រាជធានីភ្នំពេញ ៖ បើតាមអ្នកគ្រប់គ្រងនៃតំបន់សេដ្ឋកិច្ចពិសេសភ្នំពេញបានបញ្ជាក់ថា នៅក្នុងឆ្នាំ២០១៦នេះ មានក្រុមហ៊ុនបរទេសចំនួន៨បន្ថែមទៀតគ្រោងចូលវិនិយោគនៅក្នុងតំបន់សេដ្ឋកិច្ចពិសេសភ្នំពេញ
រាជធានីភ្នំពេញ ៖ បើតាមអ្នកគ្រប់គ្រងនៃតំបន់សេដ្ឋកិច្ចពិសេសភ្នំពេញបានបញ្ជាក់ថា នៅក្នុងឆ្នាំ២០១៦នេះ មានក្រុមហ៊ុនបរទេសចំនួន៨បន្ថែមទៀតគ្រោងចូលវិនិយោគនៅក្នុងតំបន់សេដ្ឋកិច្ចពិសេសភ្នំពេញ ក្នុងនោះមានក្រុមហ៊ុនមកពីប្រទេសជប៉ុន សហរដ្ឋអាមេរិក ចិន និងថៃ ។
ថ្លែងនៅក្នុងសន្និសីទសារព័ត៌មានមួយកាលពីពេលថ្មីៗនេះ លោក Hiroshi Uematsu នាយកប្រតិបត្តិតំបន់សេដ្ឋកិច្ចពិសេសភ្នំពេញ បានឱ្យដឹងថា នៅក្នុងឆមាសទី២ឆ្នាំ២០១៦ ក្រុមហ៊ុនថ្មីៗចំនួន៨ នឹងសិក្សាចូលវិនិយោគក្នុងតំបន់សេដ្ឋកិច្ចពិសេសភ្នំពេញ ក្នុងនោះមានក្រុមហ៊ុនជប៉ុនចំនួន៤ នឹងវិនិយោគទៅលើគ្រឿងសំអាង សម្ភារសំណង់ គ្រឿងបន្លាស់វ៉ែនតា និងគ្រឿងបន្លាស់យានយន្ត ។ សម្រាប់ក្រុមហ៊ុនចិន នឹងមកវិនិយោគនៅតំបន់សេដ្ឋកិច្ចពិសេសភ្នំពេញ មានចំនួន២ ហើយគ្រោងនឹងវិនិយោគទៅលើមជ្ឈមណ្ឌលទិន្នន័យ និងឧបករណ៍ភ្ជាប់ចរន្តអគ្គិសនី ។ ក្រុមហ៊ុនថៃចំនួន១ នឹងមកវិនិយោគទៅលើថ្នាំពណ៌ ខណៈក្រុមហ៊ុនមួយទៀតរបស់សហរដ្ឋអាមេរិក នឹងមកវិនិយោគទៅលើការផលិតសម្បកកំប៉ុង ។
លោកបន្តថា ៖ « ក្នុងចំណោមក្រុមហ៊ុនទាំង៨នោះ ក្រុមហ៊ុនជប៉ុនមួយបានសិក្សាចរចារួចជាស្រេចហើយ និងរង់ចាំតែការចុះហត្ថលេខាចាប់ផ្ដើមវិនិយោគប៉ុណ្ណោះ ហើយសម្រាប់ក្រុមហ៊ុនផ្សេងៗទៀតកំពុងតែសិក្សា និងចរចាគ្នានៅពេលក្រោយៗទៀត » ។
លោកបន្ថែមថា ដើម្បីផ្ដល់ភាពងាយស្រួលដល់ក្រុមហ៊ុនវិនិយោគទាំងអស់នៅក្នុងតំបន់សេដ្ឋកិច្ចពិសេសភ្នំពេញ ក៏មានការផ្ដល់ជូននូវសេវាកម្មសន្តិសុខដល់បណ្ដាក្រុមហ៊ុនវិនិយោគក្នុងតំបន់ផងដែរ ដោយកាលពីមុន តំបន់សេដ្ឋកិច្ចពិសេសត្រូវការជួលសន្តិសុខច្រើនមកផ្ដល់ជូនក្រុមហ៊ុនវិនិយោគនៅក្នុងតំបន់សេដ្ឋកិច្ចពិសេសនោះ តែពេលនេះ មិនចាំបាច់ជួលសន្តិសុខពីក្រុមហ៊ុនខាងក្រៅឡើយ ។
លោកបន្ថែមទៀតថា បច្ចុប្បន្ននេះ តំបន់សេដ្ឋកិច្ចនៅមានផ្ទៃដីទំនេរប្រមាណ៧០ហិកតាទៀតសម្រាប់ឱ្យក្រុមហ៊ុនក្នុង និងក្រៅស្រុកវិនិយោគក្នុងតំបន់នោះ និងអាចទទួលក្រុមហ៊ុនវិនិយោគប្រមាណ៧០ក្រុមហ៊ុនបន្ថែមទៀតនៅលើផ្ទៃដីជាង៧០ហិកតា ។
លោកបញ្ជាក់ថា ចំណូលរបស់តំបន់សេដ្ឋកិច្ចពិសេសភ្នំពេញនៅដើមឆ្នាំ២០១៦ បានថមថយជាងឆ្នាំ២០១៥កន្លងមក ដោយសារតែនៅដើមឆ្នាំ២០១៦ ក្រុមហ៊ុនតំបន់សេដ្ឋកិច្ចពិសេសមានការមមាញឹកខ្លាំងជាមួយនឹងការបោះផ្សាយភាគហ៊ុននៅក្នុងផ្សារមូលបត្រកម្ពុជា តែចាប់ពីឆមាសទី២ឆ្នាំ២០១៦នេះតទៅ ក្រុមហ៊ុននឹងព្យាយាមរកវិធីរកចំណូលឱ្យបានច្រើនឡើងវិញ ។
គួរបញ្ជាក់ថា បច្ចុប្បន្ន តំបន់សេដ្ឋកិច្ចពិសេសភ្នំពេញ មានក្រុមហ៊ុនប្រមាណ៦៥កំពុងធ្វើប្រតិបត្តិ ដោយបានផ្ដល់ការងារជូនកម្មករកម្មការិនីប្រមាណ១៨ពាន់នាក់ ។ នៅក្នុងតំបន់សេដ្ឋកិច្ចពិសេសនេះដែរ ក្រុមហ៊ុនដែលវិនិយោគធំជាងគេ គឺក្រុមហ៊ុន Minebea ដែលវិនិយោគសាងសង់រោងចក្រលើផ្ទៃដីជាង២០ហិកតាទៅហើយ និងជាក្រុមហ៊ុនដែលផ្ដល់ការងារដល់កម្មករ កម្មការិនីច្រើនជាងគេក្នុងចំណោមក្រុមហ៊ុនទាំងអស់នៅតំបន់សេដ្ឋកិច្ចពិសេស ហើយសម្រាប់ការនាំចេញសរុបវិញ ក៏ក្រុមហ៊ុននេះបាននាំចេញច្រើនគេផងដែរ ៕
ចែករំលែកព័តមាននេះ