រាជធានីភ្នំពេញ ៖ ហេតុការណ៍ភ្ញាក់ផ្អើលមួយបានកើតឡើង ខណៈដែលយុវជនវ័យជាង២០ឆ្នាំម្នាក់ មិនដឹងមូលហេតុច្បាស់ បានយកអង្រែបុកគ្រឿងវាយក្បាលខ្លួនឯង បែកហូរឈាមស្រោចពាសពេញដងខ្លួនសន្លប់ស្តូកស្តឹងនៅហ្នឹងកន្លែង ។ ហេតុការណ៍នេះកើតឡើងនៅចំណុចផ្ទះលេខ១៨C ផ្លូវលេខ៣៦ ស្ថិតក្នុងបុរីសូនី ក្នុងសង្កាត់ស្ទឹងមានជ័យ ខណ្ឌមានជ័យ ។
មន្ត្រីកងរាជអាវុធហត្ថ ឲ្យដឹងថា ជនរងគ្រោះពុំត្រូវបានស្គាល់អត្តសញ្ញាណឡើយ។ ក្រោយពេលកើតហេតុភ្លាមៗ ជនរងគ្រោះត្រូវបានបញ្ចូនទៅសង្គ្រោះ នៅមន្ទីរពេទ្យរុស្ស៊ីភ្លាមៗ។ ប្រភពព័ត៌មានពីអ្នកដែលរស់នៅក្បែរទីតាំងកើតហេតុបានប្រាប់ថា គេបានឮសំឡេងស្រែកហៅឲ្យជួយ រួចមកក៏នាំគ្នារត់ទៅមើលនៅខាងក្រោយរបងទ្វារផ្ទះ ក៏ប្រទះឃើញជនរងគ្រោះ ដេកសន្លប់ស្តូកស្តឹង ដោយក្បាលត្រូវបែកហូរឈាមស្រោចពាសពេញខ្លួន ទើបប្រជាពលរដ្ឋរាយការណ៍ជូនអាជ្ញាធរមូលដ្ឋាន រួមមានកម្លាំងសមត្ថកិច្ច និងកងរាជអាវុធហត្ថ ឲ្យចុះអន្តរាគមន៍ភ្លាមៗ ។
សូមបញ្ជាក់ថា នៅពេលចុះដល់កន្លែងកើតហេតុកម្លាំងអាជ្ញាធរចម្រុះ បានព្យាយាមគាស់សោទ្វារពីខាងក្រៅ ដើម្បីចូលទៅសង្គ្រោះជនរងគ្រោះ ព្រោះមុនពេលកើតហេតុរូបគេបានចាក់សោទ្វារផ្ទះពីខាងក្នុង។ ក្រោយគាស់ទ្វារផ្ទះរួច កម្លាំងអាជ្ញាធរបានទំនាក់ទំនងទៅខាង រថយន្តសាមុយឲ្យមកទទួលយកជនរងគ្រោះ ទៅសង្គ្រោះនៅមន្ទីរពេទ្យភ្លាមៗ ផងដែរ។
សូមបញ្ជាក់បន្ថែមថា ក្នុងករណីខាងលើនេះ សមត្ថកិច្ចសន្និដ្ឋានថា ជាករណីវាយក្បាលប៉ុនប៉ងធ្វើអត្តឃាតខ្លួនឯងនឹងអង្រែ ព្រោះនៅកន្លែងកើតហេតុដែលជនរងគ្រោះសន្លប់ ពុំមានឃើញអ្វីក្រៅពីប្រឡាក់ឈាមនោះទេ ។ មួយវិញទៀតនោះ ពេលដែលសមត្ថកិច្ចគាស់ទ្វារចូលទៅដល់ ពុំឃើញមានបុគ្គលទី២ណា នៅក្នុងផ្ទះក្រៅពីជនរងគ្រោះឡើយ ។
ដោយផ្ទះខាងលើជនរងគ្រោះ ស្នាក់នៅជាមួយឪពុក និងម្តាយបង្កើតតែ៣នាក់ ប៉ុន្តែម្តាយឪពុកមិនសូវមកស្នាក់នៅជាអចិន្ត្រៃយ៍ ប៉ុន្មាននោះទេ ព្រោះពួកគាត់មានផ្ទះផ្ទាល់ខ្លួនមួយទៀត ពួកគាត់ប្រកបមុខរបរជាគ្រូពេទ្យទៀតផង ៕
ចែករំលែកព័តមាននេះ