កាលពីថ្ងៃសៅរ៍ ទី២៧ ខែសីហា ឆ្នាំ២០១៦ ខាងមុខនេះ សភាយុវពាណិជ្ជករអន្តរជាតិកម្ពុជា បានរៀបចំព្រឹត្តិការណ៍ពាណិជ្ជកម្មដ៏ធំប្រចាំឆ្នាំរបស់ខ្លួនជាលើកទី២ ដែលហៅថា ពិព័រណ៍ធុរកិច្ចអន្តរជាតិ និងវេទិកាសហគ្រិនប្រចាំឆ្នាំ២០១៦ ក្នុងពេលតែមួយនៅសណ្ឋាគារសុខាភ្នំពេញ ចាប់ពីម៉ោង៨ព្រឹកដល់ម៉ោង៦ល្ងាច។
ព្រឹត្តិការណ៍ទាំងពីរនេះ ត្រូវបានរៀបចំឡើងក្នុងគោលបំណងជំរុញធុរៈកិច្ចក្នុងប្រទេសកម្ពុជា ក៏ ដូចជាសហប្រតិបត្តិការពាណិជ្ជកម្មជាមួយប្រទេសនានាក្នុងតំបន់។
សម្រាប់ពិព័រណ៍ធុរកិច្ច និងវេទិកាសហគ្រិនរបស់សភាយុវពាណិជ្ជករអន្តរជាតិកម្ពុជា ប្រចាំឆ្នាំ២០១៦នេះ ប្រធានបទធំៗចំនួន០៣ ត្រូវបានផ្តោតសំខាន់។ ការចូលរួមលើកកម្ពស់សេដ្ឋកិច្ច ក៏ដូចជាវិស័យធុរៈកិច្ចនៅកម្ពុជា ឲ្យបានផ្លែផ្កាជាប្រយោជន៍ដល់សង្គមកម្ពុជាទាំងមូលតាមរយៈ ៖
• បង្កើតឱកាសផ្សព្វផ្សាយម៉ាកយីហោ និងផលិតផលសេវាកម្មរបស់អាជីវកម្មក្នុងវិស័យខាងលើ
• បង្កើតឱកាសជួបគ្នារវាងម្វាស់អាជីវកម្ម និងអ្នកវិនិយោគដែលមានសក្តានុពលទាំងក្នុង និងក្រៅស្រុក
• បង្កើតឱកាសដល់អ្នកវិនិយោគក្នុងស្រុក ឬបរទេស ដើម្បីស្វែងយល់ពីឱកាសវិនិយោគលើវិស័យទាំងបីខាងលើ
• ផ្តល់ជាគំនិត និងទស្សនៈក្នុងការវិនិយោគលើវិស័យទាំងបីដោយភាពវ័យឆ្លាត
នៅក្នុងពិព័រណ៍រយៈពេលពេញមួយថ្ងៃចាប់ពីម៉ោង៩ព្រឹករហូតដល់ម៉ោង៦ល្ងាច មានស្តង់ផលិតផល និងសេវាកម្មរបស់ក្រុមហ៊ុនជាង៥០ទាំងជាតិ និងអន្តរជាតិ ដែលភាគច្រើនមកពីវិស័យ អចលនទ្រព្យ វិស័យម្ហូបអាហារ និងភេសជ្ជៈ និងវិស័យកសិកម្មសរីរាង្គ។ សម្រាប់ឆ្នាំ២០១៦ ពិព័រណ៍ធុរកិច្ចអន្តរជាតិ ទទួលបានអ្នកទស្សនាពិព័រណ៍ចំនួនជាង៦០០នាក់។
នៅក្នុងការតាំងពិព័រណ៍នេះផងដែរ យើងមានការចូលរួមពីក្រុមហ៊ុនក្នុងស្រុកល្បីដូចជា លំនៅដ្ឋានបែបទំនើប AXIS Residence សហគមន៍អេកូទំនើប សុរិនភូមិព្រឹកថ្លឹង Orkide Villa Condominium ព្រមទាំងក្រុមហ៊ុនបរទេសមួយចំនួនដូចជា ជប៉ុន សឹង្ហបូរី ម៉ាឡេស៊ី ថៃជាដើម។ ហើយរឹតតែពិសេសថែមទៀតនោះ គឺមានការចែកជូនភេសជ្ជៈដ៍ល្បីល្បាយដូចជា កាហ្វេ Brown ភេសជ្ជៈ KOI និងកាហ្វេរបស់ក្រុមហ៊ុន KOONA ដោយឥតគិតថ្លៃផងដែរ។
ចំណែកឯវេទិកាសហគ្រិនប្រចាំឆ្នាំ២០១៦ វិញ គឺនឹងចាប់ផ្តើមនៅវេលាម៉ោង៨ព្រឹករហូតដល់ម៉ោង៣រសៀល នៅសាលសន្និបាតរបស់សណ្ឋាគារសុខាភ្នំពេញដូចគ្នាផងដែរ។ នៅក្នុងឆ្នាំ២០១៦ នេះ វេទិកាសហគ្រិនរបស់ជេស៊ីអាយ នឹងពិភាក្សាទៅលើប្រធានបទ «គន្លឹះជោគជ័យ និងឱកាសវិនិយោគក្នុងវិស័យអចលនទ្រព្យ វិស័យម្ហូបអាហារ និងភេសជ្ជៈ និងវិស័យកសិកម្មសរីរាង្គ»។
ប្រធានបទនេះនឹងបែងចែកជាពីរផ្នែក គឺកិច្ចពិភាក្សាពេលព្រឹក និងពេលរសៀល។ សម្រាប់កិច្ច ពិភាក្សាស្តីវិស័យម្ហូបអាហារ និងភេស្ជជៈ និងវិស័យកសិកម្មសរីរាង្គ គឺមានវត្តមានវាគ្មិនកិត្តិយសចំនួន០៤រូប រួមមានលោក គួច សុខលី ដែលជាប្រធានសមាគមភោជនីយដ្ឋានកម្ពុជា, បណ្ឌិត តាន់ មុនីវណ្ណ អគ្គនាយករងនៃក្រុមហ៊ុន ម៉ុង ឬទ្ធីគ្រុប, លោក ចាង ប៊ុនលាង សហស្ថាបនិក Brown Coffee, លោក នាក់ ថារ៉ែន នាយកប្រតិបត្តិនៃក្រុមហ៊ុន Natural Garden និងសម្របសម្រួលដោយសហគ្រិនវ័យក្មេងពីររូប គឺកញ្ញា ដែក ដារី នាយកប្រតិបត្តិក្រុម 360 Event Management និងលោក ឃន ឈុនតារា នាយកប្រតិបត្តិនៃក្រុមហ៊ុន KOI Café។ សម្រាប់កិច្ចពិភាក្សាពេលរសៀលវិញ វាគ្មិនកិត្តិយសនឹងពិភាក្សាអំពីវិស័យអចលនទ្រព្យ ដែលវត្តមានចូលរួមពីលោក គីម ហ៊ាង ប្រធានសមាគមអ្នកវាយតម្លៃកម្ពុជា, លោក Harry ប្រធានផ្នែកលក់នៃគម្រោងសំណង់ខុនដូររបស់ក្រុមហ៊ុន Worldbridge Cambodia, លោក Kenn Yeo នាយកគ្រប់គ្រងនៃគម្រោងសំណង់ខុនដូរ Orkide Villa Condominium និងទទួលបានការសម្របសម្រួលដ៏ខ្ពង់ខ្ពស់ពីលោក សុខ ស៊ីផាណា អគ្គនាយកការិយាល័យមេធាវី សុខ ស៊ីផាណា និងជាទីប្រឹក្សារាជរដ្ឋាភិបាល។
សម្រាប់ឆ្នាំ២០១៦ នេះអ្នកចូលរួមវេទិកាសហគ្រិននេះ ចំនួន២៥០នាក់សុទ្ធតែជាពាណិជ្ជករ ក្នុងស្រុក និងក្រៅស្រុក។
ចែករំលែកព័តមាននេះ