ខេត្តកែប ៖ បើទោះជាក្រសួងធនធានទឹក និងឧតុនិយម បានចេញសេចក្តីជូនដំណឹងដល់សាធារណជន អំពីការប្រែប្រួលអាកាសធាតុក្តី ក៏ភ្ញៀវទេសចរនៅតែទៅកម្សាន្តឆ្នេរកែប ហាក់នៅមានចំនួនច្រើន គួរឱ្យកត់សម្គាល់ ។
លោកកែន សត្ថា អភិបាលខេត្តកែប បានប្រាប់តាមទូរស័ព្ទថា ភ្ញៀវទេសចរដែលមកកម្សាន្តនៅតំបន់ឆ្នេរកែប ហាក់មិនមានចំនួនច្រើនដូចខែមុនៗនោះទេ។ លោកបន្តថា កាលពីខែកក្កដា និងសីហាកន្លងទៅ ភ្ញៀវទេសចរក្នុងស្រុក និងក្រៅស្រុក មានចំនួនជាង៤ម៉ឺននាក់ ក្នុងមួយខែៗ ដោយឡែកក្នុងពាក់កណ្តាលខែកញ្ញានេះ ភ្ញៀវទេសចរខ្មែរ និងបរទេស នៅតែមានចំនួនប្រហាក់ប្រហែលនឹងខែមុនដែរ ។
លោកបៀន ស៑ុនហេង អ្នករស់នៅស្រុកគងពិសី ខេត្តកំពង់ស្ពឺ ដែលបាននាំក្រុមគ្រួសារទៅកម្សាន្ត នៅឆ្នេរកែបឱ្យដឹងថា លោកបានសម្រេចនាំគ្រួសារ មកកម្សាន្តនៅឆ្នេរកែបនេះ ព្រោះតែយល់ថា នៅទីនេះងាយស្រួល ក្នុងការទិញម្ហូបគ្រឿងសមុទ្រឱ្យកូនៗរបស់លោកញ៉ាំ ។
ម្យ៉ាងម្ហូប ក៏មានតម្លៃធូរថ្លៃជាងនៅកន្លែងផ្សេង ហើយមិនសូវចំណាយថ្លៃសាំងទៀតផង ព្រោះតែចំងាយពីផ្លូវស្រុកគងពិសី មកខេត្តកែបនេះ មិនសូវឆ្ងាយនោះទេ ។
ចែករំលែកព័តមាននេះ