ខេត្តបាត់ដំបង ៖ ក្មេងប្រុសអាយុ៣ឆ្នាំម្នាក់បានលង់ទឹកស្លាប់ ខណៈចុះទៅលេងទឹកស្ទឹងសង្កែជាមួយក្មេងៗក្នុងភូមិដទៃទៀត កាលពីវេលាម៉ោង០៨ និង៣០នាទីព្រឹកថ្ងៃទី០៧ កញ្ញា ២០១៦ ស្ថិតនៅចំណុចភូមិកំពង់ចែង ឃុំបាយដំរាំ ស្រុកបាណន់ ខេត្តបាត់ដំបង ។
ប្រភពឱ្យដឹងថា ក្មេងប្រុសដែលស្លាប់ឈ្មោះចាន់ សុភក្ដិ អាយុ៣ឆ្នាំ រស់នៅក្នុងភូមិ-ឃុំកើតហេតុខាងលើ ។ ក្មេងប្រុសនោះបានលង់ទឹកស្ទឹងស្លាប់ភ្លាមៗ ពេលកំពុងលេងទឹកជាមួយក្មេងៗនៅក្នុងភូមិប៉ុន្មាននាក់ទៀត ដែលអាណាព្យាបាលបណ្ដែតបណ្ដោយ មិនបានយកចិត្តដាក់ ។
អ្នកភូមិនិយាយដែរថា កន្លែងដែលកើតហេតុនោះ ជាកំពង់ ដែលអ្នកភូមិតែងចុះងូតទឹករាល់ថ្ងៃ ហើយកុមារាដែលជួបគ្រោះថ្នាក់នោះ ក៏តែងចុះហែលលេងជាមួយឪពុកម្ដាយដែរ ។ នៅទីនោះមានកន្លែងខ្លះជ្រៅ និងកន្លែងខ្លះរាក់ ដែលក្មេងៗអាចហែលលេងបាន ។ អ្នកភូមិបញ្ជាក់ថា ពេលចុះលេងទឹកនោះ ក៏មានមនុស្សចាស់ដែរ តែវាជាការធ្វេសប្រហែស ទើបបានជាមានក្មេងលង់ទឹកស្លាប់បែបនេះ ។
សមត្ថកិច្ចបានបញ្ជាក់ដែរថា ក្រោយពេលកើតហេតុ អាណាព្យាបាល និងអ្នកភូមិ បានព្យាយាមជួយសង្គ្រោះក្មេងរងគ្រោះ គ្រប់វិធីដែរ តែហូសពេលទៅហើយ ព្រោះក្មេងប្រុសបាត់ខ្លួនមួយសន្ទុះ ទើបដឹងនិងមានការភ្ញាក់ផ្អើល ។ សមត្ថកិច្ចបានដាក់បន្ទោស ករណីខាងលើនេះ គឺកើតឡើងដោយសារការធ្វេសប្រហែសរបស់អាណាព្យាបាល ដែលបណ្ដោយឱ្យកូនតូចៗរបស់ខ្លួនចុះលេងទឹកស្ទឹង ដោយគ្មានការប្រុងប្រយ័ត្ន ។
ដូច្នេះ អាណាព្យាបាលទាំងឡាយ ដែលរស់នៅក្បែរមាត់ស្ទឹង គួរតែមានការប្រុងប្រយ័ត្នចំពោះកូនចៅរបស់ខ្លួនហើយ ដែលតែងចុះលេងទឹកស្ទឹង ចៀសវាងកុំឲ្យមានគ្រោះថ្នាក់បែបនេះទៀត ។
ចែករំលែកព័តមាននេះ