សម្រាប់បុណ្យចូលឆ្នាំថ្មីប្រពៃណីជាតិ ឆ្នាំខាល ចត្វាស័ក ពុទ្ធសករាជ២៥៦៦ គ្រិស្តសករាជ ២០២២នេះ រដ្ឋបាលរាជធានីភ្នំពេញ កំពុងមមាញឹកតុបតែងលំអទីសាធារណៈ រមណីយដ្ឋាន និងសួនច្បារនានា ព្រមទាំង
រាជធានីភ្នំពេញ ៖ សម្រាប់បុណ្យចូលឆ្នាំថ្មីប្រពៃណីជាតិ ឆ្នាំខាល ចត្វាស័ក ពុទ្ធសករាជ២៥៦៦ គ្រិស្តសករាជ ២០២២នេះ រដ្ឋបាលរាជធានីភ្នំពេញ កំពុងមមាញឹកតុបតែងលំអទីសាធារណៈ រមណីយដ្ឋាន និងសួនច្បារនានា ព្រមទាំងដាក់ពង្រាយបង្គន់អនាម័យចល័តចំនួន៣០បង្គន់ ដើម្បីបង្កលក្ខណៈងាយស្រួលដល់អ្នកមកដើរលេងកម្សាន្តនៅតាមកន្លែងកម្សាន្តនានា នៅក្នុងរាជធានីភ្នំពេញ ។
លោក ស៊ូ សាវ៉ន ប្រធានអង្គភាពសួនច្បារនិងរុក្ខជាតិ នៃមន្ទីរសាធារណការនិងដឹកជញ្ជូនរាជធានីភ្នំពេញ បានឲ្យដឹងកាលពីរសៀលថ្ងៃទី៤ ខែមេសា ឆ្នាំ២០២២ថា យោងតាមការណែនាំរបស់ឯកឧត្តម ឃួង ស្រេង អភិបាលរាជធានីភ្នំពេញនៅក្នុងឱកាសបុណ្យចូលឆ្នាំថ្មីប្រពៃណីជាតិឆ្នាំនេះ ជាគម្រោងងរបស់រដ្ឋបាលរាជធានីភ្នំពេញ យើងនឹងដាក់ពង្រាយបង្គន់អនាម័យចល័តចំនួន៣០បង្គន់ ដើម្បីបង្កលក្ខណៈងាយស្រួលដល់អ្នកមកដើរលេងកម្សាន្តនៅកន្លែងកម្សាន្តនានា នៅក្នុងរាជធានីភ្នំពេញ ក្នុងនោះសម្រាប់នៅរមណីយដ្ឋានវត្តភ្នំ យើងដាក់ចំនួន៨បង្គន់ តែបើត្រូវកែប្រែយ៉ាងណានោះ ឯកឧត្តមអភិបាលរាជធានីភ្នំពេញ នឹងធ្វើការណែនាំឲ្យ អនុវត្តនៅក្នុងកិច្ចប្រជុំគណៈបញ្ជាការឯកភាពរាជធានីភ្នំពេញនៅថ្ងៃ៦ ខែមេសា ឆ្នាំ២០២២ ។
លោក សូ៊ សាវ៉ន ថ្លែងទៀតថា ក្រៅពីការងារខាងលើ អង្គភាពសួនច្បារនិងរុក្ខជាតិនៃមន្ទីរសាធារណការនិងដឹកជញ្ជូនរាជធានីភ្នំពេញ ក៏នៅមានការងារមួយចំនួនទៀតដែលត្រូវអនុវត្តផងដែរដូចជា ការងារកាត់លះមែកឈើនៅតាមដងផ្លូវ និងការកាត់ស្មៅនៅតាមសួនច្បារនានា ។
ចំណែកលោក ម៉ែន សុខខេន ប្រធានអង្គភាពលូទឹក បូមទឹករាជធានីភ្នំពេញ ឱ្យដឹងដែរថា អង្គភាពមានគម្រោងបាញ់ទឹកលាងថ្នល់ លាបកំបោរសតាមគល់ឈើជាដើម បាញ់ស្ពេត្រូតាមប៊័រឌៀរចិញ្ចើមផ្លូវ សួនច្បារ រមណីយដ្ឋាននានាធ្វើយ៉ាងណាលើកកម្ពស់សោភ័ណភាពរាជធានីភ្នំពេញឲ្យកាន់តែស្រស់ស្អាតឡើង ។
មន្ត្រីរដ្ឋបាលរាជរាជធានីភ្នំពេញ បានឲ្យដឹងដែរថា សម្រាប់បុណ្យចូលឆ្នាំថ្មីប្រពៃណីជាតិ ឆ្នាំខាលនេះដែរ ខាងអង្គភាពអគ្គិសនីនិងបំភ្លឺសាធារណៈ នៃមន្ទីរសាធារណការនិងដឹកជញ្ជូនរាជរាជធានីភ្នំពេញ ជាអ្នកទទួលចាត់ចែងលើការតុបតែងភ្លើងបំភ្លឺសាធារណៈនៅតាមតាមដើមឈើ និងសួនច្បារ នៅទូទាំងរាជធានីភ្នំពេញ ។
ចំណែកមន្ទីរវប្បធម៌និងវិចិត្រសិល្បៈរាជធានីភ្នំពេញ ជាអ្នកទទួលខុសត្រូវលើការរៀបចំកម្មវិធីសម្តែងសិល្បៈបុរាណនិងសម័យ ជូនប្រជាពលរដ្ឋទស្សនាកម្សាន្តនៅតាមទីសាធារណៈនានាក្នុងរាជធានីភ្នំពេញ ជាពិសេសនៅរមណីយ
ដ្ឋានវប្បធម៌ប្រវត្តិសាស្ត្រវត្តភ្នំ ។
បំផុសចលនាប្រជាពលរដ្ឋចូលរួមឱ្យបានផុលផុស ក្នុងការលេងល្បែងប្រជាប្រិយរបស់ជាតិដូចជា ចោលឈូង បោះអង្គញ់ ទាញព្រ័ត្រ ទាត់សី លាក់កន្សែង ឡើងសសរខ្លាញ់ លោតបាវ វាយឆ្នាំងជាដើម ប៉ុន្តែត្រូវអនុវត្តវិធានការសុខាភិបាល និងវិធានការ«៣ការពារ និង៣កុំ» របស់សម្តេចតេជោនាយករដ្ឋមន្ត្រីឱ្យបានខ្ជាប់ខ្ជួន ដើម្បីទប់ស្កាត់ការចម្លងនៃជំងឺកូវីដ-១៩ ជាពិសេសមេរោគបំប្លែងខ្លួនថ្មី ប្រភេទ «អូមីក្រុង» ។ ត្រៀមរៀបចំពិធីសូត្រមន្តចម្រើនព្រះបរិត្ត និងពិធីទទួលទេវតាឆ្នាំថ្មី នៅរមណីយដ្ឋានវប្បធម៌ប្រវត្តិសាស្ត្រវត្តភ្នំ ៕
ចែករំលែកព័តមាននេះ