ប្រទេសថៃ ៖ ប្រភពពីរដ្ឋមន្ត្រីបានឲ្យដឹងថា ក្រសួងសេដ្ឋកិច្ចឌីជីថល និងសង្គម នឹងត្រូវចាប់ផ្តើមដំណើរការជាផ្លូវការក្នុងសប្តាហ៍នេះ ហើយនឹងជំនួសក្រសួងព័ត៌មាន និងទំនាក់ទំនងបច្ចេកវិទ្យា (ICT) ។
ក្រសួងនេះនឹងទទួលភារកិច្ចពីក្រសួង ICT ហើយគ្រោងនឹងចាប់ផ្តើមដំណើរការនៅថ្ងៃសុក្រ។ គ្រប់ផ្នែកដែលនៅក្រោមក្រសួង ICT នឹងមកស្ថិតនៅក្រោមក្រសួងថ្មីនេះវិញ លើកលែងតែមួយផ្នែកប៉ុណ្ណោះ ។
ផ្នែកទាំងនោះមាន ការិយាល័យស្ថិតិជាតិ, នាយកដ្ឋានឧតុនិយមវិទ្យា, ក្រុមហ៊ុន TOT Plc, CAT Telecom Plc, Thailand Post Co Ltd, ភ្នាក់ងារអភិវឌ្ឍន៍ការផ្ទេរអគ្គិសនី, ភ្នាក់ងារផ្សព្វផ្សាយវិស័យកម្មវិធីកុំព្យូទ័រប្រទេសថៃ និងភ្នាក់ងាររដ្ឋាភិបាលអេឡិចត្រូនិក ។
ចំណែកឯភ្នាក់ងារតែមួយដែលមិនស្ថិតនៅក្រោមក្រសួងថ្មីនេះ គឺមជ្ឈមណ្ឌលឲ្យសញ្ញាពីគ្រោះធម្មជាតិ ដែលត្រូវផ្ទេរឲ្យស្ថិតនៅក្រោមក្រសួងមហាផ្ទៃវិញ ។
ក្រសួងថ្មីនេះនឹងមានភារកិច្ចក្នុងផ្នែកគ្រោង ផ្សព្វផ្សាយ អភិវឌ្ឍន៍ និងអនុម័តនូវសកម្មភាពដែលមានគោលដៅក្នុងការផ្លាស់ប្តូរប្រទេសថៃ ឲ្យក្លាយជាសង្គម និងសេដ្ឋកិច្ចឌីជីថល ។
ប្រភពមួយបាននិយាយថា មានបេក្ខជន៣រូបដែលអាចត្រូវបានជ្រើសតាំងជារដ្ឋមន្ត្រី ដើម្បីជំនួសរដ្ឋមន្ត្រីក្រសួងICT ដែលអាចនឹងបរាជ័យក្នុងការបន្តតំណែងជារដ្ឋមន្ត្រីក្នុងក្រសួងថ្មី ។
លោករដ្ឋមន្ត្រី Uttama Savanayana នៃក្រសួងICTបាននិយាយថា លោកនឹងត្រូវលាឈប់ពីតំណែង នៅពេលដែលក្រសួងថ្មីចាប់ផ្តើមដំណើរការជាផ្លូវការ ។
លោកថែមទាំងបានលុបចោលគម្រោងក្នុងការចូលរួមកម្មវិធី «Startup Thailand and Digital Thailand 2016» ដែលនឹងប្រារព្ធឡើងនៅ Royal Phuket Marina ក្នុងខេត្ត Phuket នាថ្ងៃទី១៦ ដល់១៨ កញ្ញា ខាងមុខនេះ ដោយមានលោកនាយករដ្ឋមន្ត្រី Prayut Chan-o-cha ចូលរួមផងដែរ ។
បេក្ខជន២រូបក្នុងចំណោម៣រូប អាចនឹងមកពីគណៈកម្មាធិការផ្សព្វផ្សាយ និងទូរគមនាគមន៍ជាតិ (NBTC) គឺអនុប្រធាន Sethapong Malisuwan និងអគ្គលេខាធិការ Takorn Tantasith រីឯបេក្ខជនម្នាក់ទៀត គឺឧត្តមមន្ត្រីនៃក្រសួងហិរញ្ញវត្ថុ ។
ក្រសួងថ្មីខាងលើនឹងបង្កើតឲ្យមាននូវភ្នាក់ងារក្រោមក្រសួងចំនួន២ គឺគណៈកម្មាធិការសេដ្ឋកិច្ចឌីជីថលជាតិ និងភ្នាក់ងារផ្សព្វផ្សាយសេដ្ឋកិច្ចឌីជីថល ដើម្បីទទួលភារកិច្ចក្នុងការអភិវឌ្ឍសេដ្ឋកិច្ចឌីជីថល ។
លោកនាយករដ្ឋមន្ត្រី Prayut Chan-o-cha នឹងដឹកនាំគណៈកម្មាធិការសេដ្ឋកិច្ចឌីជីថលជាតិ ។ លេខាធិការអចិន្ត្រៃយ៍ Songporn Komolsuradej នឹងបន្តតំណែងរបស់ខ្លួនក្នុងក្រសួងថ្មីផងដែរ ៕
ចែករំលែកព័តមាននេះ