បន្ថែមពីការប្រគេនកុំព្យូទ័រចំនួន១៥គ្រឿង ដល់សិស្សជាប់បាក់ឌុប មានពិន្ទុរខ្ពស់ជាងគេចំនួន១៥នាក់នៅខេត្តស្វាយរៀង ព្រះអង្គនី សុវណ្ណមុនីរ៉េត ទ្រង់បានប្រគល់ជូននូវអាហាររូបករណ៍៤ឆ្នាំ ដល់សាមណេ២អង្គ ខណៈដែលសាមណេទាំង២ទើបតែសម្រេចគោលដៅប្រឡងជាប់ជាស្ថាពរក្រោមរូបភាពខិតខំរៀនសូត្រជាប្រចាំស្របពេលក្រសួងអប់រំកែទម្រង់វិស័យអប់រំ។
ព្រះអង្គនី សុវណ្ណមុនីរ៉េត គង់នៅកុដិលេខ២៤ នៃវត្តនាគវ័នរាជធានីភ្នំពេញ បានមានសង្ឃដីកាឱ្យដឹងថា ដោយយល់ឃើញសាមណេទាំងពីរ គឺព្រះនាមស្រ៊ន់ ចន្ថា និងព្រះនាមតុល សុខ មានធ្លាប់ស្នាក់នៅវត្តនាគវ័ន ហើយតែងតែខិតខំព្យាយាមរៀនសូត្រជាប្រចាំ ដើម្បីយកឈ្នះការប្រឡងបាក់ឌុប ដែលមានការរឹតបន្តឹង រហូតជាប់ជាស្ថាពរអាត្មាភាពពិតជាពេញចិត្តផ្តល់ និងប្រគេនជូននូវអាហាររូបករណ៍៤ឆ្នាំ ជូនសាមណេទាំងពីរ តាមបំណងចង់បានយោងលើភាពខ្វះខាត ។
ព្រះអង្គបន្ថែមទាំងទឹកមុខរីករាយទៀតថា អាត្មាភាពពិតជាចង់បំពេញនូវបំណងរបស់សាមណេទាំងពីរចង់សិក្សារៀនសូត្រនៅថ្នាក់សាកលវិទ្យាល័យ ពោលមិនចង់ឲ្យមានការភ័យបារម្ភរឿងខ្វះខាតផ្នែកសិក្សាអ្វីទេ សំខាន់ឱ្យតែចិត្តចង់និងព្យាយាមក្រេបយកចំណេះវិជ្ជាក្លាយជាធនធានមនុស្សជួយអភិវឌ្ឍន៍សង្គមកម្ពុជាយើង ។ ចំពោះសាមណេទាំងពីរម្នាក់ត្រូវបានចូលសិក្សាសាកលវិទ្យាល័យភូមិន្ទវិចិត្រសិល្បៈផ្នែករចនាប្លង់ និងមួយអង្គទៀត សិក្សាផ្នែកភាសាជប៉ុននៃសាកលវិទ្យាល័យភូមិន្ទភ្នំពេញ។
ការបង្ហាញចេតនាបែបនេះ ក៏ព្រោះតែអាត្មាភាពកាលនៅវ័យក្មេង និយាយពីផ្នែកសិក្សារៀនសូត្រវិញ គឺមិនបានច្រើនប៉ុន្មាននោះទេ ព្រោះតែជួបបញ្ហាក្នុងជីវិតច្រើន ។ ម្ល៉ោះហើយ ទើបស្រឡាញ់ការសិក្សាចង់ឲ្យអ្នកជំនាន់ក្រោយរៀនចេះដឹងព្រមទាំងក្លាយជាមនុស្សល្អក្នុងសង្គមយើងឲ្យបានច្រើន ។ បន្ថែមពីការប្រគល់ជូនអាហាររូបករណ៍អាត្មា ក៏ប្រគេនជូននូវកុំព្យូទ័រមួយអង្គគ្រឿង ដើម្បីជាជំនួយសម្រាប់ទុកជាឯកសារពេលសិក្សាជាផ្លូវការខាងមុខនេះ។
ព្រះអង្គស្រ៊ន់ ចន្ថា ដែលចាប់យកជំនាញសិក្សាភាសាជប៉ុន បានបង្ហាញចំណាប់អារម្មណ៍ផងដែរថាព្រះអង្គគឺជាអ្នកស្រុកកំពង់ចាមហើយបានមកស្នាក់នៅវត្តនាគវ័ននេះជាង១ឆ្នាំដើម្បីរៀន និងប្រឡងយកសញ្ញាប័ត្របាក់ឌុប ។ ពីមុនគិតថា ជាសិស្សស្វ័យរិនពិបាកប្រឡង ក៏ជម្រុញខ្លួនឯងរៀន ឱ្យយច្រើនរហូតជាប់ជាស្ថាពរ ។
ក្រោយពេលជាប់បាក់ឌុប ក្តីកង្វល់បានកើតឡើង ព្រោះមិនមានធនធានទ្រព្យអ្វីរៀនសូត្របន្តឡើយគ្រួសារក្រីក្រ ។ ពេលនេះ ក្នុងចិត្តរីករាយបំផុត និងចាត់ទុកថាជាគុណមួយធំធេងដែលព្រះគ្រូនី សុវណ្ណមុនីរ៉េត មានទឹកព្រះទ័យ ជួយគិតគូរ ដោយសន្យាថា នឹងតស៊ូរៀនសូត្រឲ្យល្អ ដើម្បីជួយអភិវឌ្ឍន៍សង្គម និងឆ្លើយតបម្ចាស់ជំនួយបានកក់ក្តៅចំពោះការមានសណ្តានចិត្តនេះ ។
គួរបញ្ជាក់ផងដែរថា ព្រះអង្គនី សុវណ្ណមុនីរ៉េត ត្រៀមប្រគល់ជូននូវលេបថបចំនួន១៥គ្រឿង ជូនដល់សិស្សជាប់បាក់ឌុបនៅខេត្តស្វាយរៀងដែលមានពិន្ទុខ្ពស់ជាងគេ ដោយមិនគិតពីនិទ្ទេស ហើយរហូតមកទល់ពេលនេះ ឈ្មោះសិស្សទាំង១៥រូបបាននឹងបង្ហាញលទ្ធផលរួចរាល់អស់ផងដែរ នៅចាំតែថ្ងៃរៀបចំពិធីជាផ្លូវការ នៅពេលខាងមុខនាទីរួមខេត្តស្វាយរៀង ។
ចែករំលែកព័តមាននេះ