ខេត្តបាត់ដំបង ៖ ក្រុមយុវជនចំនួន២៦នាក់ ដែលសមត្ថកិច្ចបង្ក្រាបបាន ជាប់ពាក់ព័ន្ធនឹងការប្រព្រឹត្តបទល្មើសគ្រឿងញៀន ត្រូវបានការិយាល័យប្រឆាំងបទល្មើសគ្រឿងញៀន បង្ហាញមុខនៅក្នុងស្នងការដ្ឋានខេត្ត នៅរសៀលថ្ងៃទី០២ ខែកញ្ញា ឆ្នាំ២០១៦នេះ ជាមួយនឹងវត្ថុតាងថ្នាំញៀនដែលរឹបអូសបានមួយចំនួនផងដែរ។ សមត្ថកិច្ចបានប្រាប់ថា ក្រុមអ្នកប្រព្រឹត្តបទល្មើសគ្រឿងញៀនទាំង២៦នាក់នេះ ត្រូវបានកម្លាំងនគរបាលស្រុកថ្មគោល ធ្វើការបង្ក្រាបចំនួន៣គោលដៅព្រមៗគ្នាក្នុងពេលតែមួយ កាលពីថ្ងៃទី០១ ខែកញ្ញា នៅភូមិពពាលខែ ឃុំជ្រៃ ស្រុកថ្មគោល។
សមត្ថកិច្ចបន្តថា ការឈានដល់ការឃាត់ខ្លួនក្រុមពាក់ព័ន្ធគ្រឿងញៀនមួយសម្បុកនេះ គឺផ្ដើមចេញពីឃាត់ខ្លួនបានមេខ្លោង៣នាក់ ហើយពេលសួរនាំទើបឈានដល់ការបង្ក្រាបទាំងសម្បុកតែម្ដង។ របាយការណ៍បានបញ្ជាក់ថា ជនសង្ស័យទាំង២៦នាក់នេះ មានអ្នកប្រើប្រាស់ អ្នកចែកចាយ និងអ្នកជួញដូរ ហើយក្នុងចំណោមនេះមាន១០នាក់បានសារភាពថា ពួកខ្លួនបានប្រព្រឹត្តបទល្មើសថ្នាំញៀន រីឯផ្សេងទៀត ក៏ជាប់ពាក់ព័ន្ធផងដែរ។
ជាមួយនឹងការឃាត់ខ្លួននេះសមត្ថកិច្ចរឹបអូសបានថ្នាំញៀនមេតំហ្វេតាមីនប្រភេទម្សៅក្រាមពណ៌ស ICE (ម៉ាទឹកកក) ទម្ងន់១០៣,២៩ក្រាម ម៉ូតូ១០គ្រឿង រួមនឹងវត្ថុតាងមួយចំនួនទៀត។ មន្ត្រីជំនាញបានបញ្ជាក់ដែរថា សមត្ថកិច្ចកំពុងបន្តការសួរនាំជនសង្ស័យមួយសម្បុកនេះ ដើម្បីកសាងសំណុំរឿងបញ្ជូនទៅកាន់តុលាការហើយ៕
ចែករំលែកព័តមាននេះ