ខេត្តស្ទឹងត្រែង ៖ ភ្លៀងខុសរដូវបានធ្វើឱ្យទឹកជន់លិចចូលក្រោមផ្ទះរបស់ប្រជាពលរដ្ឋជាច្រើនខ្នង ស្ថិតនៅភូមិក្បាលរមាស និងភូមិស្រែស្រណុកថ្មី បង្កផលប៉ះពាល់ដល់ផលដំណាំមួយចំនួន និងសត្វចិញ្ចឹមមាន់ ទា ផងដែរ ។…
ខេត្តស្ទឹងត្រែង ៖ ភ្លៀងខុសរដូវបានធ្វើឱ្យទឹកជន់លិចចូលក្រោមផ្ទះរបស់ប្រជាពលរដ្ឋជាច្រើនខ្នង ស្ថិតនៅភូមិក្បាលរមាស និងភូមិស្រែស្រណុកថ្មី បង្កផលប៉ះពាល់ដល់ផលដំណាំមួយចំនួន និងសត្វចិញ្ចឹមមាន់ ទា ផងដែរ ។
លោកគ្រុ យូរ មេភូមិក្បាលរមាសបានបញ្ជាក់ថា ឆ្នាំនេះភ្លៀងខុសរដូវ ទោះបីចង់ទៅធ្វើស្រែក៏មិនកើតដែរ ព្រោះក្រែងដល់ទៅចុងខែមេសា និងដើមខែឧសភា មានភាពរាំងស្ងួត អាចបង្កឱ្យខូចផលដំណាំ ដូចនេះបងប្អូនជនជាតិមិនទាន់ហ៊ាននាំគ្នាចេញទៅធ្វើអ្វីទេ ។
លោកបន្តថា តាមទម្លាប់នៅខែមិថុនា ឬខែកក្កដា ទើបមានភ្លៀងធ្លាក់ ហើយបងប្អូនជនជាតិយើងរៀបចំទៅធ្វើស្រែចំការតាមទម្លាប់ តែឆ្នាំនេះមានភ្លៀងធ្លាក់ខ្លាំងលិចចូលក្រោមផ្ទះ និងបង្កភាពលំបាកដល់សត្វចិញ្ចឹម និងផលដំណាំដាំដុះបន្លែបង្កមួយចំនួនត្រូវរលួយខូចផងដែរ ។
លោកប៉ែន វិបុល សមាជិកឃុំក្បាលរមាសបានទទួលស្គាល់ថា នៅខេត្តស្ទឹងត្រែងយើងមានភ្លៀងទៅតាមតំបន់ និងកន្លែងខ្លះភ្លៀងខ្លាំង និងខ្លះទៀត មានតិចតួចតែប៉ុណ្ណោះដែលអំណោយផលទៅលើដំណាំផ្សេងៗ ។ លោកបន្តថា ស្ថិតក្នុងស្ថានភាពបែបនេះ ចូរបងប្អូនពុកម៉ែយើងទាំងអស់ ត្រូវលើកកម្ពស់ប្រុងប្រយ័ត្នហាមប្រាមកូនចៅ កុំឱ្យចុះលេងទឹកដើម្បីបញ្ចៀសនៅការគ្រោះថ្នាក់ផ្សេងៗ ដូចជាលង់ទឹក ឬមានផ្គររន្ទះជាដើម ។
សូមបញ្ជាក់ថា ភ្លៀងធ្លាក់មួយយប់មួយថ្ងៃនេះ នៅស្រុកសេសាន បង្កផលប៉ះពាល់ភូមិក្បាលរមាស និងភូមិស្រែប្រណូកថ្មី ដែលមានប្រជាពលរដ្ឋរស់នៅប្រមាណជាង៥០០គ្រួសារ តែមិនមានសភាពធ្ងន់ធ្ងរទេ អាចក្នុងរយពេល២ឬ៣ថ្ងៃទឹកស្រកផុតទៅវិញបាន ។
ចែករំលែកព័តមាននេះ