រោងចក្រក្ស័យធនថៅកែរត់ចោល មិនបើកប្រាក់ខែឲ្យកម្មករ
ខេត្តកណ្ដាល ៖ កម្មករ កម្មការិនីរោងចក្រកាត់ដេរ ហ្គ្រេតអននើ GREAT HONOUR ចំនួន៩៧០នាក់ ដែលមានទីតាំងនៅភូមិលេខ៤ ឃុំស្វាយរលំ ស្រុកស្អាង កាលពីរសៀលថ្ងៃទី១៦ ខែកញ្ញានេះ
ខេត្តកណ្ដាល ៖ កម្មករ កម្មការិនីរោងចក្រកាត់ដេរ ហ្គ្រេតអននើ GREAT HONOUR ចំនួន៩៧០នាក់ ដែលមានទីតាំងនៅភូមិលេខ៤ ឃុំស្វាយរលំ ស្រុកស្អាង កាលពីរសៀលថ្ងៃទី១៦ ខែកញ្ញានេះ បាននាំគ្នា ជិះរ៉ឺម៉ក មកលើកបដា នៅមុខសាលាដំបូងខេត្តកណ្ដាល ដើម្បីស្នើសុំឱ្យអាជ្ញាធរ និងស្ថាប័នតុលាការជួយអន្តរាគមន៍ រកយុត្តិធម៌ដល់ពួកគាត់ ដែលត្រូវបានថៅកែរោងចក្រ រត់ចោល មិនបើកប្រាក់ខែឱ្យកម្មករ ហើយបិទទ្វាររត់ចោលបាត់។
ក្រុមកម្មករបាននាំគ្នាមកឈរលើកបដា មានរូបសម្ដេចតេជោ និងសម្ដេចកិត្តិព្រឹទ្ធបណ្ឌិត ព្រមទាំងឈប់រ៉ឺម៉ក ត្រៀបត្រានៅមុខសាលាដំបូង ដោយស្នើសុំឱ្យអាជ្ញាធរ និងមន្ត្រី មន្ទីរ ការងារ ពិសេសស្ថាបន័តុលាការ ជួយរកយុត្តិធម៌ដល់ពួកគាត់ផង។ ដោយសារតែថៅកែរោងចក្រ បានរត់ចោលកម្មករ និងមិនបើកប្រាក់ខែឱ្យកម្មកររយៈពេលជាង២ខែមកហើយ ហើយថៅកែរោងចក្រ មិនគោរពច្បាប់ស្ដីពីការងារទេ។ កម្មករលើកឡើងថា ពួកគាត់ធ្វើការជាកម្មករ សង្ឃឹមលើប្រាក់ខែជាង១០០ដុល្លារ សម្រាប់ចាយវាយ ដោះស្រាយជីវភាពប្រចាំថ្ងៃ។
បើថៅកែរោងចក្រ រត់ចោលមិនបើកប្រាក់ខែមិនដោះស្រាយឱ្យកម្មករ តើពួកគាត់មានអ្វីសង្ឃឹមនោះ។ កម្មករបានសំណូមពរដល់អាជ្ញាធរ និងតុលាការ ជួយដោះស្រាយឲ្យបានឆាប់ បើរោងចក្រនេះក្ស័យធន បិទទ្វារ សូមឱ្យថៅកែរោងចក្រទូទាត់ប្រាក់ផ្សេងៗទាំងអស់ដល់កម្មករ តាមច្បាប់ស្ដីពីការងារឱ្យបានត្រឹមត្រូវផង។ តំណាងកម្មករបានឱ្យដឹងថា ខាងតំណាងរោងចក្រនេះ កាលពីថ្ងៃទី១១ ខែសីហា បានប្រកាសប្រាប់កម្មករ និងបុគ្គលិកថា រោងចក្រក្ស័យធន បានបិទទ្វារហើយ។
នៅរសៀលថ្ងៃទី១១ ខែសីហាដដែលនោះ អាជ្ញាធរខេត្ត មន្ត្រី ក្រសួង មន្ទីរការងារ បានចុះទៅពិនិត្យ នៅរោងចក្រនោះផ្ទាល់ និងបាន ធ្វើកំណត់ហេតុរាប់សម្ភារក្នុងរោងចក្រនោះ និងចាក់សោទុកបណ្ដោះអាសន្ន ដើម្បីរង់ចាំពិភាក្សា ដោះស្រាយជូនកម្មករជាក្រោយ។ ចាប់តាំងពីពេលនោះមក កម្មករបានរង់ចាំដំណោះស្រាយពីអាជ្ញាធរ មួយសប្ដាហ៍ហើយ មួយសប្ដាហ៍ទៀត ចេះតែបាត់ដំណឹងពីដំណោះស្រាយឈឹង និងខាងតំណាងកម្មករ បានដាក់ពាក្យបណ្ដឹងចូលតុលាការទៀត ក៏មិនមានចំណាត់ការដែរ ទើបពួកគាត់ជាកម្មករ នាំគ្នាមកស្នើសុំឱ្យតុលាការ ប្រញាប់ចាត់ការបណ្ដឹងរបស់កម្មករនេះ។
លោក លឹម សុគន្ថា ព្រះរាជ្ញាសាលាដំបូង ខេត្តកណ្ដាល បានប្រាប់ឱ្យដឹងថា ក្រោយពីរោងចក្រនេះក្ស័យធន បិទទ្វារ និងបន្ទាប់ពីមានបណ្ដឹងពីតំណាងកម្មករ អាជ្ញាធរ និងព្រះរាជ្ញាសាលាដំបូងខេត្ត បានធ្វើកំណត់ហេតុ និងរាប់សម្ភារនៅក្នុងរោងចក្រ ហើយបានចេញដីការក្សាការរួចរាល់ ព្រមទាំងបានប្រកាស ដាក់លក់សម្ភារនៅក្នុងរោងចក្រនេះទាំងស្រុងផងដែរ ដើម្បីយកលុយមកសងកម្មករ ប៉ុន្តែមិនទាន់មានអ្នកដាក់ពាក្យទិញ នៅឡើយទេ។
លោកព្រះរាជអាជ្ញា បានពន្យល់់ពីនីតិវិធី របស់តុលាការដល់តំណាងកម្មករ ក្រុមកម្មករក៏បាននាំគ្នាត្រឡប់ទៅវិញ។ ទោះជាបែបណា កម្មករ និងបុគ្គលិក រោងចក្រនេះបានសំណូមពរ ដល់អាជ្ញាធរ និង មន្ទីរ ក្រសួងការងារ ពិសេសតុលាការ ធ្វើយ៉ាងណាសូមជួយដោះស្រាយ ឱ្យកម្មករទួលបានប្រាក់ ផ្សេងៗគ្រប់ចំនួនតាមច្បាប់ស្តីពីការងារផង៕
ចែករំលែកព័តមាននេះ