ខេត្តបាត់ដំបង ៖ យ៉ាងហោចណាស់ក្មេងប្រុស-ស្រី២នាក់ បានស្លា.ប់ដោយសារលង់ទឹក រីឯក្មេងប្រុស-ស្រី២នាក់ទៀត ត្រូវពលរដ្ឋ និងសមត្ថកិច្ចជួយសង្គ្រោះទាន់ពេលវេលា ខណៈដែលពួកគេបាននាំគ្នាចុះលេងទឹកក្នុងស្ទឹងសង្កែ នៅក្បែរវេទកាបុណ្យអុំទូក កាលពីវេលាម៉ោង០៣ និង៣០នាទីរសៀលថ្ងៃទី៣១ សីហា ក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ។
ខេត្តបាត់ដំបង ៖ យ៉ាងហោចណាស់ក្មេងប្រុស-ស្រី២នាក់ បានស្លាប់ដោយសារលង់ទឹក រីឯក្មេងប្រុស-ស្រី២នាក់ទៀត ត្រូវពលរដ្ឋ និងសមត្ថកិច្ចជួយសង្គ្រោះទាន់ពេលវេលា ខណៈដែលពួកគេបាននាំគ្នាចុះលេងទឹកក្នុងស្ទឹងសង្កែ នៅក្បែរវេទកាបុណ្យអុំទូក កាលពីវេលាម៉ោង០៣ និង៣០នាទីរសៀលថ្ងៃទី៣១ សីហា ក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ។
អធិការក្រុងបាត់ដំបងលោកប៉ាង ហៀង បានឱ្យដឹងថា ក្មេងរងគ្រោះដែលស្លាប់ ១-ឈ្មោះវ៉ាន់ ហៃ ភេទប្រុស អាយុ១០ឆ្នាំ និង២-ឈ្មោះ វឿត ណារី ភេទស្រី អាយុ១៣ឆ្នាំ រីឯក្មេង២នាក់ទៀតដែលរួចជីវិត ១-ឈ្មោះ ងួន សេរីសម្បត្តិ ភេទប្រុស អាយុ១១ឆ្នាំ ទាំង៣នាក់នេះ រស់នៅភូមិសង្កាត់កើតហេតុ និង២-ឈ្មោះ ចាន់ វឌ្ឍនា ភេទស្រី អាយុ១១ឆ្នាំ នៅភូមិរតនៈ សង្កាត់រតនៈ ក្រុងបាត់ដំបង ។
លោកអធិការបញ្ជាក់ថា ក្មេងប្រុសស្រីទាំង៤នាក់នេះ បាននាំគ្នាទៅលេងទឹក និងនាំគ្នាលេងសម្រូតខ្លួនរអិលពីមាត់ស្ទឹងចុះទៅក្នុងទឹក តែបានជ្រុលធ្លាក់ចូលកន្លែងទឹកជ្រៅ ។ គ្រានោះពួកគេបានព្យាយាមជួយគ្នា ទើបលង់ទឹកទាំងអស់គ្នា តែសំណាងល្អប្រជាពលរដ្ឋ និងសមត្ថកិច្ចប្រឹងប្រែងជួយសង្គ្រោះបានក្មេង២នាក់ រីឯ២នាក់ទៀតបានបាត់ខ្លួនពីកន្លែងកើតហេតុ លុះបន្តិចក្រោយមក ទើបគេរកឃើញ តែក្មេងនោះបានស្លាប់ទៅហើយ ។
សាក្សីដែលឃើញហេតុការណ៍បាននិយាយថា មុនពេលកើតហេតុ គេឃើញ ក្រុមក្មេងទាំង៤នាក់នោះ លេងសម្រូតខ្លួនពីលើមាត់ស្ទឹងរអិលចូលទៅក្នុងទឹកជាមួយគ្នា ។ ប៉ុន្តែបន្តិចក្រោយមកស្រាប់តែមានការភ្ញាក់ផ្អើល ដោយសារពួកគេស្រែកកងរំពងក្នុងស្ទឹងរកគេជួយ ។ សាក្សីបន្តថា ពេលនោះគេឃើញក្មេងខ្លះ កំពុងចុះទឹកព្យាយាមជួយគ្នា ហើយក៏ជ្រុលធ្លាក់ទៅកន្លែងទឹកជ្រៅបណ្ដាលឲ្យលង់ទាំងអស់គ្នា តែសំណាងល្អមានអ្នកម៉ូតូឌុប និងពលរដ្ឋនៅក្បែរនោះ មើលឃើញក៏ស្ទុះរត់ចុះទៅជួយសង្គ្រោះបានក្មេងប្រុសម្នាក់ និងស្រីម្នាក់ ប៉ុន្តែ២នាក់ទៀត បានបាត់ខ្លួនភ្លាមៗ នៅក្នុងទឹកដែរ ។ ប្រភពដដែលបញ្ជាក់ថា មនុស្សជាច្រើន បានចុះមុជទឹករាវរកក្មេងទាំង២នាក់នោះ តែមិនប្រទះទេ ។ ប៉ុន្តែក្រោយមក ពេលពលរដ្ឋយកសំណាញ់មកអូសក្នុងទឹក ទើបរកឃើញសាកសពក្មេងប្រុស ស្រីទាំង២នាក់នោះ ។
លោក ប៉ាង ហៀង អធិការក្រុងបាត់ដំបង បានបញ្ជាក់ដែរថា ទឹកស្ទឹងសង្កែហាក់មិនទាន់ឡើងខ្លាំងទេ តែមានកន្លែងខ្លះមានជម្រៅលិចក្បាល និងកន្លែងខ្លះទៀតរាក់ ។ ប៉ុន្តែទីតាំងដែលក្មេងលង់ទឹកនោះ ជាល្បាក់ជ្រៅគួរសមដែរ ទើបធ្វើឲ្យលង់បែបនេះ ។ លោកអធិការបានបន្ថែមថា ក្មេងរងគ្រោះទាំង៤នាក់នោះ សុទ្ធតែជាសិស្សសាលា ហើយក្មេងទាំង២នាក់ ដែលបានសង្គ្រោះនោះ ត្រូវបានបញ្ជូនភ្លាមៗទៅកាន់មន្ទីរពេទ្យបង្អែកខេត្ត ។ ពេលនេះពួកគេបានរួចផុតពីគ្រោះថ្នាក់ហើយ ខណៈសាកសពក្មេង២នាក់ទៀតកំពុងធ្វើបុណ្យ ក្រោមតំណក់ទឹកភ្នែកដ៏សោកសៅបំផុតនៃក្រុមគ្រួសារនិងអាណាព្យាបាល ៕
ចែករំលែកព័តមាននេះ