AFP កាលពីពេល ថ្មីៗកន្លងមកផ្សាយថា អ្នកស្រីMerete Hodne ជាងកាត់សក់ជនជាតិន័រវេស អាយុ៤៧ឆ្នាំ ត្រុវតុលាការពិន័យជាប្រាក់ជាង១.០០០អឺរ៉ូ ពីបទរើសអើង ដោយបដិសេធមិនកាត់សក់ឱ្យអតិថិជនមូស្ល៊ីម ដែលពាក់ «Hijab» ឬក្រណាត់រុំក្បាល ។
អ្នកស្រីHodne ប្រឈមនឹងការជាប់គុក៦ខែ ពីបទរើសអើងសាសនា ដោយបដិសេធមិនទទួលនាង Malika Bayan ជាជនជាតិមូស្លុីមដែលចូលក្នុងហាងរបស់ខ្លួននៅក្រុងប្រាយភាគខាងលិចឆៀងខាងត្បូងប្រទេសន័រវែស កាលពីខែតុលា ឆ្នាំ២០១៥ ។ តុលាការលើកឡើងថា «គ្មានអ្វីត្រូវសង្ស័យថាចុងចោទមិនបានប្រព្រឹត្ដអំពើនោះទេ ព្រោះរើសអើងអតិថិជននាង Bayan ដោយបណ្ដេញចេញពីហាងកាត់សក់របស់ខ្លួនព្រោះជាជនមូស្លុីម» ។ តុលាការសម្រេចពិន័យលោកស្រីHodne ជាប្រាក់ចំនួន១០.០០០ក្រូន័រ (ប្រាក់ន័រវែស) ឬប្រហែល១.០៧៥អឺរ៉ូ និងត្រូវបង់ថ្លៃដំណើរការរឿងក្ដីដល់តុលាការចំនួន៥.០០០ក្រូន័របន្ថែមទៀត ។
មេធាវីរបស់ចុងចោទលើកឡើងថា អ្នកស្រី Hodne នឹងប្ដឹងទៅឧទ្ធរណ៍ពីការសម្រេចរបស់តុលាការ ព្រោះអ្នកស្រីបានឆ្លើយនៅចំពោះមុខតុលាការថាខ្លួនសម្លឹងឃើញថាក្រណាត់រុំក្បាល ដែលនារីមូស្លុីមពាក់ជាសញ្ញាផ្នែកនយោបាយ ជាតឹកតាងបង្ហាញពីឧត្ដមគតិនៃគោលគំនិតធ្វើឱ្យនាងភ័យខ្លាចខ្លាំង និងជានិមិត្ដរូបនៃសាសនា ។
នៅក្នុងឯកសារបានបញ្ជាក់ពីបទចោទប្រកាន់លើអ្នកស្រី Hodne ថា នាង Bayan បានទៅរកហាងកាត់សក់ផ្សេងជំនួសវិញ នៅពេលអ្នកស្រី Hodne មិនទទួល ។ អ្នកស្រី Hodne យល់ព្រមទទួលស្គាល់ថា ខ្លួនបានបដិសេធមិនទទួលនាង Bayan ប៉ុន្ដែបដិសេធបទបោទប្រកាន់ដែលថា ខ្លួនរើសអើងសាសនា ៕
ចែករំលែកព័តមាននេះ