«រ៉យទ័រ» ផ្សាយថា ប្រទេសថៃ និងម៉ាឡេស៊ី ត្រៀមពិភាក្សាពីគម្រោងសង់កំផែងតាមព្រំដែនរបស់ប្រទេសទាំង២ ដើម្បីទប់ស្កាត់ការជួញដូរមនុស្ស និងដឹកជញ្ជូនទំនិញខុសច្បាប់ ។ គម្រោងនោះកើតមាននៅមុនពេលលោក Najib Razak នាយករដ្ឋមន្ដ្រីម៉ាឡេស៊ី ធ្វើដំណើរទៅទស្សនកិច្ចប្រទេសថៃ ដើម្បីពិភាក្សាជាមួយលោកប្រាយុទ្ធ ចាន់អូចា នាយករដ្ឋមន្ដ្រីថៃ កាលពីថ្ងៃទី៩ ខែកញ្ញា ឆ្នាំ២០១៦ ។
ប្រភពដដែលចុះផ្សាយដោយយោងតាមសម្ដីរបស់លោកឈីនាវុធ សេតាវ៉ាត់ អ្នកនាំពាក្យក្រសួងការបរទេសថៃ ដែលបង្ហើបឱ្យដឹងនៅក្នុងកិច្ចប្រជុំកំពូលមេដឹកនាំអាស៊ាន នៅក្រុងវៀងចន្ទន៍របស់ឡាវថា យុទ្ធសាស្ដ្រនៃការបង្កើតកំផែងនឹងស្ថិតក្រោមកិច្ចពិភាក្សាក្នុងអំឡុងពេលធ្វើទស្សនកិច្ចនៅប្រទេសថៃរបស់លោក Najib ប៉ុន្ដែមិនមែនជាបញ្ហាចម្បងនៅក្នុងកិច្ចពិភាក្សាទេ ។
«រ៉យទ័រ» ចុះផ្សាយដោយយោងតាមការយល់ឃើញរបស់លោក Srisompop Jitpiromsri នាយកមជ្ឈមណ្ឌលឃ្លាំមើលស្ថានការណ៍នៅភាគខាងត្បូងថៃថា មាន២ករណីដែលជម្រុញចំណាប់អារម្មណ៍ដល់ម៉ាឡេសុី និងថៃ ទាក់ទងនឹងការសាងសង់កំផែងនៅបរិវេណព្រំដែន ។ លោកបញ្ជាក់ថា «ករណីដំបូងគឺការបញ្ចប់លំហូរចូលនៃទំនិញខុសច្បាប់ រួមមាន ប្រេង ថ្នាំញៀន ឬការជួញដូរមនុស្ស ។ ទី២ គឺក្រុមបង្កភាពចលាចលដែលធ្វើសកម្មភាពនៅក្នុងប្រទេសថៃ រមែងឆ្លងដែនចូលទៅម៉ាឡេសុី ដើម្បីប្រើជាមូលដ្ឋានសុវត្ថិភាព» ។
«រ៉យទ័រ» បន្ដទៀតថា ការជួញដូរមនុស្ស និងលួចនាំចូលគ្រឿងញៀន រួមទាំងអាវុធខុសច្បាប់ គឺជាឧក្រិដកម្ម ដែលកើតឡើងជាប្រចាំនៅតាមព្រំដែនរបស់ប្រទេសទាំងពីរ ដែលមានប្រវែង៦៤០គីឡូម៉ែត្រ ។
ដំណើរទស្សនកិច្ចរបស់លោក Najib នឹងសង្កត់ធ្ងន់លើកិច្ចសហប្រតិបត្ដិការផ្នែកសន្ដិសុខ និងការវិនិយោគជាចម្បង ។ ដំណើរទស្សនកិច្ចរបស់លោក Najib ក្រោយពីកើតហេតុការណ៍ផ្ទុះដ៏ធំចំនួន៣លើកក្នុងអំឡុងខែសីហា រួមទាំងហេតុការណ៍ផ្ទុះបន្ដគ្នានៅក្រុងទេសចរណ៍នៅភាគខាងត្បូងថៃ ៕
ចែករំលែកព័តមាននេះ