រាជធានីភ្នំពេញ ៖ ជនសង្ស័យម្នាក់ធ្វើសកម្មភាពចូលលួចទូរស័ព្ទដែលកំពុងដោតសាកថ្ម គាប់ជួនម្ចាស់ចេញពីបន្ទប់ទឹកវិញ ប្រទះឃើញជនសង្ស័យរត់ចេញពីក្នុងផ្ទះ បានស្រែកផ្អើលឆោឡោ ក៏ត្រូវប្រជាពលរដ្ឋដេញចាប់បានវាយកប់ភក់ ដែលហេតុការណ៍នេះកាលពីវេលាម៉ោង០៧យប់ថ្ងៃទី៤ កញ្ញា ២០១៦ ស្ថិតនៅចំណុចផ្លូវលំមួយកន្លែង នៅខាងក្រោយផ្សារព្រៃទា ភូមិព្រៃទា សង្កាត់ចោមចៅ ខណ្ឌពោធិ៍សែនជ័យ ។
មុនពេលកើតហេតុ នារីជាម្ចាស់ទូរស័ព្ទបានកំពុងអង្គុយចុចលេងទូរស័ព្ទនៅមុខបន្ទប់តែម្នាក់ឯង ក្រោយមក នាងបានទុកទូរស័ព្ទសាកថ្ម ហើយចូលបន្ទប់ទឹកមួយភ្លែត ស្រាប់តែមានជនសង្ស័យចូលទៅយក រួចដើរចេញទៅវិញ ក៏ត្រូវម្ចាស់ទូរស័ព្ទចេញពីបន្ទប់ទឹកវិញឃើញទាន់ ស្រែកឆោឡោធ្វើឱ្យផ្អើលដល់អ្នកជួលបន្ទប់ក្បែរគ្នា ចេញមកមើលជួយដេញចាប់បានស្វាគមន៍១ដៃ១ជើងដួលកប់ភក់ពេញខ្លួន ។
ប្រភពដដែលបន្តថា ខណៈដែលជនសង្ស័យត្រូវប្រជាពលរដ្ឋវាយគ្រប់គ្នា ស្រាប់តែមានបុរសម្នាក់ជាអ្នកលក់ស្បែកជើង ដើរចូលទៅឃាត់កុំឱ្យវាយទៀត ក៏ត្រូវប្រជាពលរដ្ឋចោទប្រកាន់ថា កាន់ជើងចោរ ក៏វាយបុរសជាអ្នកលក់ស្បែកជើងខាងលើបណ្តាលឱ្យបែកមាត់ថែមទៀត។
ក្រោយពេលកើតហេតុ ជនរងគ្រោះមិនបានដាក់ពាក្យបណ្តឹងនោះទេ ចំណែកជនសង្ស័យក្លាយជាជនរងគ្រោះ ដែលប្រជាពលរដ្ឋស្វាគមន៍ឡើងទ្រមខ្លួនរួចមក ត្រូវបានក្រុមសង្គ្រោះរបស់អង្គភាព៧១១ ដឹកទៅព្យាបាលនៅមន្ទីរពេទ្យព្រះកុសុមៈ ។
ចែករំលែកព័តមាននេះ