រាជធានីភ្នំពេញ ៖ តំបន់សេដ្ឋកិច្ចពិសេសភ្នំពេញ (Phnom Penh SEZ) ទើបតែបានបង្ហាញពីប្រាក់ចំណេញរបស់ខ្លួនក្នុងឆ្នាំ២០១៥កន្លងមក ដោយសារតែក្រុមហ៊ុនមួយនេះមានភាពមមាញឹកក្នុងការបោះផ្សារភាគហ៊ុននៅក្នុងផ្សារមូលបត្រកម្ពុជា ។
ក្នុងកិច្ចប្រជុំថ្នាក់ដឹកនាំកំពូលរបស់ក្រុមហ៊ុនតំបន់សេដ្ឋកិច្ចពិសេសកាលពីពេលថ្មីៗ តំបន់សេដ្ឋកិច្ចបានបង្ហាញថា ប្រាក់ចំណេញសុទ្ធរបស់ខ្លួនមានប្រមាណ៤,១លានដុល្លារអាមេរិក បើទោះបីជានៅរយៈពេលប៉ុន្មានឆ្នាំចុងក្រោយនេះ ស្ថានភាពសេដ្ឋកិច្ចពិភពលោកមានភាពប្រែប្រួល និងប៉ះពាល់ដល់សេដ្ឋកិច្ចកម្ពុជាក្ដី ។
លោក ហ្វុង នីវ៉ាយ នាយកផ្នែកហិរញ្ញវត្ថុរបស់តំបន់សេដ្ឋកិច្ចពិសេសភ្នំពេញ បានឱ្យដឹងថា បើទោះបីជាសេដ្ឋកិច្ចពិភពលោកធ្លាក់ចុះនៅឆ្នាំចុងក្រោយនេះ ក៏ស្ថានភាពហិរញ្ញវត្ថុរបស់សួនឧស្សាហកម្មនៅតែមានភាពរឹងមាំ ។ លោកថា ៖ « ប្រាក់ចំណេញសុទ្ធរបស់យើងសម្រាប់ឆ្នាំ២០១៥ គឺប្រហែល៤,១លានដុល្លារអាមេរិក ដែលជាលទ្ធផលល្អ បន្ទាប់ពីការរួមចំណែកពន្ធអាមេរិក ។ យើងគិតថា វិនិយោគិនរបស់យើងអាចមានការពេញចិត្ត ។ ម្យ៉ាងទៀត ថ្វីដ្បិតតែយើងនៅមានភាពវ័យក្មេងក្នុងបញ្ជីក្រុមហ៊ុនដែលឡើងផ្សារមូលបត្រក្តី ប៉ុន្តែគ្រឹះ១០ឆ្នាំរបស់យើងនឹងធ្វើឱ្យកាន់តែខ្លាំង » ។
លោកជំទាវឧកញ៉ា លីម ឈីវហួរ អគ្គនាយិកាក្រុមហ៊ុនភ្នំពេញ អេសអីុហ្សិត ភីអិលស៊ី បានមានប្រសាសន៍នៅក្នុងការបើកកិច្ចប្រជុំថា ៖ « កាលពីឆ្នាំមុន យើងបានឃើញពីបំរែបំរួលនៅក្នុងសេដ្ឋកិច្ចពិភពលោក ដែលធ្វើឲ្យកំណើនសេដ្ឋកិច្ចរបស់ចិនបានធ្លាក់ចុះជាបណ្តើរទៅវិញ។ ម្យ៉ាងទៀត ដោយសារកំណែទម្រង់រចនាសម្ព័ន្ធ ការឆ្ពោះទៅរកការប្រើប្រាស់ដែលមានមូលដ្ឋាននៅក្នុងស្រុក និងផលប៉ះពាល់នៃការធ្លាក់ចុះនេះ ត្រូវបានគេមើលឃើញនៅក្នុងតំបន់ជាច្រើននៃពិភពលោក ជាពិសេស នៅក្នុងតំបន់អាស៊ីខាងកើត និងនៅក្នុងប្រទេសកម្ពុជាផងដែរ។ សួនឧស្សាហកម្មមួយចំនួននៅទូទាំងតំបន់ ត្រូវបានរងផលប៉ះពាល់ដោយការធ្លាក់ចុះនេះ ប៉ុន្តែក្រុមហ៊ុនរបស់យើងបានបង្ហាញនូវសមត្ថភាពដ៏ឈ្លាសវៃក្នុងការដោះស្រាយជាមួយបញ្ហាទាំងអស់ » ។
លោកនាយកប្រតិបត្តិនៃតំបន់សេដ្ឋកិច្ចពិសេសភ្នំពេញឱ្យដឹងថា ក្រុមហ៊ុនបានចំណាយពេលវេលា និងថាមពលដើម្បីសម្រេចបាននូវយុទ្ធនាការចេញ IPO ក្នុងគោលបំណងចុះបញ្ជីនៅលើផ្សារមូលបត្រកម្ពុជា ។ ក្នុងអំឡុងពេលនោះ ជាពេលដែលសេដ្ឋកិច្ចមានការធ្លាក់ចុះ និងមានក្រុមហ៊ុនបរទេសតែប្រាំប៉ុណ្ណោះដែលបានទិញដីនៅក្នុងតំបន់សេដ្ឋកិច្ចពិសេស ដើម្បីសាងសង់រោងចក្រនៅក្នុងឆមាសទី១ ឆ្នាំ២០១៥។ លោកថា ៖ « យើងកំពុងបង្កើនយុទ្ធនាការរបស់យើងដើម្បីទាក់ទាញវិនិយោគិនមកពីប្រទេសនៅក្នុងតំបន់អាស៊ី អឺរ៉ុប និងអាមេរិក ។ យើងចង់ធ្វើឲ្យការផ្តល់ជូនរបស់យើងមានភាពទូលំទូលាយ ដោយការផ្តល់សេវាការងារសាងសង់ដោយផ្ទាល់ បង្កើនការផ្តល់ជូនជួលរោងចក្រ និងការពង្រីកឧបករណ៍ប្រើប្រាស់ផ្សេងទៀតដើម្បីផ្តល់ជាសេវាសម្រាប់វិនិយោគិនរបស់យើង ។ នៅឆ្នាំ២០២០ យើងមានទិសដៅបង្កើនការលក់ដីដែលមិនទាន់មានគម្រោងបង្កើនប្រាក់ចំណូលឱ្យបាន៥០% » ។
លោកបន្ថែមថា សម្រាប់ឆ្នាំខាងមុខនេះ ក្រុមហ៊ុនបានផ្តោតអារម្មណ៍លើគម្រោងតំបន់សេដ្ឋកិច្ចពិសេសថ្មីរបស់ខ្លួននៅប៉ោយប៉ែត គឺតំបន់សេដ្ឋកិច្ចពិសេសភ្នំពេញ ប៉ោយប៉ែត។ លោកនិយាយថា ៖ « ប៉ោយប៉ែតមានទីតាំងនៅមិនឆ្ងាយពីទីក្រុងបាងកក ប្រទេសថៃប៉ុន្មានទេ គឺធ្វើដំណើរតែជាង២ម៉ោងប៉ុណ្ណោះ ហើយប៉ោយប៉ែត ត្រូវបានមើលឃើញពីកំណើននៃសកម្មភាពអាជីវកម្មនៅក្នុងប៉ុន្មានឆ្នាំចុងក្រោយនេះ ។ ទីតាំងនេះ ជាយុទ្ធសាស្ត្រដ៏ល្អ រួមផ្សំជាមួយនឹងធនធានមនុស្ស និងការចំណាយសមរម្យ, ការចំណាយលើថាមពល និងហេដ្ឋារចនាសម្ព័ន្ធដែលអាចទុកចិត្តបានក្នុងកម្រិតតិចតួច បានធ្វើឱ្យតំបន់នេះក្លាយជាចំណុចក្តៅក្នុងអាស៊ានអន្តរលំហូរពាណិជ្ជកម្ម ហើយធ្វើឲ្យប៉ោយប៉ែតក្លាយជាទីតាំងយុទ្ធសាស្ត្រសម្រាប់ការអភិវឌ្ឍសួនឧស្សាហកម្ម » ៕
ចែករំលែកព័តមាននេះ