រាជធានីភ្នំពេញ ៖ មិនរាប់បញ្ចូលការប្រកួតអន្តរជាតិ២គូនៅល្ងាចថ្ងៃសៅរ៍ស្អែកនេះ នៅលើសង្វៀនទូរទស្សន៍អាស៊ីអាគ្នេយ៍ពេលព្រឹក និងពេលរសៀលក៏មានការប្រកួតអន្តរជាតិ៤គូផ្សេងទៀតផងដែរ ។ ការប្រកួតរបស់ពួកគេ
រាជធានីភ្នំពេញ ៖ មិនរាប់បញ្ចូលការប្រកួតអន្តរជាតិ២គូនៅល្ងាចថ្ងៃសៅរ៍ស្អែកនេះ នៅលើសង្វៀនទូរទស្សន៍អាស៊ីអាគ្នេយ៍ពេលព្រឹក និងពេលរសៀលក៏មានការប្រកួតអន្តរជាតិ៤គូផ្សេងទៀតផងដែរ ។ ការប្រកួតរបស់ពួកគេ គឺ២គូត្រូវការចាញ់ឈ្នះធម្មតា ឯ២គូទៀតស្ថិតនៅក្នុងសមាសភាព៨នាក់ដែលត្រូវដណ្ដើមពានអន្តរជាតិ ។
សម្រាប់ព្រឹត្តិការណ៍«Ganzburg Top Fighter» ដែលចាប់ផ្ដើមពីម៉ោង៨ព្រឹក កីឡាករ ម៉ន លីហួរ មកពីក្លិបការិយាល័យទី៥កងទ័ពជើងគោក ប៉ះគ្នាជាមួយកីឡាករថៃឈ្មោះ Yorth Raknong និងកីឡាករ ព្រំ សំណាង មកពីក្លិបកងទ័ពឆត្រយោង៩១១ ប៉ះគ្នាជាមួយកីឡាករថៃឈ្មោះ Phach Bopha។ សំអាងលើប្រវត្តិប្រកួតបាន៦៦លើក ឈ្នះ៤៩លើក ចាញ់១៦លើក និងស្មើ១លើក កីឡាករ ម៉ន លីហួរ ហាក់មានសង្ឃឹមខ្ពស់ក្នុងការយកឈ្នះលើគូប្រកួតជាកីឡាករថៃដែលឆ្លងកាត់ការប្រកួតបានតែ៦៤លើក ឈ្នះ៥៥លើក ចាញ់៨លើក និងស្មើ១លើក ។
យ៉ាងណាក៏ដោយ មន្ត្រីជាអ្នកដឹកនាំកីឡាករថៃឲ្យមកប្រកួតក៏មានជំនឿចិត្តទៅលើកីឡាករថៃ Yorth Raknong ដូចគ្នាផងដែរ ដោយអះអាងថា គេប្រកួតបានតិចជាងមែនប៉ុន្តែសមត្ថភាពគេខ្លាំងមិនធម្មតា ។
មិនខុសគ្នាដែរ កីឡាករ ព្រំ សំណាង ដែលធ្លាប់ប្រកួតបាន៨៣លើក ឈ្នះ៧០លើក ចាញ់១១លើក និងស្មើ២លើក ក៏មានជំនឿចិត្តឈ្នះដែរ បើទោះជាកីឡាករថៃជាគូប្រកួតធ្លាប់ប្រកួតបាន១១០លើក ឈ្នះ៩០លើក ចាញ់១៨លើក និងស្មើ២លើកច្រើនជាងក្ដី ។ គូនេះមានអ្នកឃ្លាំមើលច្រើនដោយសារតែកីឡាករថៃក៏ខ្លាំង ហើយកីឡាករកម្ពុជាក៏មិនធម្មតា។
សម្រាប់សមាសភាព៤រូបផ្សេងទៀត គឺកីឡាករ ពុទ្ធ ឆាយរិទ្ធី មកពីក្លិបពុទ្ធសេរីវង្សព្រែកតាទែន ប្រកួតជាមួយកីឡាករថៃឈ្មោះ Super Chhai និងកីឡាករ រឿង សោភ័ណ្ឌ មកពីក្លិបមកុដរាជសីហ៍ ប្រកួតជាមួយកីឡាករថៃឈ្មោះ Thai Oulek ។ ការប្រកួតរបស់កីឡាករទាំង៤រូប មិនគ្រាន់តែជាការប្រកួតចាញ់ឈ្នះដើម្បីស្ទាបស្ទង់សមត្ថភាពនោះទេ ប៉ុន្តែក៏ជាការប្រកួតដណ្ដើមពិន្ទុសម្រាប់បោះជំហានទៅរកការដណ្ដើមចំណាត់ថ្នាក់ជើងឯករដូវកាលទី២ក្នុងការប្រកួតរវាងកីឡាករខ្មែរ និងកីឡាករបរទេសផងដែរ ។ អ្នកទាំង៤នឹងប៉ះគ្នានៅក្នុងព្រឹត្តិការណ៍ប្រដាល់ជើងឯកអន្តរជាតិស្រាបៀរកម្ពុជាលើកទី២ចាប់ពីម៉ោង២រសៀលទៅ បន្ទាប់ពីព្រឹត្តិការណ៍នេះទើបនឹងរកឃើញកីឡាករឱ្យគ្រងតំណែងជាម្ចាស់ជើងឯកក្នុងរដូវកាលទី១។ កីឡាករ ពុទ្ធ ឆាយរិទ្ធី គឺជាជើងខ្លាំងម្នាក់ក្នុងព្រឹត្តិការណ៍ប្រដាល់នាពេលកន្លងមក ខណៈដែលកីឡាករជាគូប្រកួតក៏មិនមែនជាជើងខ្លាំងដែលគួរឱ្យខ្លាចដូចសមាសភាពមកពីកីឡាករថៃ ។
ឆ្លងកាត់ការប្រកួតបាន៧៨លើក ឈ្នះ៦៤លើក ចាញ់១៣លើក និងស្មើ១លើក កីឡាករពុទ្ធ ឆាយរិទ្ធី មិនសង្ឃឹមខ្ពស់ប៉ុន្មានទេ ក្នុងពេលកីឡាករថៃមានប្រវត្តិប្រកួតរហូតដល់១២០លើក ឈ្នះ១០៣លើក ចាញ់១៥លើក និងស្មើ២លើក ដែលមានន័យថាគេមានបទពិសោធន៍ច្រើនជាងដាច់ឆ្ងាយ ។ ងាកទៅការប្រកួតមួយគូទៀតវិញ កីឡាករ រឿង សោភ័ណ្ឌ ធ្លាប់ប្រកួតបាន១៣៩លើក ឈ្នះ១២៤លើក ចាញ់១៣លើក និងស្មើ២លើក ក្នុងពេលដែលកីឡាករថៃប្រកួតបាន១០៧លើក ឈ្នះ៩០លើក ចាញ់១៥លើក និងស្មើ២លើក ទើបអ្នកគាំទ្រហាក់មិនមានទំនុកចិត្តលើកីឡាករកម្ពុជាច្រើនទេ បើទោះជាគេខ្លាំងនៅក្នុងពិភពប្រដាល់ក្ដី ។ ចាំមើលតើការប្រកួតរបស់ពួកគេអ្នកណានឹងយកបាន៣ពិន្ទុនាំមុខមុន៕
ចែករំលែកព័តមាននេះ