រាជធានីភ្នំពេញ៖ អ្នកនាំពាក្យគណបក្សសង្គ្រោះជាតិ លោកអេង ឆៃអ៊ាង បានឲ្យដឹងថា ក្រុមសមាជិកគណបក្សសង្គ្រោះជាតិនឹងដាក់ញត្តិដើម្បីប្រាប់ដល់បណ្តាប្រទេសជាសហត្ថលេខីកិច្ចព្រមព្រៀងទីក្រុងប៉ារី
រាជធានីភ្នំពេញ៖ អ្នកនាំពាក្យគណបក្សសង្គ្រោះជាតិ លោកអេង ឆៃអ៊ាង បានឲ្យដឹងថា ក្រុមសមាជិកគណបក្សសង្គ្រោះជាតិនឹងដាក់ញត្តិដើម្បីប្រាប់ដល់បណ្តាប្រទេសជាសហត្ថលេខីកិច្ចព្រមព្រៀងទីក្រុងប៉ារី និងប្រទេសមហាអំណាចនានាថាកម្ពុជា មិនបានគោរពកិច្ចព្រមព្រៀងទីក្រុងប៉ារីស។
ក្នុងវេទិកានយោបាយស្តីពីដំណើរការបោះឆ្នោតនាព្រឹកថ្ងៃទី០២ កញ្ញា ២០១៦ នៅស្នាក់គណបក្សសង្គ្រោះជាតិ ស្ថិតនៅសង្កាត់ចាក់អង្រែលើ ខណ្ឌមានជ័យ លោកអេង ឆៃអ៊ាង បានបញ្ជាក់ថា« ខ្លឹមសារញត្តិគឺដើម្បីបង្ហាញប្រាប់ទៅប្រទេស ហត្ថលេខីថាប្រទេសកម្ពុជាបច្ចុប្បន្នកំពុងធ្វើដំណើរឃ្លាតចាកពីស្មារតីនៃកិច្ចព្រមព្រៀងទីក្រុងប៉ារីស និងរដ្ឋធម្មនុញ្ញនៃព្រះរាជាណាចក្រកម្ពុជា ពិសេសនោះដំណើរការនៃកាអនុវត្តគោលការណ៍លិទ្ធិប្រជាធិបតេយ្យសេរីពហុបក្សតែម្តង »។
លោកបន្តការដាក់នេះស្របពេលមិនដល់ប្រមាណ១ខែ ទៀតនឹងដល់ខួប២៥ឆ្នាំនៃកិច្ចព្រមព្រៀងទីក្រុងប៉ារីស ហើយថ្ងៃទី០៦ កញ្ញានឹងមានកិច្ចប្រជុំអាស៊ាននៅក្នុងប្រទេសឡាវ ពេលនោះបណ្តាលថ្នាក់ដឹកនាំប្រទេសធំៗនឹងចូលរួម ។
លោកថាកាលណាគេនិយាយពីលិទ្ធិប្រជាធិបតេយ្យ គេសំដៅដល់ដំណើរការបោះឆ្នោត ការគោរពសិទ្ធិមនុស្ស និងនីតិរដ្ឋ ។ លោកបន្ថែមនៅថ្ងៃទី០៥ កញ្ញា វេលាម៉ោង១០និង៣០នាទីព្រឹក ក្រុមសមាជិករដ្ឋសភាគណបក្សសង្គ្រោះជាតិនឹងយកញត្តិទៅដាក់ជូនបណ្តាស្ថានឯកអគ្គរដ្ឋទូត ឯករាជទូតនៃបណ្តាប្រទេសសមាជិកអាស៊ាន និងប្រទេសមហាអំណាចដែលមានស្ថានកុងស៊ុលប្រចាំនៅក្នុងប្រទេសកម្ពុជា ។
លោកគូសបញ្ជាក់ថា ទោះបីដំណើរការចុះបោះឆ្នោតដំណើរការល្អក៏ដោយ ប៉ុន្តែបើបរិយាកាសនយោបាយមិនល្អ គឺការបោះឆ្នោតមិនអាចចាត់ទុកដាក់ដំណើរការបានល្អ និងរលូននោះទេ ។
ជាមួយគ្នានោះដែរលោក អេង ឆៃអ៊ាងបានក៏បានគូសបញ្ជាក់ថា«ប្រសិនបើប្រជាពលរដ្ឋចុះឈ្មោះបោះឆ្នោត តែបរិយាកាសនៃការបោះឆ្នោតមានការភ័យខ្លាច គេមិនអាចចាត់ទុកការបោះឆ្នោតនោះត្រឹមត្រូវយុត្តិធម៌បានទេ ។
អ្នកនាំពាក្យគណបក្សប្រជាជនកម្ពុជា លោកសុខ ឥសាន បានឲ្យដឹងតាមទូរស័ព្ទថា« ការដាក់ញត្តិនៅកន្លែងណាជាសិទ្ធិរបស់គាត់ទេ ប៉ុន្តែមានប្រសិទ្ធភាពកម្រិតណានោះ មិនមែនលើការដាក់ញត្តិរបស់គាត់នោះទេ។ អីញ្ចឹងទេខ្ញុំ យល់ថាគ្មានការរំលោភរដ្ឋធម្មនុញ្ញនោះទេ ព្រោះថាកម្ពុជាបានចេញជារដ្ឋធម្មនុញ្ញទៅហើយ គឺបង្កើតជាព្រះរាជាណាចក្រកម្ពុជាមូយដែលឯករាជ្យ អធិបតេយ្យ ដែនដីច្បាស់លាស់ ហើយរាជរដ្ឋាភិបាលកើតឡើងដោយការបោះឆ្នោត ។ ដូច្នេះគាត់ទៅពឹងបរទេសគ្មានបានប្រយោជន៍នោះទេ»៕
ចែករំលែកព័តមាននេះ