ប្រទេសមីយ៉ាន់ម៉ា ៖ ភ្ញៀវទេសចរមីយ៉ាន់ម៉ាដែលធ្វើដំណើរទៅកាន់ប្រទេសថៃកាលពីមុន បានពឹងផ្អែកលើការទិញប្រាក់ដុល្លារជាមុនដើម្បីប្តូរជាប្រាក់បាត ឬដោះដូរប្រាក់ខ្យាដជាមួយឈ្មួញទីផ្សារងងឹតក្នុងប្រទេសថៃ
ប្រទេសមីយ៉ាន់ម៉ា ៖ ភ្ញៀវទេសចរមីយ៉ាន់ម៉ាដែលធ្វើដំណើរទៅកាន់ប្រទេសថៃកាលពីមុន បានពឹងផ្អែកលើការទិញប្រាក់ដុល្លារជាមុនដើម្បីប្តូរជាប្រាក់បាត ឬដោះដូរប្រាក់ខ្យាដជាមួយឈ្មួញទីផ្សារងងឹតក្នុងប្រទេសថៃ ឬក៏ប្រើកាតធនាគារបរទេស ។
កញ្ញា Ma Thandar ជាអាជីវករលក់រាយតាមអនឡាញមកពីទីក្រុងយ៉ាំងហ្គោន តែងតែធ្វើដំណើរទៅទិញសម្លៀកបំពាក់នៅទីក្រុងបាងកក បានបង្ខំចិត្តប្តូរប្រាក់ជាមួយឈ្មួញទីផ្សារងងឹត នៅពេលដែលនាងគ្មានប្រាក់បាតគ្រប់គ្រាន់ ។
ប៉ុន្តែអ្វីៗកំពុងផ្លាស់ប្តូរ ការធ្វើដំណើរនាពេលថ្មីៗនេះ កញ្ញា Ma Thandar បានរកឃើញថា ក្រុមហ៊ុនថៃដែលមានអាជ្ញាប័ណ្ណ SuperRich មានការប្តូរប្រាក់ខ្យាដ ។ នាងនិយាយថា ៖ « ខ្ញុំពិតជាភ្ញាក់ផ្អើលនៅពេលឃើញថា មានការប្តូរប្រាក់ខ្យាដមីយ៉ាន់ម៉ា នៅលើផ្ទាំងផ្សព្វផ្សាយពាណិជ្ជកម្មនៃមជ្ឈមណ្ឌលប្តូរប្រាក់ SuperRich នេះ ។ វាកាន់តែមានភាពងាយស្រួលសម្រាប់ខ្ញុំ » ។
ចំណែកកញ្ញា Ma Win Myat Mon ជាអាជីវករលក់រាយសម្លៀកបំពាក់មីយ៉ាន់ម៉ា បានប្រើប្រាស់ Visa Card សម្រាប់ការទិញទំនិញនៅផ្សារទំនើបនៅទីក្រុងបាងកក ។ នាងនិយាយថា ៖ « ខ្ញុំមិនដែលយកប្រាក់ខ្យាដមីយ៉ាន់ម៉ាតាមខ្លួនឡើយ ពីព្រោះគ្មានកន្លែងដូរប្រាក់នេះទេ » ។
នាងសប្បាយចិត្តនៅពេលដឹងថា មានការប្តូររូបិយប័ណ្ណថៃនិងខ្យាដជាផ្លូវការ ដែលពីមុននាងត្រូវទាក់ទងជាមួយឈ្មួញទីផ្សារងងឹតនៅជិតស្ថានទូតមីយ៉ាន់ម៉ា ដើម្បីទទួលបានប្រាក់បាត ។
មីយ៉ាន់ម៉ាបានអនុម័តអត្រាប្តូរលុយកខ្វក់កាលពីឆ្នាំ២០១២ ហើយប្រាក់ខ្យាដនៅតែជារូបិយប័ណ្ណដែលងាយនឹងប្រែប្រួលខ្លាំង ។ ក្នុងឆ្នាំ២០១៥ ប្រាក់ខ្យាដបានបាត់បង់តម្លៃជាង២៥% នៃតម្លៃរបស់ខ្លួន ។ ការប្រែប្រួលអត្រាប្តូរប្រាក់ដុល្លារអាមេរិកនិងខ្យាដ កាលពីដើមឆ្នាំនេះ បានជំរុញឱ្យអ្នកផ្តល់ប្រាក់កម្ចីនៅមីយ៉ាន់ម៉ា ផ្អាកអាជីវកម្មរបស់ខ្លួនជាបណ្តោះអាសន្ន ។
ការប្រែប្រួលនេះមិនអាចរារាំងក្រុមហ៊ុន SuperRich បានទេ ខណៈដែលក្រុមហ៊ុននេះមើលឃើញថា ភ្ញៀវទេសចរមីយ៉ាន់ម៉ាបានធ្វើដំណើរមកកាន់ប្រទេសថៃកាន់តែច្រើន បន្ទាប់ពីការបោះឆ្នោតទូទៅជាប្រវត្តិសាស្ត្រ ក្នុងឆ្នាំ២០១៥។ នេះបើយោងតាមអ្នកនាំពាក្យរបស់ក្រុមហ៊ុន ។
អ្នកនាំពាក្យបានប្រាប់កាសែត The Myanmar Times ថា ៖ « តម្រូវការលុយខ្យាដនឹងកើនឡើងនាពេលអនាគត ហើយយើងចង់ឱ្យអតិថិជនមានភាពងាយស្រួលក្នុងការប្រើប្រាស់ ។ ក្រុមហ៊ុននេះបានចាប់ផ្តើមប្តូរប្រាក់ខ្យាដតាំងពីដើមឆ្នាំមកម្ល៉េះ » ។
ក្រុមហ៊ុន SuperRich រំពឹងថា ភ្ញៀវទេសចរនឹងធ្វើដំណើរទៅប្រទេសមីយ៉ាន់ម៉ាកាន់តែច្រើន ។ ចំណែកឯបុគ្គលិកនៅធនាគារមីយ៉ាន់ម៉ានិយាយថា ភ្ញៀវទេសចរពីមីយ៉ាន់ម៉ាដែលធ្វើដំណើរទៅបណ្តាប្រទេសជិតខាង នឹងកើនឡើងផងដែរ ។
លោក Soe Thein អនុប្រធានគ្រប់គ្រងនៃធនាគារ Asian Green Development Bank ថ្លែងថា ៖ « ជនជាតិមីយ៉ាន់ម៉ានឹងទៅប្រទេសថៃកាន់តែច្រើន ហើយការប្តូរប្រាក់ខ្យាដនឹងក្លាយជាទីផ្សារដ៏ធំមួយ » ។
ប្រទេសមីយ៉ាន់ម៉ា ថៃ វៀតណាម និងឡាវ បានពិភាក្សាអំពីសេចក្តីណែនាំនៃការធ្វើកាតតែមួយ (Single Visa) នាកិច្ចប្រជុំកាលពីខែមិថុនា ដែលនឹងអនុញ្ញាតឱ្យអ្នកធ្វើដំណើរប្រើប្រាស់កាតនេះបានក្នុងប្រទេសទាំង៤ ។
រដ្ឋមន្ត្រីក្រសួងការងារប្រទេសថៃ និងមីយ៉ាន់ម៉ា ក៏បានពិភាក្សាលើកិច្ចព្រមព្រៀង ដើម្បីផ្តល់ភាពងាយស្រួលដល់កម្មករមីយ៉ាន់ម៉ាដែលធ្វើការនៅប្រទេសថៃ ។
ធនាគារក្នុងស្រុកមានសេវាកម្មផ្តល់ជូនដល់អតិថិជន ដែលមានគម្រោងចំណាយប្រាក់នៅបរទេសរួចទៅហើយ ។ ជាក់ស្តែង ធនាគារ Aya, ធនាគារ CB និងធនាគារ Myanmar Oriental សុទ្ធតែជាធនាគារដែលបានចាប់ផ្តើមផ្តល់នូវកាតឥណទានភ្ជាប់ជាមួយនឹងសេវាកម្ម UnionPay JCB និងបណ្តាញទូទាត់ប្រាក់ជាសកល ។ បណ្តាញ JCB អនុញ្ញាតឱ្យអ្នកកាន់កាតមីយ៉ាន់ម៉ា អាចប្រើប្រាស់គណនីធនាគាររបស់ពួកគេនៅក្នុង១៩១ប្រទេស និងតំបន់ ៕
ចែករំលែកព័តមាននេះ