រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ប្ដីប្រពន្ធ១គូ ក្រោយពីធ្វើការអស់កម្លាំង ក៏ហូបបាយល្ងាច រួចក៏បាននាំគ្នាចូលគេងនៅក្នុងបន្ទប់ជួលជាមួយគ្នា បន្ទាប់ក៏លង់លក់រៀងៗខ្លួនទៅ។ លុះព្រឹកឡើង បុរសជាប្ដីក្រោកពីដេកមុន រួចបានដាស់ឲ្យប្រពន្ធក្រោកទៅងូតទឹក ដើម្បីរៀបចំខ្លួនទៅធ្វើការ តែប្រពន្ធអត់ឆ្លើយ ហើយអត់ព្រមក្រោកសោះ ។ ពេលនោះ បុរសជាប្ដីបានចាប់អង្រួន ទើបដឹងថា ប្រពន្ធខ្លួនបាត់ស្លា.ប់បាត់ទៅហើយ ដោយពុំដឹងថា ស្លា.ប់តាំងពីពេលណាឡើយ។ ហេតុការណ៍នេះ បានបង្កឲ្យមានការភ្ញាក់ផ្អើលកាលពីវេលាម៉ោង៦ព្រឹក ថ្ងៃទី០១ ខែមេសា ឆ្នាំ២០២២ នៅក្នុងបន្ទប់លេខB៧ ជាន់ទី២ ផ្ទះជួល ស្ថិតក្នុងភូមិត្រពាំងពោធិ៍ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
សេចក្តីរាយការណ៍បន្តថា ស្ត្រីដែលស្លា.ប់ខាងលើមានឈ្មោះ សុត រ៉ា អាយុ២៧ឆ្នាំ មុខរបរកម្មការិនីរោងចក្រ មានប្ដីឈ្មោះ ខៃ លីឃុន អាយុ២៨ឆ្នាំ មុខរបកម្មករសំណង់ អ្នកទាំង២មានកូនម្នាក់ មានទីលំនៅអចិន្ត្រៃយ៍ក្នុងភូមិក្រសាំង ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ ។
បើតាមបុរសជាប្ដីបានប្រាប់ឲ្យនគរបាលដឹងថា ប្រពន្ធគាត់មានជំងឺបេះដូងជាង១ឆ្នាំមកហើយ មិនតែប៉ុណ្ណោះកាលពីពេលថ្មីនេះ ជំងឺឧស្សាហ៍រើឡើងធ្វើទុក្ខជាញឹកញាប់ ដោយមានអាការៈដកដង្ហើមអត់ចង់ដល់គ្នាឡើយ។ ប៉ុន្តែដោយសារតែជីវភាពខ្វះខាត ទើបពុំបានទៅព្យាបាលឲ្យបានដិតដល់នោះទេ ម្យ៉ាងទៀតបើទោះបីជាមានជំងឺជាប់ខ្លួនបែបនេះក្ដី ក៏ប្រពន្ធគាត់បានបន្តទៅធ្វើការងារជាធម្មតាដែរ មិនដែលឈប់សម្រាកនោះទេ។
លោកខៃ លីឃុន បានបញ្ជាក់ប្រាប់ឲ្យដឹងបន្ថែមទៀតថា ដោយឡែកនៅវេលាល្ងាចថ្ងៃទី៣១ ខែមីនា ឆ្នាំ២០២២ ក្រោយពេលត្រឡប់មកពីធ្វើការវិញ គាត់និងប្រពន្ធបានហូបបាយជុំគ្នាដូចសព្វមួយដងដែរ។ បន្ទាប់មកទើបចូលគេងជាធម្មតា ហើយដោយសារតែធ្វើការពីថ្ងៃអស់កម្លាំងផងនោះ គាត់ក៏បានដេកលក់ទៅ លុះដល់វេលាព្រឹកថ្ងៃកើតហេតុ គឺថ្ងៃទី១ ខែមេសានេះ គាត់បានក្រោកមុន ហើយដាស់ឲ្យប្រពន្ធក្រោកទៅងូតទឹករៀបចំខ្លួនទៅធ្វើការ តែប្រពន្ធអត់ឆ្លើយ ហើយអត់ព្រមក្រោកសោះ ពេលនោះគាត់ជាប្ដីបានចាប់អង្រួន ទើបដឹងថា ប្រពន្ធស្លា.ប់បាត់ទៅហើយ។
បុរសកូន១រូបនេះបានរៀបរាប់ប្រាប់ទៀតថា គាត់អត់បានដឹងថា តើប្រពន្ធស្លា.ប់តាំងពីពេលណានោះទេ? ហើយខណៈនោះ គាត់មានអារម្មណ៍តក់ស្លុតខ្លាំងណាស់ និងបានស្រែកហៅឲ្យអ្នកជិតខាងឱ្យមកជួយមើល។ ពេលនោះក៏បានបង្កឲ្យមានការភ្ញាក់ផ្អើលទាំងព្រឹក បន្ទាប់មក គាត់ក៏បានរាយការណ៍ជូននគរបាលប៉ុស្តិ៍ចោមចៅទី៣ ឲ្យចុះទៅពិនិត្យមើលជាក់ស្ដែង។
បើតាមនគរបាលក៏បានប្រាប់ដែរថា ក្រោយពីទទួលបានដំណឹងថា មានអ្នកស្លា.ប់នៅក្នុងបន្ទប់ជួលខាងលើ កម្លាំងក៏បានចុះទៅភ្លាមៗ និងបានរាយការណ៍បន្តជូនទៅថ្នាក់លើ ព្រមទាំងធ្វើកំណត់ហេតុផ្សេងៗ ។ ហើយដោយសារតែបុរសជាប្ដី ក៏ដូចជា ក្រុមគ្រួសារសាច់ញាតិពុំមានការប្ដឹងផ្ដល់នោះ ទើបសមត្ថកិច្ចប្រគល់ស.ពស្ត្រីរងគ្រោះឲ្យយកទៅធ្វើបុណ្យតាមប្រពៃណីនៅឯស្រុកកំណើត៕
ចែករំលែកព័តមាននេះ