្មើនឹង៥៦,០៥ប៊ីលានដុល្លារ ។
លោក Napadol Thongmee កុងស៊ុលពាណិជ្ជកម្មថៃ ប្រចាំក្រុងញូវយ៉ក បានឱ្យដឹងថា កំណើននាំចេញទៅកាន់សហរដ្ឋអាមេរិក នឹងធ្លាក់ចុះ៥%កាលពីឆ្នាំមុន ដល់១%នៅឆ្នាំនេះ ផ្ទុយគ្នាទៅនឹងការងើបឡើងវិញនៃសេដ្ឋកិច្ចអាមេរិក និងការបោះឆ្នោតប្រធានាធិបតីនាពេលខាងមុខ ដោយសារតែប្រជាជនមានទំនុកចិត្តតិចលើការចំណាយ ។
លោក Supawadee Yamgamol អ្នកផ្តល់ប្រឹក្សាពាណិជ្ជកម្មថៃ ប្រចាំទីក្រុងឡុងដ៍ ឱ្យដឹងថា ការនាំចេញរបស់ថៃទៅកាន់សហភាពអឺរ៉ុប គួរតែកើនឡើង១%នៅឆ្នាំនេះ ឬស្មើនឹង២២,១៦ប៊ីលានដុល្លារ ផ្ទុយនឹងការធ្លាក់ចុះ២,៤%កាលពីឆ្នាំមុន ដោយសារការបោះឆ្នោត Brexit ធ្វើឲ្យលុយផោនធ្លាក់ថ្លៃ និងបណ្តាលឲ្យទំនិញ និងសេវាកម្មរបស់ថៃមានតម្លៃខ្ពស់ក្នុងតំបន់នោះ ៕
ចែករំលែកព័តមាននេះ