សារព័ត៌មានបរទេសកាលពីពេល ថ្មីៗកន្លងមកផ្សាយថា អង្គការគ្រប់គ្រងការហោះហើរ និងអវកាសសហរដ្ឋអាមេរិក(NASA) បានបង្ហាញរូបភាពថ្មីពីយាន «Curiosity» ដែលត្រួតពិនិត្យនៅភពព្រះអង្គារជារូបភាពមានលក្ខណៈដូចដុំថ្មស្រដៀងនឹងដុំថ្មនៅកណ្តាលវាលខ្សាច់នៅលើភពផែនដី ។
អ្នកវិទ្យាសាស្ត្រនិយាយថា រូបភាពនោះធ្វើឱ្យពួកគេយល់ទាក់ទិននឹងការផ្គុំកកើតទៅជាថ្មនៅលើភពពណ៌ក្រហមនោះ ។
រូបថតនោះបានថតនៅបរិវេណមួយហៅថា «Murray Butte» ជាតំបន់សម្បូរដោយថ្ម និងជាទីតាំងភ្នំ «Mount Sharp» មានកម្ពស់ជាង៣.៦៧០ម៉ែត្រ ។ ភូមិសាស្ត្របែបនោះមានលក្ខណៈស្រដៀងតំបន់វាលខ្សាច់ភាគខាងលិចឆៀងខាងត្បូងសហរដ្ឋអាមេរិក ។
លោក Ashwin Vasavada អ្នកវិទ្យាសាស្ត្រពីគម្រោងការ «Curiosity» បញ្ជាក់ថា «រូបភាពរបស់ថ្មដែលថតបានជាថ្មខ្សាច់បុរាណផ្គុំកកើតឡើងពីខ្សាច់ និងតាមការសិក្សាស្រាវជ្រាវលំអិតអាចធ្វើឱ្យគេយល់ពីទួលខ្សាច់ដែលផ្គុំឡើង និងសង្កត់លើគ្នារហូតក្លាយជាភូមិសាស្ត្ររបស់ប្រទេសដែលយើងបានឃើញក្នុងពេលបច្ចុប្បន្ន» ៕
ចែករំលែកព័តមាននេះ