រាជធានីភ្នំពេញ ៖ ម្ចាស់ជ័យលាភីចំណាត់ថ្នាក់លេខ២ ប្រចាំកម្មវិធី «ផ្កាយរះក្នុងសួន» លោកជ័យ សុវ៉ាត បានប្រកាសចេញថតបទថ្មីកាលពីថ្ងៃទី២៧ សីហា ២០១៦ នៅបរិវេណសាកលវិទ្យាល័យន័រតុន ។ និស្សិតសិក្សាផ្នែកសុខាភិបាលប្រមាណ១០០នាក់ នៃសាលានោះបានស្ម័គ្រចិត្តចូលរួមសម្ដែង ដើម្បីបង្ហាញពីការលំបាករបស់ពួកគេក្នុងការសិក្សាទៅមហាជននិងចង់ឲ្យក្រុមគ្រួសារយល់ពីបញ្ហាប្រឈមនានារបស់ពួកគេ ។
លោកជ័យ សុវ៉ាត និយាយថា បទចម្រៀង«ជីវិតនិស្សិតពេទ្យ» និពន្ធទំនុកច្រៀង និងបទភ្លេងដោយរូបលោកផ្ទាល់ ។ បទនេះពីដំបូងលោកសុវ៉ាតនឹកឃើញចេះតែច្រៀងលេង ហើយដោយយល់ថា ចង្វាក់ដែលបានប្រឌិតឡើងអាចធ្វើជាបទភ្លេចល្អ ក៏សម្រេចផលិតជាបទចម្រៀង ហើយនិពន្ធទំនុកច្រៀងនិយាយពីជីវិតនិស្សិតពេទ្យ។ បទនេះនឹងបញ្ចេញនៅលើ Youtube នាថ្ងៃទី១៥ កញ្ញា ហើយក៏ជាបទដែលលោកសុវ៉ាតគ្រោងលើកយកទៅច្រៀង ក្នុងព្រឹត្តិការណ៍ប្រគំតន្ត្រីនៅសាលាន័រតុននាថ្ងៃទី១៧ កញ្ញាផងដែរ ។
លោកជ័យ សុវ៉ាត និយាយថា អត្ថន័យសំខាន់នៃបទចម្រៀងនេះគឺរៀបរាប់ពីការលំបាករបស់និស្សិតពេទ្យដែលត្រូវតស៊ូតាំងពីឆ្នាំទី១ រហូតដល់ឆ្នាំទី៨ ទម្រាំអាចបញ្ចប់ការសិក្សាបាន ។ បទនេះរំពឹងជោគជ័យ ដោយសារតែភាពជាក់ស្ដែង គឺមនុស្សតិចណាស់បានដឹងពីការលំបាករបស់និស្សិតពេទ្យ ម្យ៉ាងនិស្សិតពេទ្យនៅក្នុងប្រទេសកម្ពុជាភាគច្រើននឹងគាំទ្របទនេះ ។
ជ័យ សុវ៉ាត និយាយថា «ដោយសារខ្ញុំជានិស្សិតពេទ្យឆ្នាំទី៤ ស្រាប់ និងបានដឹងពីទុក្ខលំបាកក្នុងការសិក្សាជំនាញនេះ ទើបអាចនិពន្ធបទថ្មី ដែលឆ្លុះបញ្ចាំងពីជីវិតតស៊ូរបស់អ្នកចង់រៀនពេទ្យបាន ។ ក្រៅពីការសិក្សាជាមួយនឹងឯកសារមេរៀនដ៏ច្រើន និស្សិតខ្លះក៏ត្រូវឃ្លាតឆ្ងាយពីក្រុមគ្រួសារ ។ ការសិក្សាជំនាញផ្នែកពេទ្យ ឬវេជ្ជបណ្ឌិតត្រូវការការព្យាយាមខ្លាំង និងហ្មត់ចត់ ព្រោះតែជំនាញនេះគឺត្រូវយកទៅសង្គ្រោះជីវិតមនុស្ស ហើយអ្វីដែលខ្ញុំចង់បានមកវិញពីអ្នកទស្សនា និងអ្នកស្តាប់បទចម្រៀងនេះគឺការយល់ចិត្ត និងផ្តល់តម្លៃមកលើនិស្សិតដែលកំពុងបន្តការសិក្សាលើជំនាញដ៏លំបាកមួយ ។ ប៉ុន្តែ អ្វីដែលខ្ញុំសប្បាយចិត្តនោះ គឺខ្ញុំទទួលការចូលរួមពីនិស្សិតពេទ្យនៅក្នុងសាកលវិទ្យាល័យន័រតុនរហូតដល់១០០នាក់មកចូលសម្ដែងនៅក្នុងMVនេះ។ សកម្មភាពដែលខ្ញុំចេញថត មិនមែនជាឈុតទាំងស្រុងក្នុងបទ «ជីវិតនិស្សិតពេទ្យ»ទេ គឺលុះត្រាតែបទដែលគ្រោងនឹងប្រូម៉ូតនេះទទួលបានការគាំទ្រ ទើបខ្ញុំនឹងថតMVឲ្យពេញលេញម្ដងទៀត ហើយនឹងមានការរៀបចំឲ្យនិស្សិតពេទ្យបន្ថែមទៀតចូលរួមសម្ដែង» ។
តារាចម្រៀងជ័យ សុវ៉ាត សូមការគាំទ្រពីទស្សនិកជនសម្រាប់បទចម្រៀងថ្មី ជាស្នាដៃដំបូង ដែលលោកនិពន្ធ និងច្រៀងផ្ទាល់នេះ ៕
ចែករំលែកព័តមាននេះ