រាជធានីភ្នំពេញ ៖ កូនប្រុសច្បងសម្តេចតេជោហ៊ុន សែន នាយករដ្ឋមន្ត្រីកម្ពុជា គឺលោកហ៊ុន ម៉ាណែត រួមទាំងមេធាវីការពារក្តីរបស់លោក បានចេញមុខច្រានចោលភ្លាមៗ ចំពោះព័ត៌មានដែលថា លោកបានចាញ់ក្តីនៅតុលាការសហរដ្ឋអាមេរិក ទាក់ទងបណ្តឹងរបស់លោកមាជ សុវណ្ណរ៉ា សកម្មជនគណបក្សសង្គ្រោះជាតិ ដែលកំពុងជាប់ពន្ធនាគារព្រៃ.ស ដែលប្តឹងលោកហ៊ុន ម៉ា
ណែត និងរាជរដ្ឋាភិបាលកម្ពុជា ពីបទធ្វើទារុណកម្មតាមរយៈការឃុំខ្លួន ដោយរំលោភបំពានក្រៅច្បាប់ និងមានរយៈពេលយូរ ។
លោកហ៊ុន ម៉ាណែត បានថ្លែងថា ព័ត៌មានដែលថា លោកចាញ់ក្តីនៅសហរដ្ឋអាមេរិកនោះ ជាព័ត៌មានបំភ្លើសពីការពិត ហើយជាចេតនាធ្វើឱ្យសាធារណជនមានការភាន់ច្រឡំ ចំពោះដំណើរការនៃនីតិវិធីតុលាការអាមេរិកប៉ុណ្ណោះ ។
ចំណែកលោក John Purcell មេធាវីលោកហ៊ុន ម៉ាណែត និងលោក Christoper Berss អ្នកជំនាញច្បាប់អាមេរិក បានធ្វើការបកស្រាយថា ដើមចមនៃបណ្តឹងមិនទាន់ឈ្នះក្តីនៅឡើយទេ ខណៈដែលការអះអាងរបស់លោក Sklar ដែលជាមេធាវីរបស់ដើមបណ្តឹង គឺបំផ្លើសពីការពិត និងបំភាន់សាធារណមតិ ពាក់ព័ន្ធនិងសេចក្តីសម្រេចរបស់តុលាការ និងដំណើរការនីតិវិធីនៅតុលាការអាមេរិក ។
លោក Christopher Beres អ្នកជំនាញច្បាប់អាមេរិកបានបញ្ជាក់ថា កន្លងមកនេះ ដើមបណ្តឹងមិនមានអង្គហេតុណាមួយ ដើម្បីបញ្ជាក់ថា តុលាការមានសមត្ថកិច្ចឡើយ ។ ដូច្នេះ សួរថា តើមេធាវីរបស់ដើមបណ្តឹងអាចដាក់ពាក្យបណ្តឹងដោយឆន្ទៈសុចរិតដោយរបៀបណា? ប្រសិនបើគ្មានអង្គហេតុណាមួយ ដែលបញ្ជាក់ថា តុលាការមានសមត្ថកិច្ចផងនោះ ។
អ្នកជំនាញច្បាប់អាមេរិករូបនោះអះអាងថា មកដល់ពេលនេះ ខាងដើមបណ្តឹងមិនទាន់បានបង្ហាញអង្គហេតុណាមួយ ទៅតុលាការសហរដ្ឋអាមេរិក ដើម្បីអាចតម្រូវឲ្យលោកហ៊ុន ម៉ាណែត ត្រូវបានខ្លួនទៅតុលាការ ដើម្បីឆ្លើយតបទៅនឹងបណ្តឹងខាងលើនេះនៅឡើយទេ ។
លោក John Purcell មេធាវីលោក ហ៊ុន ម៉ាណែត និងលោក Christopher Beres អ្នកជំនាញច្បាប់អាមេរិក បានថ្លែងដូចគ្នាថា ការធ្វើសេចក្តីប្រកាសព័ត៌មានរបស់មេធាវី Morton Sklar ការពារក្តីលោកមាជ សុវណ្ណរ៉ា រួមទាំងបុគ្គលមួយចំនួន ដែលលើកឡើងថា តុលាការសហរដ្ឋអាមេរិកកាលីហ្វរ័ញ៉ា សហរដ្ឋអាមេរិក សម្រេចឲ្យលោក ហ៊ុន ម៉ាណែត ចាញ់ក្តីកាលពីថ្ងៃទី០១ កញ្ញា ២០១៦ នោះ គឺជាការបំផ្លើសការពិតព្រោះថា រហូតមកដល់ពេលនេះ តុលាការពុំទាន់ទាំងទទួលយកពាក្យបណ្តឹងរបស់លោក
មាជ សុវណ្ណរ៉ា យកមកបន្តដំណើរការនៅឡើយទេ ។
ទន្ទឹមនោះរឿងក្តីនេះ កំពុងតែស្ថិតនៅត្រឹមដំណាក់កាលនៃការទាមទារព័ត៌មានបន្ថែមពីដើមបណ្តឹងប៉ុណ្ណោះ ដើម្បីកំណត់សមត្ថកិច្ចតុលាការ ក្នុងការជំនុំជម្រះក្តី ។
ចែករំលែកព័តមាននេះ