រាជធានីភ្នំពេញ ៖ ប្រភពពីលោកគ្រូពេទ្យម្នាក់ឱ្យកោះសន្តិភាពដឹងនៅព្រឹកថ្ងៃទី០១ កញ្ញា ២០១៦ នេះថា ជនរងគ្រោះប្រុស-ស្រីដែលពុលរហូតដល់សន្លប់នៅក្នុងខារ៉ាអូខេ «ញូវហ្សឺលែន» ក្បែរផ្សារមាន់អាំងមានចំនួន៨នាក់
រាជធានីភ្នំពេញ ៖ ប្រភពពីលោកគ្រូពេទ្យម្នាក់ឱ្យកោះសន្តិភាពដឹងនៅព្រឹកថ្ងៃទី០១ កញ្ញា ២០១៦ នេះថា ជនរងគ្រោះប្រុស-ស្រីដែលពុលរហូតដល់សន្លប់នៅក្នុងខារ៉ាអូខេ «ញូវហ្សឺលែន» ក្បែរផ្សារមាន់អាំងមានចំនួន៨នាក់ ហើយត្រូវបញ្ជូនមកសង្គ្រោះនៅមន្ទីរពេទ្យកាល់ម៉ែត គឺកំពុងបន្តដាក់ស្នប់ខ្យល់សិប្បនិមិត្ត ដើម្បីជំនួយក្នុងការដកដង្ហើមនៅឡើយ ។ អាចទេ? មូលហេតុពុល ធ្ងន់ធ្ងរក្នុងហាងខារ៉ាអូខេយប់មិញគឺ…
ប្រភពឱ្យដឹងទៀតថា មនុស្ស៦នាក់ត្រូវបានបញ្ជូនទៅអគាររ៉េអាបេ ដើម្បីសង្គ្រោះបន្ទាន់ ដែលពួកគេមិនទាន់អាចនិយាយបាននៅឡើយ ទាល់តែយើងយកដៃក្តិចសាច់ ទើបគេបើកភ្នែកឡើង ។ រីឯដៃជើងមិនអាចលើកបានឡើយ ហើយក៏មិនទាន់ដឹងខ្លួនស្រួលដែរ ។ និយាយជារួម ពួកគេស្ថិតក្នុងស្ថានភាពធ្ងន់ធ្ងរ និងត្រូវការស្នប់ខ្យល់ដាក់ជំនួយ មិនអាចអត់បានឡើយនាពេលនេះ ។
លោកវេជ្ជបណ្ឌិតម្នាក់សុំមិនបញ្ចេញឈ្មោះឱ្យដឹងថា «បើសិនជាទាំង៨នាក់ ដែលត្រូវគេអះអាងថា បានពុលកាហ្វេលាយស្រាបៀរនោះ វាមិនអាចនោះទេ ព្រោះពេលបញ្ជូនមកដល់មន្ទីរពេទ្យ គឺស្ថិតក្នុងស្ថានភាពធ្ងន់បំផុតទៅហើយ ដោយម្នាក់ៗជិតដាច់ខ្យល់ទៅហើយ ។ ដូច្នេះ ទាមទារឱ្យគ្រូពេទ្យ ត្រូវតែដាក់ស្នប់ខ្យល់ ជាជំនួយក្នុងដកដង្ហើម តែអាចថា ពួកគេប្រើប្រាស់សារជាតិអ្វីម្យ៉ាងហួសកម្រិត ទើបបណ្តាលឱ្យសន្លប់ធ្ងន់បែបនេះ ។
គិតមកដល់រសៀលថ្ងៃដដែលនេះ ពួកគេនៅតែដាក់ស្នប់ខ្យល់ជាជំនួយ ក្នុងដកដង្ហើមដដែល ហើយក្រុមគ្រូពេទ្យ កំពុងតែធ្វើការ យកចិត្តទុយដាក់បំផុត ក្នុងការស្រាវជ្រាវរកមូលហេតុនៃសារជាតិពុលទៅលើមនុស្សប្រុស-ស្រីទាំង៨នាក់នេះផង ។
គួររំលឹកថា មានការភ្ញាក់ផ្អើលមួយ ភ្ញៀវប្រុស៦នាក់ និងបុគ្គលិកស្រី២នាក់បានពុល ដោយមិនដឹងជាពុលស្រា ឬអាហារ បណ្តាលឱ្យសន្លប់ ហើយត្រូវបញ្ជូនទៅសង្គ្រោះបន្ទាន់ដឹកទៅកាន់មន្ទីរពេទ្យកាល់ម៉ែត ដែលហេតុការណ៍នេះកើតឡើងនៅហាង ខារ៉ាអូខេ «ញូវហ្សេលែន» ជិតផ្សារមាន់អាំង តាមបណ្តោយផ្លូវលេខ៣១៥ សង្កាត់បឹងកក់២ ខណ្ឌទួលគោក រាជធានីភ្នំពេញ កាលពីវេលាម៉ោង១០យប់ថ្ងៃទី៣០ ខែសីហា ឆ្នាំ២០១៦ ។
ជនរងគ្រោះត្រូវគេស្គាល់ ១-ឈ្មោះនេត កុសល ភេទប្រុស អាយុ៤២ឆ្នាំ ស្នាក់នៅសង្កាត់មានជ័យ ខណ្ឌមានជ័យ ២-ឈ្មោះសូ
សំអុល ភេទប្រុស អាយុ៥២ឆ្នាំ ៣-ឈ្មោះចាន់ ទ្រា ភេទស្រី អាយុ២២ឆ្នាំ ជាបុគ្គលិកហាង ៤-ឈ្មោះអ៊ុំ ចាន់ថន ភេទប្រុស អាយុ ៤៣ឆ្នាំ ៥-ឈ្មោះជុំ សុភី ភេទស្រី អាយុ២៩ឆ្នាំ ជាបុគ្គលិកហាង និង៦-ឈ្មោះគឹម ស៊ន ភេទប្រុស អាយុ៣៨ឆ្នាំ និង២នាក់ទៀតមិនបញ្ចេញឈ្មោះទេ ។
ចែករំលែកព័តមាននេះ