រថយន្តឡិចស៊ីស RX.400h បានបុករថយន្តឡិចស៊ីស RX.300 ពេញទំហឹង បណ្តាលឱ្យខូចខាតធ្ងន់ ហើយបានទទួលស្គាល់កំហុសបាន ព្រមបង់លុយជាង៧.០០០ដុល្លារហើយយកឡានដែលខូចតែម្តង ដើម្បីបញ្ចប់រឿង
ខេត្តបន្ទាយមានជ័យ ៖ រថយន្តឡិចស៊ីស RX.400h បានបុករថយន្តឡិចស៊ីស RX.300 ពេញទំហឹង បណ្តាលឱ្យខូចខាតធ្ងន់ ហើយបានទទួលស្គាល់កំហុសបាន ព្រមបង់លុយជាង៧.០០០ដុល្លារហើយយកឡានដែលខូចតែម្តង ដើម្បីបញ្ចប់រឿង ។ ហេតុការណ៍បុកគ្នានេះបានកើតឡើងនៅព្រឹកថ្ងៃទី២៧ ខែមីនា ឆ្នាំ២០២២តាមដងផ្លូវជាតិលេខ៥ ចំណុចសាលាអុិនតាំព្រំប្រទល់ស្រុកអូរជ្រៅ និងក្រុងសិរីសោភ័ណ ។
អ្នកឃើញហេតុការណ៍បានប្រាប់ថា រថយន្តឡិចស៊ីស RX.300 ពាក់ផ្លាកលេខភ្នំពេញ2A.5455 បានដឹកកេសទំនិញពេញផ្នែកខាងក្រោយ ដោយបើកបរតាមបណ្តោយផ្លូវជាតិលេខ៥ ក្នុងទិសដៅពីលិចទៅកើតក្នុងល្បឿនលឿនហើយក៏មានរថយន្តឡិចស៊ីសRX.400h ពាក់ផ្លាកលេខភ្នំពេញ2AQ.8272 បានបើកបរបញ្ជ្រាសទិសគ្នាពីកើតមកលិចហើយបានឡើងវ៉ារថយន្ត១គ្រឿងទៀត ដែលបើកស្របទិសគ្នាពីមុខទើបបានជ្រុលទៅបុកពេញទំហឹង រថយន្តឡិចស៊ីសRX.300 បណ្តាលឱ្យបែកកង់ខាងស្តាំទាំង២នៅលើទ្រូងផ្លូវខាងត្បូងនៅចំព្រំប្រទល់ក្រុងសិរីសោភ័ណ ចម្ងាយប្រមាណជិត៤០០ម៉ែត្រ ពីរថយន្តឡិចស៊ីស RX.400h ដែលធ្លាក់ពីចិញ្ចើមផ្លូវខាងជើងនៅចំណុចព្រំប្រទល់ស្រុកអូរជ្រៅ ។
ក្រោយពេលកើតហេតុភ្លាមៗមន្ត្រីនគរបាលចរាចរណ៍ជើងគោកខេត្តបន្ទាយមានជ័យបានចុះទៅវាស់វែង និងសម្រួលចរាចរណ៍ឱ្យដឹងថា គ្រោះថ្នាក់ចរាចរណ៍កើតឡើងគឺបង្កដោយរថយន្តឡិចស៊ីសRX.400h ដែលបើកជែងខ្វះការប្រុងប្រយ័ត្នទើបជ្រុលទៅបុករថយន្តឡិចស៊ីសRX.300ពេញទំហឹងក្នុងចំណែកផ្លូវរបស់ខ្លួន តែសំណាងគ្មានអ្នករងរបួសធ្ងន់ធ្ងរទេ គ្រាន់តែបណ្តាលឱ្យខូចខាតរថយន្តទាំង២គ្រឿងធ្ងន់ធ្ងរ។ ក្រោយវាស់វែងហើយសមត្ថកិច្ចត្រូវយករថយន្តមកស្ទូចយកទៅរក្សាទុកនៅស្នងការដ្ឋាននគរបាលខេត្តបន្ទាយមានជ័យដើម្បីស្រាយគ្នាតាមច្បាប់ ។
រហូតដល់ល្ងាចថ្ងៃទី២៧ ខែមីនា ឆ្នាំ២០២២បានទទួលព័ត៌មានថ្មីថា គ្រោះថ្នាក់ចរាចរណ៍រវាងរថយន្តបុកគ្នានេះ ត្រូវបានដោះស្រាយគ្នាបញ្ចប់រឿងហើយដោយម្ចាស់រថយន្តឡិចស៊ីសRX.400h ជាមន្ត្រីរាជការបានទទួលកំហុសក្នុងការបើកបរដោយព្រមបង់ថ្លៃសងជាសំណងជាង៧.០០០ដុល្លារឱ្យទៅម្ចាស់រថយន្តឡិចស៊ីសRX.300 ហើយប្រគល់រថយន្តឡិចស៊ីសRX.300នេះមកខាងម្ចាស់រថយន្តឡិចស៊ីសRX.400h ដើម្បីបញ្ចប់រឿង ៕
ចែករំលែកព័តមាននេះ