ឃាត់ខ្លួនជនសង្ស័យជួញដូរ និងប្រើប្រាស់គ្រឿងញៀ.ន១៣នាក់
ខេត្តបន្ទាយមានជ័យ ៖ កងកម្លាំងកងរាជអាវុធហត្ថខេត្តបន្ទាយមានជ័យ បានសហការជាមួយកម្លាំងមូលដ្ឋានកងរាជអាវុធ ស្រុកមង្គលបូរី និងក្រុងសិរីសោភ័ណ បានចុះប្រតិបត្តិការបង្ក្រាបជនសង្ស័យ
ខេត្តបន្ទាយមានជ័យ ៖ កងកម្លាំងកងរាជអាវុធហត្ថខេត្តបន្ទាយមានជ័យ បានសហការជាមួយកម្លាំងមូលដ្ឋានកងរាជអាវុធ ស្រុកមង្គលបូរី និងក្រុងសិរីសោភ័ណ បានចុះប្រតិបត្តិការបង្ក្រាបជនសង្ស័យក្នុងករណីជួញដូរ និងប្រើប្រាស់គ្រឿងញៀន រយៈពេល២ថ្ងៃដោយឡែកពីគ្នា សរុបចំនួន១៣នាក់ រួមទាំងវត្ថុតាង បញ្ជូនទៅសាលាដំបូងខេត្តបន្ទាយមានជ័យ នៅថ្ងៃទី១៦ ខែកញ្ញា ឆ្នាំ២០១៦នេះ។
លោកវរសេនីយ៍ឯក ស ប៊ុនសឿង មេបញ្ជាការរងកងរាជអាវុធហត្ថខេត្ត ទទួលការបង្ក្រាបបទល្មើសគ្រឿងញៀនបានឲ្យដឹងថាដោយអនុវត្តតាមបទបញ្ជារបស់លោកឧត្តមសេនីយ៍ត្រី ឱ បូរិន្ទ មេបញ្ជាការកងរាជអាវុធហត្ថខេត្ត បានដាក់ចេញនូវបទបញ្ជា ដល់កងកម្លាំងជំនាញ និងកម្លាំងមូលដ្ឋានកងរាជអាវុធហត្ថគ្រប់ ស្រុក/ក្រុង ជាលទ្ធផលក្នុងរយៈពេល២ថ្ងៃ គឺថ្ងៃទី១៤-១៥ខែកញ្ញា ឆ្នាំ២០១៦ សមត្ថកិច្ចកងរាជអាវុធហត្ថ បានចុះប្រតិបត្តិការបង្ក្រាបជនសង្ស័យជាមុខសញ្ញាជួញដូរ និងប្រើប្រាស់គ្រឿងញៀន ក្នុងភូមិសាស្ត្រ ឃុំប្ញស្សីក្រោក ស្រុកមង្គលបូរី និងភូមិសាស្ត្រសង្កាត់ព្រះពន្លា ក្រុងសិរីសោភ័ណ ចំនួន១៣នាក់។
ក្នុងនោះដែរ សមត្ថកិច្ចបានចាប់ឃាត់ខ្លួនមុខសញ្ញាជួញដូរគ្រឿងញៀន ចំនួន៣នាក់ នៅភូមិប្រឡាយលួង ឃុំ ប្ញស្សីក្រោក ស្រុកមង្គលបូរី ខេត្តបន្ទាយមានជ័យ មានឈ្មោះ ១-ឡាច ឡុញ ភេទប្រុស អាយុ៤១ឆ្នាំ ២-ឈុន ចន្ថា ភេទប្រុស អាយុ២៩ឆ្នាំ ៣-ចាន សំណាង ភេទប្រុស អាយុ២៣ឆ្នាំ។ លោកមេបញ្ជាការរងបានបញ្ជាក់ថា ក្នុងកិច្ចប្រតិបត្តិការនេះ គឺយើងដកហូតបានវត្ថុតាងថ្នាំញៀន ប្រភេទមេតំហ្វាតាមីន អាយស៍(ខេទឹកកក)ចំនួន៥កូនថង់ ទម្ងន់ស្មើ២,៤៧ក្រាម ទូរស័ព្ទដៃចំនួន១៦គ្រឿង និងឧបករណ៍សម្រាប់ជក់មួយចំនួនធំ ម៉ូតូ៥គ្រឿង កាំបិតចំនួន៥។
ចំពោះជនសង្ស័យជួញដូរ និងប្រើប្រាស់ទាំង១៣នាក់ រួមទាំងវត្ថុតាង នៅថ្ងៃទី១៦ខែកញ្ញាឆ្នាំ២០១៦នេះ ត្រូវបានកម្លាំងកងរាជអាវុធហត្ថ ខេត្តរៀបចំសំណុំរឿងបញ្ជូនទៅសាលាដំបូងខេត្តបន្ទាយមានជ័យ ចាត់ការតាមនិតិវិធីច្បាប់ហើយដែរ៕
ចែករំលែកព័តមាននេះ