រាជធានីភ្នំពេញ ៖ បន្ទាប់ពីបានបរាជ័យក្រោមដៃកីឡាករថៃព្រមគ្នាកាលពីជុំសន្សំពិន្ទុសប្ដាហ៍ទី១ នៅថ្ងៃសៅរ៍ទី៣ កញ្ញានេះ ការប្រកួតដណ្ដើមពិន្ទុរវាងកីឡាករម៉ន ចាន់ដារ៉ា និងឆៃ សារ៉ា របស់កម្ពុជា ជាមួយកីឡាករថៃក្នុងជុំទី២នៅក្នុងព្រឹត្តិការណ៍ដណ្ដើមខ្សែក្រវាត់់ក្រុមហ៊ុនខារ៉ាបាវនឹងដល់ទៀតហើយ។ ការប្រកួតលើកនេះ បើគេនៅតែចាញ់គឺមានន័យថាឱកាសឈានឡើងនៅមិនទាន់បាត់បង់ទេ បើទោះជាកីឡាករឌុម កែវដា បានក្លាយជាបេក្ខភាពរបស់កម្ពុជាដែលមាន៣ពិន្ទុមុនគេ។
លោក ញាណ សុធី អ្នករៀបចំកម្មវិធីប្រដាល់ប្រចាំស្ថានីយទូរទស្សន៍អាស៊ីអាគ្នេយ៍បានអះអាងថា ការប្រដាល់ដែលមានឈ្មោះថា «ប្រដាល់អន្តរជាតិ ជើងឯកខ្សែក្រវាត់ខារ៉ាបាវ»កាន់តែទាក់ទាញទ្វេដងបន្ទាប់ពីការបើកប្រកួតក្នុងសប្ដាហ៍ទី៣នេះ គឺកីឡាករកម្ពុជានឹងត្រូវគេចាំអ៊ុតមើលថានឹងអាចសម្រេចគោលដៅឬយ៉ាងណា ក្នុងពេលកីឡាករថៃដណ្ដើមបានពិន្ទនាំមុខកម្ពុជាក្នុងចំណោម៤រូប ។ លោកថា ព្រឹត្តិការណ៍នេះប្រជុំដោយវត្តមានកីឡាករវ័យក្មេង និងសុទ្ធតែខ្លាំងជាពិសេសគឺកីឡាករថៃសុទ្ធតែមានសមត្ថភាពសម្រាប់ប្រភេទទម្ងន់ ៦៣,៥គីឡូក្រាម ។ លោកបន្តថា នៅក្នុងព្រឹត្តិការណ៍នេះមានកីឡាករសរុបចំនួន៨រូបដូចជាម្ចាស់ខ្សែក្រវាត់ K-Cement ឆៃ សារ៉ា មកពីក្លិបក្រសួងការពារជាតិ កីឡាករម៉ន ចាន់ដារ៉ា មកពីក្លិបការិយាល័យទី៥កងទ័ពជើងគោក ដែលបានចាញ់ការប្រកួតរួចទៅហើយ កីឡាករ រឿម វណ្ណៈ មកពីក្លិបរាជសីហ៍ខេត្តបន្ទាយមានជ័យ និងកីឡាករ ឌុម កែវដា មកពីក្លិបមកុដរាជសីហ៍ ។ សម្រាប់កីឡាករថៃរួមមានកីឡាករ Aram Boy កីឡាករ Pha Yaklek កីឡាករ Pravit និងកីឡាករ Yort Sayam។ នៅរសៀលម៉ោង២ដែលនឹងចាប់ផ្ដើមប្រកួតសន្សំពិន្ទុសប្ដាហ៍ទី៣បើកឆាកនៅប៉ុន្មានម៉ោងដ៏ខ្លីនេះ កីឡាករ៤រូបនឹងឡើងប្រកួតគ្នា ។ លោកថា ព្រឹត្តិការណ៍ប្រដាល់ខារ៉ាបាវនេះកីឡាករកម្ពុជា និងថៃដ្បិតថាឈរពូលផ្សេងគ្នា ប៉ុន្តែពួកគេត្រូវប្រកួតគ្នាទៅវិញទៅមក ហើយទើបប្រមូលពិន្ទុដើម្បីជ្រើសយកកីឡាករថៃ និងកីឡាករកម្ពុជាដែលមានពិន្ទុខ្ពស់ក្នុងពូលរៀងខ្លួនដើម្បីឡើងទៅវគ្គបន្ត។
សមាសភាពអ្នកមានមុខឡើងប្រកួតបើកឆាកថ្ងៃនេះរួមមាន ម៉ន ចាន់ដារ៉ា ប៉ះប្រកួតជាមួយកីឡាករថៃឈ្មោះ Aram Boy និងកីឡាករជាម្ចាស់ក្រវាត់ K-Cement ឆៃ សារ៉ា ប៉ះប្រកួតជាមួយកីឡាករថៃឈ្មោះ Pha Yaklek ។ ជំនួបរវាងពួកគេសុទ្ធតែមានអ្នកគាំទ្ររៀងខ្លួនយល់ថានឹងអាចដណ្ដើមបាន៣ពិន្ទុមុនមិនខុសគ្នា ដោយសារតែកីឡាករម្ខាងៗសុទ្ធតែមានក្រេឌីតមិនណយដូចគ្នា ។ ទោះបីយ៉ាងណា មានការទុកចិត្តចំពោះកីឡាករកម្ពុជាមិនច្រើនដូចមុននោះទេ បន្ទាប់ពីការប្រកួតបើកឆាកក្នុងព្រឹត្តិការណ៍ខារ៉ាបាវ ពួកគេសុទ្ធតែចាញ់កីឡាករថៃ ។ សម្រាប់គូ ម៉ន ចាន់ដារ៉ា ភាគច្រើនមានសង្ឃឹមមិនសូវខ្ពស់ទេថានឹងទាញបាន៣ពិន្ទុនៅថ្ងៃសៅរ៍នេះ ផ្អែកតាមលទ្ធភាពរបស់កីឡាករថៃគឺមិនធម្មតានៅលើសង្វៀន ។ អ្នកគាំទ្រខ្លះមិនយល់ដូច្នោះនោះទេ បន្ទាប់ពីកីឡាករ ម៉ន ចាន់ដារ៉ា ក៏មានប្រវត្តិបំបាក់កីឡាករថៃខ្លាំងៗលើសង្វៀនទូរទស្សន៍អាស៊ីអាគ្នេយ៍រាប់មិនអស់ដូចគ្នា ។ គេជឿជាក់ថាការបរាជ័យរកមិនបាន៣ពិន្ទុនៅជុំបើកឆាក អាចជាការកើតចេញពីការភ្លាត់ស្នៀតច្រើនជាងបច្ចេកទេស ។ ក្រុមអ្នកយល់ឃើញបែបនោះ គិតថា ម៉ន ចាន់ដារ៉ា នឹងមិនយកមុខមាត់ទៅចាក់ចោលកណ្ដាលរេញខារ៉ាបាវនៅជុំទី២នោះឡើយ ដ្បិតបើចាញ់មួយប្រកួតទៀត គឺទោះជានៅមានសង្ឃឹម ក៏សង្ឃឹមមិនច្រើន ។ កីឡាករ ម៉ន ចាន់ដារ៉ា ធ្លាប់ប្រកួតបាន៦២លើក ឈ្នះ៥០លើក ចាញ់១១លើក និងស្មើ១លើក ក្នុងពេលដែលកីឡាករថៃប្រកួតបានរហូតដល់៦៨លើក ឈ្នះ៥៥លើក និងចាញ់១៣លើក។
មួយគូទៀតគឺជាជំនួបរវាងកីឡាករ ឆៃ សារ៉ា និងកីឡាករថៃឈ្មោះ Pha Yaklek ។ គូនេះក៏មានអ្នកទាយមិនខុសគ្នានោះដែរ បន្ទាប់ពីកីឡាករកម្ពុជារកមិនបាន៣ពិន្ទុក្នុងជុំដំបូង។
ឆៃ សារ៉ា ដ្បិតថាក្មេង និងខ្ចីបទពិសោធន៍ តែគេជាម្ចាស់ខ្សែក្រវាត់ គឺមិនគួរប្រកួត២លើកយក៣ពិន្ទុមិនបានពីថៃនោះទេ។ កីឡាករថៃធ្លាប់ប្រកួតបាន៦៩លើក ឈ្នះ៥៨លើក និងចាញ់១១លើក ក្នុងពេលដែលកីឡាករកម្ពុជាធ្លាប់ប្រកួតបាន៦០លើក ឈ្នះ៤៨លើក ចាញ់១១លើក និងស្មើ១លើក ៕
ចែករំលែកព័តមាននេះ