រាជធានីភ្នំពេញ ៖ ក្រុមហ៊ុនអាកាសចរណ៍All Nippon Airways (ANA) នឹងបើកការហោះហើរត្រង់ពីអាកាសយានដ្ឋានអន្តរជាតិ ណារីតា ប្រទេសជប៉ុន មកកាន់រាជធានីភ្នំពេញ នៅថ្ងៃនេះ ដើម្បីបម្រើសក្ដានុពលអ្នកធ្វើដំណើរទៅមកកម្ពុជា-ជប៉ុន ពិសេសភ្ញៀវទេសចរ និងបណ្ដាវិនិយោគិន ។ ក្រុមហ៊ុនអាកាសចរណ៍ដ៏ធំបំផុតរបស់ជប៉ុនមួយនេះ នឹងផ្ដល់ការហោះហើរ៧ជើងក្នុង១សប្ដាហ៍ ដោយប្រើប្រាស់ប្រភេទយន្ដហោះប៊ូអីុង ៧៨៧-៨ ។
ការហោះហើរត្រង់មកកាន់រាជធានីភ្នំពេញនាពេលនេះ នឹងទាក់ទាញតម្រូវការយ៉ាងខ្លាំងពីអ្នកជំនួញ ក៏ដូចជាបង្កើនចំនួនក្រុមហ៊ុនជប៉ុនដែលបានពង្រីកខ្លួនយ៉ាងឆាប់រហ័សនៅកម្ពុជា ខណៈដែលបច្ចុប្បន្ន ក្រុមហ៊ុនជប៉ុនកំពុងបណ្ដាក់ទុននៅកម្ពុជាមានចំនួន២៧១ បើធៀបនឹងឆ្នាំ២០១០ មានប្រមាណតែ៥០ក្រុមហ៊ុនប៉ុណ្ណោះ ។
តាមសេចក្ដីប្រកាសព័ត៌មានរបស់ក្រុមហ៊ុន ANA យន្ដហោះនឹងចាកចេញពីអាកាសយានដ្ឋានអន្តរជាតិណារីតានៅវេលាម៉ោង ១០ និង៥០នាទីព្រឹកថ្ងៃទី១ កញ្ញានេះ និងមកដល់រាជធានីភ្នំពេញ នៅវេលាម៉ោង៣ និង១០នាទីរសៀលក្នុងថ្ងៃដដែល ហើយត្រឡប់ពីភ្នំពេញវិញនៅ១០ និង៥០នាទីយប់ និងធ្វើការចុះចតនៅព្រលានយន្ដហោះណារីតា នៅម៉ោង៦និង៤៥នាទីព្រឹកថ្ងៃទី២ កញ្ញា ។
ការចាប់ផ្ដើមប្រតិបត្តិការហោះហើរត្រង់នាពេលនេះ ក្រុមហ៊ុនបានសម្លឹងឃើញពីតម្រូវការប្រកបដោយនិរន្ដរភាពទៅលើភ្ញៀវទេសចរជប៉ុនដែលមកទស្សនាប្រាសាទអង្គរ និងតំបន់ទេសចរណ៍ល្បីៗផ្សេងទៀតនៅកម្ពុជា ។ ក្នុងនោះក៏សង្ឃឹមថា ចំនួនភ្ញៀវទេសចរកម្ពុជានឹងទៅទស្សនាប្រទេសជប៉ុនមានការកើនឡើងនាពេលអនាគតផងដែរ ខណៈដែលសន្ទុះនៃប្រជាជនខ្មែរដែលធ្វើដំណើរទៅក្រៅប្រទេសកំពុងមានកំណើនខ្លាំង ។
តាមរបាយការណ៍ក្រសួងទេសចរណ៍ ក្នុងរយៈពេល៦ខែដើមឆ្នាំ២០១៦នេះ ភ្ញៀវទេសចរជប៉ុនដែលមកទស្សនាកម្ពុជាមានចំនួន៩០.៨៧៧នាក់ កើនឡើង០,៣% បើធៀបនឹងរយៈពេលដូចគ្នាកាលពីឆ្នាំ២០១៥ មានចំនួន៩០.៦២៧នាក់ ឈរក្នុងលំដាប់ទី៧ ក្នុងចំណោមទីផ្សារអាទិភាពធំៗទាំង១០ ។ ចំណែក ប្រជាជនខ្មែរដែលធ្វើដំណើរទៅក្រៅប្រទេសមានចំនួន៦៩៩.៦៥៤នាក់ កើនឡើង២៦,៥%បើធៀបនឹងរយៈពេលដូចគ្នាកាលពីឆ្នាំ២០១៥ ។
វត្តមាននៃក្រុមហ៊ុនអាកាសចរណ៍ANA នាពេលនេះ ក៏ទទួលបានការសាទរពីរាជរដ្ឋាភិបាល និងជាជោគជ័យនៃកិច្ចព្រមព្រៀងស្ដីពីសេវាកម្មដឹកជញ្ជូនតាមផ្លូវអាកាស រវាងប្រទេសទាំងពីរផងដែរ ។ ការហោះហើរត្រង់រវាងរាជធានីទាំងពីរ នឹងដើរតួនាទីដ៏សំខាន់ក្នុងការលើកកម្ពស់បន្ថែមទៀតដល់កំណើននៃការដឹកជញ្ជូនទំនិញតាមផ្លូវអាកាស ទេសចរណ៍ ពាណិជ្ជកម្ម វប្បធម៌ និងការតភ្ជាប់ប្រជាជន និងប្រជាជននៃប្រទេសទាំងពីរ ។
លោក គូម៉ាម៉ារូ យូជិ ឯកអគ្គរាជទូតជប៉ុនប្រចាំកម្ពុជា បានសម្ដែងការស្វាគមន៍យ៉ាងកក់ក្ដៅចំពោះការហោះហើរត្រង់ជាប្រចាំរវាងប្រទេសជប៉ុន និងប្រទេសកម្ពុជា នាពេលនេះ ។
លោកឯកអគ្គរាជទូតថ្លែងថា នៅថ្ងៃទី១ កញ្ញា នេះ ការហោះហើរត្រង់របស់ក្រុមហ៊ុនAll Nippon Airway (ANA) នឹងចាប់ផ្ដើមការហោះហើរជាប្រចាំថ្ងៃរវាងទីក្រុងតូក្យូ និងទីក្រុងភ្នំពេញ ដែលនឹងនាំឲ្យប្រទេសជប៉ុន ខិតមកកាន់តែជិតថែមមួយកម្រិតទៀត ។
លោកថ្លែងបន្ដថា ៖ « ការហោះហើររវាងប្រទេសទាំងពីរ គឺជាក្ដីស្រមៃដ៏ធំផុតរបស់ប្រជាជននៃប្រទេសទាំងពីរជាយូរមកហើយ ។ ខ្ញុំមានក្ដីរីករាយដែលក្ដីស្រមៃនេះបានក្លាយជាការពិតនៅទីបំផុត ។ ខ្ញុំសូមថ្លែងអំណរគុណចំពោះអ្នកទាំងអស់គ្នា រួមទាំងភាគីជប៉ុន និងភាគីកម្ពុជា ដែលបានជួយឲ្យគម្រោងនេះកើតមានឡើង។ ខ្ញុំមានក្ដីជឿជាក់ថា ការហោះហើរត្រង់ជារៀងរាល់ថ្ងៃរវាងទីក្រុងភ្នំពេញ និងទីក្រុងតូក្យូ នឹងនាំឲ្យទំនាក់ទំនងទ្វេភាគីរបស់យើង រំកិលទៅកាន់កម្រិតដ៏ថ្មីសន្លាងមួយទៀត ។ ចំនួនប្រជាជនដែលធ្វើដំណើរចុះឡើងរវាងប្រទេសទាំងពីរ នឹងកាន់តែច្រើនទៅតាមគោលបំណងនៃការធ្វើដំណើររបស់ពួកគេ» ។
ក្នុងពិធីប្រគល់អាជ្ញាប័ណ្ណហោះហើរជូនក្រុមហ៊ុនអាកាសចរណ៍ ANA កាលពីខែឧសភា កន្លងមក លោកបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី ក៏បានសម្ដែងការសាទរផងដែរថា ៖ « ក្នុងនាមឱ្យរាជរដ្ឋាភិបាលកម្ពុជា ខ្ញុំសូមអបអរសាទរចំពោះការហោះហើរត្រង់រវាងប្រទេសយើងទាំងពីរ ជាពិសេស ការតភ្ជាប់ផ្លូវអាកាសរវាងរាជធានីទាំងពីរ គឺទីក្រុងតូក្យូ និងរាជធានីភ្នំពេញ » ។
បើតាមលោកស្រីកាអូរិ តាណាបេ លេខាទី២ប្រចាំស្ថានទូតជប៉ុននៅកម្ពុជា បានថ្លែងថា ៖ « ដោយសារបច្ចុប្បន្នមានក្រុមហ៊ុនផ្ដល់សេវាកម្ម ផ្សារទំនើប និងភោជនីយដ្ឋានជប៉ុនជាច្រើនកំពុងមានវត្តមាននៅកម្ពុជា ការបើកការហោះហើរត្រង់របស់ក្រុមហ៊ុនANAនាពេលនេះ សង្ឃឹមថា នឹងទាក់ទាញវិនិយោគិនមកបណ្ដាក់ទុនវិនិយោគនៅកម្ពុជាបន្ថែមទៀត ក៏ដូចជាជួយជំរុញកំណើនភ្ញៀវទេសចរនៃប្រទេសទាំងពីរកម្ពុជា-ជប៉ុន » ។
គួររំឭកថា កាលពីខែមករា ឆ្នាំ២០១៥ រាជរដ្ឋាភិបាលនៃប្រទេសទាំងពីរកម្ពុជា-ជប៉ុន បានចុះអនុស្សរណៈស្ដីពីការហោះហើរ ដែលបើកផ្លូវឲ្យមានប្រតិបត្តិការជើងហោះហើរនេះ។ ការហោះហើរត្រង់ពីប្រទេសជប៉ុនមកកម្ពុជា ត្រូវបានគេរំពឹងថា អាចសន្សំសំចៃពេលវេលាបានច្រើន ដែលជាធម្មតា ការហោះហើរពីប្រទេសជប៉ុនមកកម្ពុជា ត្រូវឆ្លងកាត់ប្រទេសថៃ វៀតណាម ឬប្រទេសកូរ៉េខាងត្បូង ។
បច្ចុប្បន្ន អាកាសយានដ្ឋានអន្តរជាតិទាំង៣របស់កម្ពុជា គឺភ្នំពេញ សៀមរាប និងក្រុងព្រះសីហនុ កំពុងតែបម្រើសេវាដល់ក្រុមហ៊ុនអាកាសចរណ៍បរទេសចំនួន២៩ក្រុមហ៊ុន និងក្រុមហ៊ុនក្នុងស្រុកចំនួន៤ដែលធ្វើការហោះហើរជាង២០០ជើងក្នុងមួយថ្ងៃ។ ក្រុមហ៊ុនអាកាសចរណ៍ All Nippon Airway នឹងក្លាយជាក្រុមហ៊ុនអាកាសចរណ៍បរទេសទី៣០ដែលដំណើរការនៅក្នុងព្រះរាជាណាចក្រកម្ពុជា ៕
ចែករំលែកព័តមាននេះ