រាជធានីភ្នំពេញ ៖ ពេជ្រ សីហា មកពីសមាគមកីឡាប្រដាល់ក្រសួងការពារជាតិ និងសរ រាជសីហ៍ មកពីក្លិបមោងឬស្សីមរតកគុនខ្មែរកំពុងត្រៀមកណ្តាប់ដៃឡើងវ៉ៃលើសង្វៀនទូរទស្សន៍ PNN
រាជធានីភ្នំពេញ ៖ ពេជ្រ សីហា មកពីសមាគមកីឡាប្រដាល់ក្រសួងការពារជាតិ និងសរ រាជសីហ៍ មកពីក្លិបមោងឬស្សីមរតកគុនខ្មែរកំពុងត្រៀមកណ្តាប់ដៃឡើងវ៉ៃលើសង្វៀនទូរទស្សន៍ PNN នៅថ្ងៃអាទិត្យ ទី៤ កញ្ញា ដើម្បីដណ្តើមកៅអីប្រកួតនៅវគ្គផ្ដាច់ព្រ័ត្រយកខ្សែក្រវាត់ជើងឯកជាមួយឡុង សុវណ្ណឌឿន មកពីក្លិបសាលវ័ន្តកីឡាដែលកំពុងតែរង់ចាំរួចជាស្រេច ។
កាលពីសប្ដាហ៍មុន ឡុង សុវណ្ណឌឿន បានឡើងអង្គុយកៅអីវគ្គផ្ដាច់ព្រ័ត្រមុនគេបន្ទាប់ពីបានយកឈ្នះ ឡេះ តើក មកពីក្លិបពុទ្ធសេរីវង្សព្រែកតាទែន ដោយពិន្ទុ និងកំពុងតែរង់ចាំប្រកួតជាមួយអ្នកឈ្នះក្រោយជំនួបរវាង ពេជ្រ សីហា និងសរ រាជសីហ៍ ។
សរ រាជសីហ៍ មួយរយៈមកនេះថ្វីដៃប្រកួតនៅលើសង្វៀនរបស់គេធ្វើឱ្យអ្នកគាំទ្រចាប់អារម្មណ៍យ៉ាងខ្លាំងតាមរយៈការយកឈ្នះគូប្រកួតដែលសុទ្ធតែជាជើងខ្លាំងលំដាប់ជួរមុខ។ ដោយមានបទពិសោធន៍ប្រកួតយូរឆ្នាំធ្វើឱ្យកីឡាកររូបនេះមានស្នៀតគុនកាន់តែសម្បូរបែប ទាំងស្នៀតកែងនិងជង្គង់ អាចប្រើការបានយ៉ាងស្ទាត់ជំនាញ ចិត្តក៏សឿង កម្លាំងក៏ខ្លាំង ពេលវាយចេញម្ដងៗបង្កគ្រោះថ្នាក់ដល់គូប្រកួតខ្លាំងណាស់ ។
ទោះបីយ៉ាងណា បើប្រៀបធៀបជាមួយកីឡាករពេជ្រ សីហា គឺមិនលើសគ្នាប៉ុន្មានឡើយ គ្រាន់តែមួយរយៈមកនេះ កម្លាំងរបស់គេ ហាក់ដូចជាស្រុតចុះជាងមុនបន្តិច ។ បើសិនជាគេនៅខ្លាំងដូចមុនវិញសរ រាជសីហ៍ មិនមែនជាដៃគូរបស់គេឡើយ ។ កាលពីមុន ពេជ្រ សីហា ត្រូវគេផ្ដល់រហស្សនាមថា ជាកំពូលអ្នកប្រដាល់កណ្ដាប់ដៃដែក ព្រោះពេលវាយចេញម្ដងៗកម្រខុសគោលដៅ និងមានទម្ងន់ធ្ងន់ទៀតផង។ ចំណែកស្នៀតកែងនិងជង្គង់របស់គេវិញអាចប្រើការបានគ្រប់ស្ថានការណ៍ធ្វើឱ្យគូប្រកួតខ្លាចរអាគ្រប់គ្នាពេលជួបគេម្ដងៗ ។ ប៉ុន្តែភាពខ្លាំងរបស់កីឡាកររូបនេះនៅពេលនេះមិនដូចមុនទៀតទេ ទើបអ្នកដែលធ្លាប់គាំទ្រពីមុនមក ហាក់អល់អែកក្នុងការផ្ដល់ទំនុកចិត្តទៅលើ
កីឡាករ ពេជ្រ សីហា សម្រាប់ការមកប៉ៈជាមួយកីឡាករ សរ រាជសីហ៍ លើកនេះ។ អ្នកគាំទ្រកីឡាករទាំងពីរកំពុងរង់ចាំមើលយ៉ាងអន្ទះសារការប្រកួតរវាងកីឡាករ
សរ រាជសីហ៍ និងពេជ្រ សីហា ដែលសុទ្ធតែជាជើងខ្លាំងលំដាប់ជួរមុខដូចគ្នា តើនរណាមានវាសនាបានឡើងទៅប្រកួតនៅវគ្គផ្ដាច់ព្រ័ត្រដណ្ដើមខ្សែក្រវាត់ជើងឯកជាមួយកីឡាករឡុង សុវណ្ណឌឿន ។
ក្រៅពីគូដណ្ដើមខ្សែក្រវាត់មួយគូនេះទៅនៅលើសង្វៀនដដែលក៏មានការប្រកួតលក្ខណៈមិត្តភាពរវាងកីឡាករកម្ពុជា-ថៃចំនួន២គូ និងការប្រកួតលក្ខណៈម៉ារ៉ាតុនចំនួន២គូទៀតផងដែរ ។ គូប្រកួតមិត្តភាពកម្ពុជា ថៃមានកីឡាករហ៊ឹម សេរី មកពីសមាគមកីឡាប្រដាល់ក្រសួងការពារជាតិ ប្រកួតជាមួយកីឡាករថៃឈ្មោះPhong Saklek Sith je’Leang ក្នុងប្រភេទទម្ងន់៥៤គីឡូក្រាម និងកីឡាករ អាំង សំអាត មកពីក្លិបតាព្រហ្មមានជ័យ ប្រកួតជាមួយកីឡាករថៃឈ្មោះMunsovan Dam ក្នុងប្រភេទទម្ងន់៥៤គីឡូក្រាមដូចគ្នា ។ ដោយឡែកការប្រកួតលក្ខណៈម៉ារ៉ាតុនវិញតម្រូវទៅលើកីឡាករ ជឹម តារ៉ា មកពីក្លិបសាលវ័ន្តកីឡា ប្រកួតជាមួយកីឡាករ ចាន់ រក្សា មកពីក្លិបអេ ភូថងកីឡា និងគូចុងក្រោយកីឡាករ ឆាយ មាស មកពីក្លិបសំរោងកោងកីឡាខេត្តបាត់ដំបង ប្រកួតជាមួយ កីឡាករ ផាន់ សារុន មកពីក្លិបគជសារកីឡា៕
ចែករំលែកព័តមាននេះ