ខេត្តមណ្ឌលគិរី ៖ លោកយាយលោកតាពីរនាក់ប្តី-ប្រពន្ធ ដែលរស់នៅឆ្ងាយដាច់ពីគេ ក្នុងភូមិអូរអាម ឃុំស្រែខ្ទុម ស្រុកកែវសីមា ខេត្តមណ្ឌលគិរី ត្រូវបានសប្បុរសជនម្នាក់យកអំណោយជូនពួកគាត់ កាលពីពេលថ្មីៗនេះ ។
អ្នកស្រីប៉ែន ស្រីលីន និងស្វាមី ព្រមទាំងក្រុមគ្រួសារ ជាម្ចាស់អំណោយបាននិយាថា ដោយឃើញស្ថានភាព និងការរស់នៅរបស់លោកតាលោកយាយ កំពុងមានការលំបាកខ្លាំង ដោយពួកគាត់មិនមានកូនចៅនឹងគេទេ ទើបអ្នកស្រីព្រមទាំងក្រុមគ្រួសារ បាននាំអំណោយបន្តិចបន្តួចជូនគាត់ គ្រាន់បានដោះស្រាយក្នុងការរស់នៅប្រចាំថ្ងៃរបស់ពួកគាត់បានមួយរយៈ ។
អ្នកស្រីលីនបានបន្តថា គាត់បានយកអង្ករចំនួន៥០គីឡូក្រាម, មី១កេស, ទឹកត្រី២យួរ, ទឹកស៊ីអ៊ីវ២យួរ, ទឹកសុទ្ធ ព្រមទាំងប្រាក់ចំនួន២០ម៉ឺនរៀល ។
លោកម៉ៅ សាវឿន ប្រជាការពារភូមិអូរអាមបាននិយាយថា យាយតាខាងលើ មានឈ្មោះឃឹម ចាន់ អាយុ៧០ឆ្នាំ និងលោកយាយ ជួន នាង អាយុ៧១ឆ្នាំ រស់នៅភូមិអូរអាម ឃុំស្រែខ្ទុមស្រុកកែវសីមា ពួកគាត់មិនមានកូនចៅរស់នៅជាមួយទេ ។ ពួកគាត់បានមកធ្វើខ្ទមនៅឆ្ងាយពីគេ ជិតកន្លែងកប់ខ្មោច២ ទៅ៣ឆ្នាំមកហើយ ព្រោះគាត់អត់មានដីធ្លីនៅជិតភូមិទេ ហើយដីដែលគាត់ធ្វើផ្ទះនៅសព្វថ្ងៃ គឺឃុំបានឱ្យគាត់នៅ ចំណែកខ្ទមរបស់ពួកគាត់ស្នាក់នៅ គឺអ្នកស្រុកជួយធ្វើឱ្យគាត់ ។
ចែករំលែកព័តមាននេះ