ប្រទេសកូរ៉េខាងត្បូង ៖ ការងើបឡើងវិញនៃសេដ្ឋកិច្ចរបស់កូរ៉េខាងត្បូងនៅតែទន់ខ្សោយលើការប្រើប្រាស់ និងការនាំចេញឯកជន ។ នេះបើតាមអ្នកជំនាញប្រឹក្សាយោបល់ខាងនយោបាយ និងសេដ្ឋកិច្ចរដ្ឋ បាននិយាយកាលពីថ្ងៃអង្គារ ។
វិទ្យាស្ថានអភិវឌ្ឍន៍កូរ៉េ (KDI) បានឱ្យដឹងក្នុងរបាយការណ៍ប្រចាំខែថា សញ្ញាជាទូទៅលើការងើបឡើងវិញនៃសេដ្ឋកិច្ចរបស់កូរ៉េខាងត្បូង មិនទាន់អាចកំណត់បានទេ ខណៈមានការធ្លាក់ចុះលើការលក់រាយនិងការនាំចេញ ក៏ដូចជាការវិនិយោគរោងចក្រមានសន្ទុះយឺត ។
ផលិតកម្មនៅគ្រប់ឧស្សាហកម្មទាំងអស់បានកើនឡើង៣,២%ក្នុងខែកក្កដា ប៉ុន្តែវាមានកម្រិតទាបជាង៤,៨% បើធៀបនឹងខែមុន ។
ដោយមិនរាប់បញ្ចូលវិស័យព័ត៌មាន និងបច្ចេកវិទ្យាទំនាក់ទំនង ផលិតកម្មនៅក្នុងឧស្សាហកម្មរ៉ែ និងឧស្សាហកម្មផលិតបានថយចុះ២,៤%ក្នុងខែកក្កដា ខណៈវិស័យសេវាកម្មកើនឡើង២,៧%ក្នុងខែកក្កដា បន្ទាប់ពីបានកើនឡើង៥,៤%ក្នុងខែមិថុនា ។ រីឯការវិនិយោគក្នុងវិស័យអគារបានធ្លាក់ចុះ១២,៣%។
ការលក់រាយបានកើនឡើង៤,៣%នៅខែកក្កដា បន្ទាប់ពីបានកើនឡើង៩%កាលពីខែមុន ។ រីឯការលក់រថយន្តបានថយចុះ១០,៦%កាលពីខែសីហា ។
ការនាំចេញដែលមានតម្លៃប្រហែលពាក់កណ្តាលនៃសេដ្ឋកិច្ចរបស់កូរ៉េខាងត្បូង បានកើនឡើង២,៦%កាលពីខែសីហា ដែលវាជាការងើបឡើងវិញលើកដំបូងក្នុងរយៈពេល២០ខែកន្លងមក ។ ប៉ុន្តែការនាំចេញជាមធ្យមប្រចាំថ្ងៃបានធ្លាក់ចុះ៥,៣%កាលពីខែមុន ដែលជំរុញឱ្យមានការព្រួយបារម្ភអំពីក្បាលម៉ាស៊ីននៃកំណើនសេដ្ឋកិច្ចដ៏សំខាន់នេះ ។
រដ្ឋាភិបាលបានបង្ហាញពីផែនការថវិកាមួយ មានតម្លៃ១១ទ្រីលានវ៉ុន (១០ប៊ីលានដុល្លារអាមេរិក) ដែលត្រូវបានអនុម័តកាលពីថ្ងៃសុក្រ ដោយរដ្ឋសភាជាង១ខែបន្ទាប់ពីការលើកឡើងពីសំណើនេះ ។ វានៅតែមិនច្បាស់ថា តើវិធានការជំរុញសារពើពន្ធអាចមានឥទ្ធិពលវិជ្ជមានយ៉ាងពេញលេញលើសេដ្ឋកិច្ច ឬយ៉ាងណា ។
ទន្ទឹមនឹងនេះ ធនាគារកូរ៉េត្រូវបានគេរំពឹងថា នឹងមិនកាត់បន្ថយអត្រាគោលនយោបាយរបស់ខ្លួនទេ ខណៈដែលធនាគារកណ្តាលរបស់សហរដ្ឋអាមេរិកត្រូវបានគេព្យាករថា នឹងបង្កើនអត្រាការប្រាក់យ៉ាងហោចណាស់ម្តងក្នុងឆ្នាំនេះ ៕
ចែករំលែកព័តមាននេះ