រាជធានីភ្នំពេញ ៖ កាលពីរសៀលថ្ងៃទី០៩ ខែកញ្ញា ឆ្នាំ២០១៦ លោក ប៉ា សុជាតិវង្ស អភិបាលរាជធានីភ្នំពេញ និងលោកជំទាវ ព្រមទាំងមន្ត្រីរដ្ឋបាលរាជធានី មន្ត្រីសង្ឃ ពុទ្ឋបរិស័ទ
រាជធានីភ្នំពេញ ៖ កាលពីរសៀលថ្ងៃទី០៩ ខែកញ្ញា ឆ្នាំ២០១៦ លោក ប៉ា សុជាតិវង្ស អភិបាលរាជធានីភ្នំពេញ និងលោកជំទាវ ព្រមទាំងមន្ត្រីរដ្ឋបាលរាជធានី មន្ត្រីសង្ឃ ពុទ្ឋបរិស័ទ អាជ្ញាធរទូទាំងខណ្ឌច្បារអំពៅ និងពុទ្ធបរិស័ទជិតឆ្ងាយ បានធ្វើពិធីស្រោចស្រពព្រះសុគន្ធវារី និងប្រកាសតែងតាំងព្រះគ្រូចៅអធិការវត្តនិរោធរង្សី ព្រះអគ្គញាណ ស្រេង សុខា និងគ្រូសូត្រស្តាំ ឆ្វេងផងដែរ។
លោក ប៉ា សុជាតិវង្ស អភិបាលរាជធានីភ្នំពេញ បានមានប្រសាសន៍ថា ការប្រកាសតែងតាំង ព្រះអគ្គញាណ ស្រេង សុខា ជាព្រះចៅអធិការវត្តនិរោធរង្សី នាពេលនេះ គឺបានបង្ហាញឲ្យឃើញពីការរួបរួមសាមគ្គី ឯកភាព ទាំងពុទ្ធចក្រ ទាំងអាណាចក្រ បង្កើតបានជាកម្លាំងសរុបមួយដ៏ធំធេងក្នុងចំណោមពុទ្ធបរិស័ទ ប្រជាពលរដ្ឋឈានទៅរួមគ្នាថែរក្សាការពារ លើកកម្ពស់គុណតម្លៃព្រះពុទ្ធសាសនា និងរួមចំណែកការអភិវឌ្ឍន៍ប្រទេសជាតិ។
លោកបន្តថា យើងទាំងអស់គ្នាពិតជាដឹងច្បាស់ថា ព្រះពុទ្ធសាសនា គឺជាសាសនាដែលបានដើរតួយ៉ាងសំខាន់នៅក្នុងសង្គមរបស់យើងជាយូរលង់ណាស់មកហើយ ព្រះពុទ្ធសាសនាបានប្រមូលផ្ដុំបាននូវកម្លាំងប្រកបដោយសីលធម៌ល្អ ផ្តល់ឲ្យសង្គមទាំងមូល និងបានដិតជាប់ក្នុងផ្នត់គំនិតរបស់ប្រជាពលរដ្ឋខ្មែរតរៀងមក ហើយព្រះពុទ្ធសាសនា មានការរីកចម្រើន ឬធ្លាក់ចុះទៅតាមសភាពការណ៍នៃប្រទេសជាតិ។ លោក អ៊ាង ស៊ីផាន អភិបាលខណ្ឌច្បារអំពៅបានថ្លែងថា ខណ្ឌច្បារអំពៅ មាន២៤វត្ត ក្នុងនោះគណៈមហានិកាយចំនួន២២វត្ត និងគណៈធម្មយុត្តិកនិកាយចំនួន២វត្ត ព្រះសង្ឃសរុប១២៤១អង្គ។
ដោយឡែក វត្តនិរោធរង្សី មានព្រះសង្ឃសរុបចំនួន ៨៨អង្គ គណៈកម្មការវត្ត អាចារ្យវត្ត១៩នាក់ សីលវ័ន្ត សីលវត្តី៦នាក់ សិស្ស និស្សិត ស្នាក់នៅចំនួន១០នាក់។ លោកបន្តថា ព្រះសង្ឃ និងប្រជាពុទ្ធបរិស័ទ ក្នុងខណ្ឌច្បារអំពៅ បានបំពេញតួនាទីយ៉ាងសកម្មក្នុងការលើកស្ទួយកិត្តិយសព្រះពុទ្ធសាសនា ឲ្យកាន់តែមានភាពថ្លៃថ្នូរុងរឿង ដោយការគោរពប្រតិបត្តិតាមព្រះពុទ្ធឱវាទផងដែរ ៕
ចែករំលែកព័តមាននេះ