វៀតណាមគ្រោងប្រមូលដីស្រែដើម្បីបង្កើនផលិតផលកសិកម្ម
ប្រទេសវៀតណាម ៖ ប្រធានគណៈកម្មការផ្នែកកិច្ចការសេដ្ឋកិច្ច លោក Nguyen Van Binh បានឱ្យដឹងថា វៀតណាមនឹងបង្កើតគោលនយោបាយជំរុញឱ្យមានការកាន់កា.ប់ដីទ្រង់ទ្រាយធំ ព្រមទាំង
ប្រទេសវៀតណាម ៖ ប្រធានគណៈកម្មការផ្នែកកិច្ចការសេដ្ឋកិច្ច លោក Nguyen Van Binh បានឱ្យដឹងថា វៀតណាមនឹងបង្កើតគោលនយោបាយជំរុញឱ្យមានការកាន់កាប់ដីទ្រង់ទ្រាយធំ ព្រមទាំងសហប្រតិបត្តិការក្នុងវិស័យកសិកម្ម ។
លោក Binh បានឱ្យដឹងកាលពីថ្ងៃសុក្រ ក្នុងសិក្ខាសាលាមួយនៅទីក្រុងហាណូយថា កំណើនផលិតកម្មនៃវិស័យកសិកម្មរបស់ប្រទេសវៀតណាម មានភាពយឺតជាងប្រទេសភាគច្រើននៅក្នុងតំបន់អាស៊ីអាគ្នេយ៍ ចាប់តាំងពីឆ្នាំ១៩៩០។ វិស័យនេះបានពឹងផ្អែកជាយូរមកហើយលើការប្រើប្រាស់កម្លាំងពលកម្ម និងមូលធនជាច្រើនដើម្បីរក្សាសន្ទុះរបស់ខ្លួន ។ ទោះជាយ៉ាងណា ការធ្វើកសិកម្មប្រភេទនេះមិនអាចផ្តល់ផលចំណេញដូចពីមុនទេ ។
លោក Binh បានប្រៀបធៀបកំណើនផលិតកម្មក្នុងវិស័យកសិកម្មរបស់វៀតណាម ក្នុងឆ្នាំ២០០០-២០១៣ ដែលបានកើនឡើងជាមធ្យមចំនួន៣,៤% ជាមួយនឹងអត្រាកំណើនជាមធ្យមនៅប្រទេសចិន និងកូរ៉េខាងត្បូង (ឆ្នាំ១៩៨០ ដល់ឆ្នាំ១៩៩៥) បានកើនឡើងដល់៧,៥% ។
ក្រោមការដាក់សម្ពាធពីគូប្រជែងបរទេស កសិករវៀតណាមនឹងត្រូវពង្រីកអាជីវកម្មរបស់ខ្លួន ដោយបង្កើនបរិមាណ និងសមត្ថភាពផលិត ដែលតម្រូវឱ្យមានដីកសិកម្មកាន់តែច្រើន ។
លោក Binh ឱ្យដឹងថា ៖ « យើងមិនអាចពឹងផ្អែកលើការធ្វើកសិកម្មជាលក្ខណៈគ្រួសារទៀតទេ » ។ លោកបានគូសបញ្ជាក់ពីតួនាទីរបស់សហករណ៍ និងសហគ្រាសកសិកម្ម ដែលអាចបង្កើនផលិតកម្មតាមរយៈការវិនិយោគទ្រង់ទ្រាយធំ ។
ដីកសិកម្មរបស់ប្រទេសវៀតណាមដែលបែកជាបំណែក បានធ្វើឲ្យប្រសិទ្ធភាពទូទៅនៃផលិតកម្មកសិកម្មរបស់ប្រទេសនេះធ្លាក់ចុះ ។
តាមស្ថិតិរបស់រដ្ឋាភិបាលបង្ហាញថា ៧៥%នៃកសិករនៅខេត្ត An Giang ដែលជាខេត្តមួយក្នុងចំណោមខេត្តដាំដុះស្រូវធំបំផុតក្នុងប្រទេសវៀតណាម បានដាំដុះតិចជាង១ហិកតា។ អ្នកជំនាញនិយាយថា ដើម្បីបង្កើនផលិតកម្ម និងនៅតែទទួលបានផលចំណេញ យើងត្រូវការដីកសិកម្មច្រើនជាង៣ហិកតា ។
លោក Binh បន្តថា ៖ « ជំហានដំបូងដែលយើងត្រូវធ្វើ គឺពង្រួមដីដែលមានទំហំតូចជាច្រើនឲ្យមានទំហំធំ ធ្វើដូច្នេះ យើងនឹងកសាងទំនុកចិត្តដល់វិនិយោគិននៅក្នុងវិស័យកសិកម្ម » ។
ស្ថិតិបង្ហាញថា កសិករនៅតំបន់ដីសណ្តទន្លេមេគង្គ បានប្រើប្រាស់ថ្នាំសម្លាប់សត្វល្អិតប្រហែល១០ម៉ឺនតោន និងជីច្រើនជាង២លានតោនជារៀងរាល់ឆ្នាំ ។ តំបន់ដីសណ្តទន្លេមេគង្គ ត្រូវបានគេស្គាល់ថា ជាប្រភពសេដ្ឋកិច្ចដ៏សំខាន់របស់វៀតណាម ដែលមានចំនួនជិតពាក់កណ្តាលនៃផលិតកម្មស្រូវប្រចាំឆ្នាំ ។
ផលិតកម្មបែងចែកនេះ ក៏បានបង្កការខាតបង់ក្នុងអំឡុងពេលប្រមូលផលស្រូវផងដែរ។ ការខាតបង់ស្រូវអង្ករក្រោយការប្រមូលផលត្រូវបានគេប៉ាន់ប្រមាណថា អាចមានចំនួនខ្ពស់ដល់ទៅ២៥%ក្នុង១ឆ្នាំ នៅតំបន់ដីសណ្តទន្លេមេគង្គ ពោលគឺវៀតណាមខាតបង់ប្រហែល២៥ទ្រីលានដុង (១,១ប៊ីលានដុល្លារ) ក្នុង១ឆ្នាំ ក្រោយការប្រមូលផល ។
លោក Binh និយាយថា ៖ « គោលនយោបាយរបស់រដ្ឋាភិបាល នឹងទាក់ទាញអាជីវកម្មឯកជនក្នុងវិស័យកសិកម្ម ។ ការវិនិយោគរបស់ពួកគេនឹងនាំទៅដល់ការធ្វើកសិកម្មជាយន្ដការទ្រង់ទ្រាយធំ » ។
វិទ្យាស្ថានគោលនយោបាយ យុទ្ធសាស្ត្រកសិកម្ម និងការអភិវឌ្ឍជនបទបានឱ្យដឹងថា ការវិនិយោគផ្ទាល់ពីបរទេសកំពុងហូរចូលក្នុងវិស័យកសិកម្មប្រទេសវៀតណាម គឺមានប្រមាណតែ១%ប៉ុណ្ណោះ ។
យោងតាមរបាយការណ៍របស់ក្រសួងកសិកម្ម មានត្រឹមតែ១%នៃសហគ្រាសក្នុងប្រទេសវៀតណាម ដែលបានវិនិយោគក្នុងវិស័យកសិកម្មកាលពីឆ្នាំមុន ហើយ៨៥%ជាក្រុមហ៊ុនឯកជន ។
ការធ្លាក់ចុះក្នុងវិស័យកសិកម្មរបស់វៀតណាមមានផលអាក្រក់ក្នុងឆ្នាំនេះ បន្ទាប់ពីវាត្រូវបានវាយប្រហារដោយគ្រោះរាំងស្ងួត និងទឹកប្រៃហូរចូលក្នុងប្រភពទឹកសាបអូសបន្លាយពេលយ៉ាងយូរ ។ ជាលទ្ធផល វិស័យកសិកម្មមានកំណើនអវិជ្ជមាន០,១៨% ក្នុងអំឡុងឆមាសទី១ឆ្នាំនេះ ។
លក្ខខណ្ឌអាកាសធាតុមិនល្អបានជំរុញឱ្យរដ្ឋាភិបាលវៀតណាមប្រញាប់ដោះស្រាយស្ថានភាពនេះ ហើយការព្យាយាមចុងក្រោយអាចនឹងបង្កើនផលិតកម្មបាន ៕
ចែករំលែកព័តមាននេះ