រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា រថយន្ដសាំយ៉ុងមួយគ្រឿងបើកបរ និងរួមដំណើរជាលក្ខណៈគ្រួសារ ក្នុងគោលបំណងទៅសែនឆេងម៉េងនៅឯខេត្ត លុះពេលធ្វើដំណើរតាមផ្លូវដោយមិនបានប្រយ័ត្ន ក៏ត្រូវរថយន្ត RangRover មួយគ្រឿងដែលបើកបរបំពានផ្លូវអាទិភាព បណ្តោលអោយបុកគ្នារងការខូចខាត ហើយក៏ប្រកែកគ្នាតឹងសរសៃ.កយកត្រូវរៀងៗខ្លួន បង្កឱ្យមានការភ្ញាក់ផ្អើលកាលពីវេលាម៉ោង១២និង៣០នាទីយប់ ថ្ងៃទី០៤ ខែមេសា ឆ្នាំ២០២២ តាមបណ្តោយមហាវិថីព្រះនរោត្ដម កែងផ្លូវ១០៨ ស្ថិតក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ ។
បើតាមប្រភពពីម្ចាស់រថយន្តសាំយ៉ុង ពណ៌ស ពាក់ស្លាកលេខភ្នំពេញ 2AK-6096 បើកនិងរួមដំណើរជាលក្ខណៈគ្រួសារបានឱ្យដឹងថា មុនពេលកើតហេតុ គាត់និងគ្រួសារបានធ្វើដំណើរចេញពីក្រុងតាខ្មៅ ក្នុងគោលបំណងទៅខេត្តកំពង់ចាម ដើម្បីសែនឆេងម៉េង។ ប៉ុន្តែខណៈពេលរូបគាត់ធ្វើដំណើរមកដល់ចំណុចកើតហេតុ នៅផ្លូវនរោត្ដម ទិសដៅពីត្បូងទៅជើង កែងផ្លូវ១០៨ ក៏មានម៉ូតូសណ្តោងរ៉ឺម៉កមួយគ្រឿង បានធ្វើដំណើរឆ្លងកាត់មហាវិថីព្រះនរោត្ដម លុះពេលឃើញរថយន្តគាត់ឆ្លងកាត់ ម៉ូតូសណ្តោងរ៉ឺម៉កនោះក៏បន្ថយល្បឿនអោយរថយន្តគាត់ឆ្លងទៅមុន។
ម្ចាស់រថយន្តសាំយ៉ុង បន្តថា ភ្លាមៗនោះដែរ ក៏មានរថយន្តមួយគ្រឿងទៀតម៉ាក RangRover MiNI ពណ៌ខ្មៅ ពាក់ស្លាកលេខ ភ្នំពេញ 2AB-0523 ធ្វើដំណើរវ៉ាជែងម៉ូតូសណ្តោងរ៉ឺម៉កនោះបំពានផ្លូវអទិភាព មកបុកគ្នាជាមួយរថយន្តគាត់ បណ្តាលឱ្យរងការខូចខាតបែកស្តុបខាងឆ្វេង និងក្រពឹតកាង ចំណែករថយន្ត RangRover រងការខូចខាតមួយកំណាត់មុខខាងស្តាំ ដោយក្រពឹតកាងខាងស្តាំ និងបែកស្តុបខាងមុខ តែសំណាងល្អក្នុងហេតុការណ៍នោះមិនបង្កឲ្យមានមនុស្សរងរបួសឡើយ ។
បន្ទាប់ពីកើតហេតុ ភាគីទាំងពីរបានប្រកែកគ្នាយកត្រូវរៀងៗខ្លួន ដោយខាងរថយន្ត RangRover បានទាមទារសំណងពីខាងរថយន្តសាំយ៉ុង ។ ចំណែករថយន្តសាំយ៉ុង បដិសេធ មិនសង និងបានទាមទារសំណងពីរថយន្ត RangRover វិញ ព្រោះបើកបរបំពានផ្លូវអាទិភាព មកបុករថយន្តរបស់គាត់ ។
ក្រោយពេលកើតហេតុ ភាគីទាំងពីរត្រូវបានសមត្ថកិច្ច ជួយសម្របសម្រួល នៅទីបំផុតពួកគាត់ក៏ព្រមស្មើគ្នា និងយករថយន្តទៅជួសជុលរៀងៗខ្លួន ដើម្បីបញ្ចប់រឿង ។
ចែករំលែកព័តមាននេះ