ខេត្តកោះកុង ៖ គណៈប្រតិភូមកពីវិទ្យាស្ថានជាតិពហុបច្ចេកទេសកម្ពុជាចំនួន១៩នាក់ ដឹកនាំដោយនាយកវិទ្យាស្ថានលោក ប៊ុន ភារុន បានអញ្ចើញទស្សនកិច្ចរោងចក្រដំឡើងរថយន្ដហ៊ីយិនដាយ
ខេត្តកោះកុង ៖ គណៈប្រតិភូមកពីវិទ្យាស្ថានជាតិពហុបច្ចេកទេសកម្ពុជាចំនួន១៩នាក់ ដឹកនាំដោយនាយកវិទ្យាស្ថានលោក ប៊ុន ភារុន បានអញ្ចើញទស្សនកិច្ចរោងចក្រដំឡើងរថយន្ដហ៊ីយិនដាយ និងសាលាបង្រៀនជំនាញបច្ចេកទេសរថយន្ដ នៅក្នុងតំបន់សេដ្ឋកិច្ចពិសេសខេត្តកោះកុង ដើម្បីផ្ដល់លិខិតថ្លែងអំណរគុណដែលចុះហត្ថលេខាដោយលោកបណ្ឌិត ពេជ សោភ័ណ រដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ និងជាប្រធានក្រុមប្រឹក្សាភិបាលនៃវិទ្យាស្ថានជាតិពហុបច្ចេកទេសកម្ពុជា ជូនដល់តំណាងក្រុមហ៊ុនហ៊ីយិនដាយ ខេមកូ ម៉ូធ័រ កាលពីថ្ងៃទី០៩ ខែកញ្ញា ឆ្នាំ២០១៦ ដោយមានការទទួលយ៉ាងកក់ក្ដៅពីសំណាក់គណៈគ្រប់គ្រង និងបុគ្គលិក ហ៊ីយិនដាយខេមកូម៉ូធ័រ។
លោក ប៊ុន ភារុណ នាយកវិទ្យាស្ថានពហុបច្ចេកទេសកម្ពុជា បានមានប្រសាសន៍កោតសរសើរដល់ក្រុមហ៊ុនហ៊ីយិនដាយខេមកូម៉ូធ័រ ដែលបានដំណើរការអាជីវកម្មលក់រថយន្ដម៉ាកហ៊ីយិនដាយ ប្រកបដោយជោគជ័យនៅលើទីផ្សារកម្ពុជា និងបានថ្លែងអំណរគុណដល់ក្រុមហ៊ុនហ៊ីយិនដាយ ខេមកូ ម៉ូធ័រ ដែលបានរួមចំណែកជួយដល់សង្គមកម្ពុជាតាមរយៈការបង្កើតមជ្ឈមណ្ឌល Hyundai Dream Center នៅក្នុងវិទ្យាស្ថាន និងសាលា Hyundai Camko Dream School នៅក្នុងរោងចក្រ ដោយបំពាក់នូវឧបករណ៍ទំនើបៗ ដើម្បីសហប្រតិបត្តិការបណ្ដុះបណ្ដាលនិស្សិតបច្ចេកទេសនូវជំនាញខាងផ្នែកបច្ចេកទេសរថយន្ដយ៉ាងច្បាស់លាស់ និងថែមទាំងផ្ដល់ការងារដល់និស្សិត ដែលបានបញ្ចប់ការសិក្សាពីវិទ្យាស្ថានជាតិពហុបច្ចេកទេសកម្ពុជាកន្លងមកទៀតផង។
កិច្ចសហប្រតិបត្តិការនេះ បានជួយបង្កើនសមត្ថភាពសិស្សដែលរៀននៅក្នុងវិទ្យាស្ថាន NPIC នូវជំនាញផ្នែកជួសជុលរថយន្តបានកាន់តែខ្លាំង និងជួយពួកគេឱ្យមានជំនាញច្បាស់លាស់ពិតប្រាកដ ដែលបណ្តុះបណ្តាលដោយគ្រូមានបទពិសោធន៍ រួមជាមួយនឹងការអនុវត្តជាក់ស្តែងតែម្តង។
គួរបញ្ជាក់ថា ក្រុមហ៊ុនហ៊ីយិនដាយខេមកូម៉ូធ័រ បានចុះអនុស្សរណៈយោគយល់គ្នាជាមួយវិទ្យាស្ថានជាតិពហុបច្ចេកទេសកម្ពុជា (Hyundai – NPIC) នៅថ្ងៃទី១១ ខែកញ្ញា ឆ្នាំ២០១៦ ដើម្បី ពង្រឹងទំនាក់ទំនងរវាង ក្រុមហ៊ុនហ៊ីយិនដាយ ខេមកូម៉ូទ័រ និងវិទ្យាស្ថានជាតិពហុបច្ចេកទេសកម្ពុជា (NPIC) ឲ្យកាន់តែប្រសើរឡើង និងដំណើរការទៅដោយរលូនក្នុងការរួមចំណែកអភិវឌ្ឍន៍ធនធានមនុស្សផ្នែកបចេ្ចកទេសរថយន្ដនៅកម្ពុជាឲ្យកាន់តែមានប្រសិទ្ធភាពខ្ពស់ ។
ចែករំលែកព័តមាននេះ