ក្រុមហ៊ុន Apple នឹងចេញលក់ iPhone 7 ជាផ្លូវការតាមហាង Apple នាថ្ងៃសុក្រសប្ដាហ៍នេះ នៅក្នុងប្រទេសមួយចំនួន រីឯនៅអាមេរិក និងអាល្លឺម៉ង់វិញ មានមនុស្សរងចាំទិញរួចទៅហើយ ដោយពួកគេបង្កើតជំរំជាជួរនៅខាងក្រៅហាង នៅលើមហាវិថី នាទីក្រុងប៊ែកឡាំង និងញូវយ៉ក ។
ក្នុងចំណោមអ្នកបោះតង់ ដេកចាំទិញទាំងនោះ មានអ្នកខ្លះជាអ្នកស្វែងរកកម្រៃ ដោយពួកគេជាអ្នកស៊ីឈ្នួលតម្រង់ជួរជំនួសអ្នកដទៃដើម្បីទិញទូរស័ព្ទ iPhone 7 ។
ទិដ្ឋភាពនៅកន្លែងតម្រង់ជួរតាមបន្ទាត់លេខរៀង រហូតចុងបញ្ចប់នៃជួរ នៅក្នុងទីក្រុងញូវយ៉ក បានបង្ហាញថា អ្នកចង់បានសម្រាប់កន្លែងទី១៣ ត្រូវចំណាយប្រាក់ ៣០០ដុល្លារអាមេរិក រួមនឹងកៅអីអង្គុយរងចាំមួយ ។ ចុះសម្រាប់កន្លែងលេខរៀងទី១ដល់ទី១០វិញ តើមានតម្លៃប៉ុន្មាន? ប្រាកដជាថ្លៃហើយ ជាក់ស្តែងនៅព្រឹកថ្ងៃទី១២ កញ្ញា អ្នកស៊ីឈ្នួលម្នាក់អង្គុយនៅលេខរៀងទី១១នៃជួរបន្ទាត់បានឱ្យដឹងថា «បើចង់បានកន្លែងគាត់ ត្រូវចំណាយ៣.០០០ដុល្លារ» គាត់បញ្ជាក់យ៉ាងខ្លីថា «នេះវាជាការងាររបស់ខ្ញុំ!» ៕
ចែករំលែកព័តមាននេះ