រាជធានីភ្នំពេញ ៖ បុរសម្នាក់លួចបើកទ្វារចូលផ្ទះគេប៉ុនប៉ងលួចទ្រព្យសម្បត្តិ តែត្រូវម្ចាស់តាមទាន់ស្រែកថាចោរៗ ហើយត្រូវម្ចាស់ផ្ទះដេញចាប់បានវាយទ្រោមខ្លួនប្រគល់ឲ្យសមត្ថកិច្ចកាលពីវេលាម៉ោង ៧និង០០នាទីយប់ ថ្ងៃទី១៤ ខែកញ្ញា ឆ្នាំ២០១៦ ត្រង់ចំណុចផ្ទះលេខ១៥០ ផ្លូវ១៥៦ សង្កាត់ទឹកល្អក់២ ខណ្ឌទួលគោក។
តាមប្រភពព័ត៌មានពីម្ចាស់ផ្ទះ ដែលជាជនរងគ្រោះបានឲ្យដឹងថា មុនពេលកើតហេតុរូបគេកំពុងតែនៅក្នុងបន្ទប់គេងហើយស្រាប់តែឮសូរសំឡេងបើកទ្វារផ្ទះ ពេលនោះប្រពន្ធរបស់ជនរងគ្រោះក៏បានដើរចេញមកមើលស្រាប់តែឃើញជនសង្ស័យ បានដើរចូលដល់កណ្ដាលផ្ទះសង្ស័យមានបំណងចង់លួចទ្រព្យសម្បត្តិ។
ពេលនោះប្រពន្ធជនរងគ្រោះក៏បានស្រែកថាចោរៗ ធ្វើភ្ញាក់ផ្អើលដល់ជនរងគ្រោះចេញពីបន្ទប់គេងហើយដេញតាមជនសង្ស័យ រហូតដល់ផ្លូវវ១៥៦កែង២៦១ ទើបឃាត់ខ្លួនបាន ហើយពេលនោះប្រជាពលរដ្ឋម្ដុំនោះបានបញ្ចេញកំហឹង ស្វាគមន៍ដាក់ជនសង្ស័យម្នាក់មួយដៃមួយជើងរហូតទ្រមខ្លួន ទើបនាំខ្លួនប្រគល់ឲ្យសមត្ថកិច្ចមូលដ្ឋានដើម្បីធ្វើការសាកសួរ។
បើតាមសម្ដីរបស់លោក នាយប៉ុស្ដិ៍នគរបាលរដ្ឋបាលទឹកល្អក់២ បានឲ្យដឹងថា ជនសង្ស័យខាងលើមានឈ្មោះ អ៊ុំ ម៉ៅ ភេទប្រុស អាយុ២៣ឆ្នាំ មុខរបរមិនពិតប្រាកដ ស្នាក់នៅសង្កាត់ផ្សារដេប៉ូ១ ខណ្ឌទួលគោក ហើយបក្ខពួករបស់គេម្នាក់ទៀតមានឈ្មោះ អាប៉ុង បានរត់គេចខ្លួនបាត់ស្រមោល។
បើតាមសម្ដីរបស់ជនសង្ស័យខាងលើបានឲ្យដឹងថា មុនពេលកើតហេតុរូបគេ និងបក្ខពួកម្នាក់ទៀតបានជិះម៉ូតូឌុបពីកន្លែងស្នាក់នៅ ហើយមកចុះមុខផ្ទះកើតហេតុ រួចពួកគេបានដើររុញទ្វារផ្ទះជនរងគ្រោះខាងលើ។ តែដោយសារតែរុញទៅទ្វារផ្ទះខាងលើមិនបានខ្ទាស់គន្លឹះ ទើបរូបគេឆ្លៀតឱកាសដើរចូលក្នុងផ្ទះបំណងលួចយកអាយផេតដែលកំពុងតែសាកថ្មចោលលើតុ តែត្រូវម្ចាស់ចេញមកទាន់ស្រែកថាចោរៗ ហើយដេញតាមចាប់ខ្លួនបាន។
ក្រោយពេលកើតហេតុ ដោយសារតែជនរងគ្រោះមិនទាន់បាត់បង់ទ្រព្យសម្បត្តិអ្វីនោះទើបរូបគាត់មិនបានដាក់ពាក្យបណ្ដឹងទៅលើជនសង្ស័យខាងលើឡើយ។ ចំណែកឯសមត្ថកិច្ចមូលដ្ឋានក៏សម្រេចបញ្ជូនជនសង្ស័យខាងលើទៅកាន់មន្ទីរសង្គមកិច្ចដើម្បីធ្វើការអប់រំកែប្រែជនសង្ស័យខាងលើនោះ៕
ចែករំលែកព័តមាននេះ