មនុស្សម្នាបាត់ខ្លួន ខណៈក្រឡាប់រថយន្តស្ទួច
ខេត្តស្ទឹងត្រែង ៖ រថយន្តស្ទួចមួយគ្រឿងបានក្រឡាប់ធ្លាក់ចូលស្នាមភ្លោះនៅចំណុចផ្លូវលេខ៧ និងលេខ៩ភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង បណ្តាលឲ្យខូចខាតរថយន្តមធ្យម
ខេត្តស្ទឹងត្រែង ៖ រថយន្តស្ទួចមួយគ្រឿងបានក្រឡាប់ធ្លាក់ចូលស្នាមភ្លោះនៅចំណុចផ្លូវលេខ៧ និងលេខ៩ភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង បណ្តាលឲ្យខូចខាតរថយន្តមធ្យម ចំណែកមនុស្សរងរបួសស្រាល។ អ្នកធ្វើដំណើរតាមផ្លូវជាតិខាងលើនាព្រឹកព្រលឹមថ្ងៃទី៣១សីហា២០១៦ បានប្រទះឃើញរថយន្តមួយគ្រឿងក្រឡាប់ចូលស្នាមភ្លោះ តែពួកគេមិនដឹងថារថយន្តខាងលើក្រឡាប់នៅថ្មើរណានោះទេ ចំណែកមនុស្សម្នាដែលពាក់ព័ន្ធនឹងរថយន្តក៏មិននៅកន្លែងកើតហេតុនោះដែរ ដោយគេសង្ស័យថាមនុស្សទាំងនោះអាចបញ្ជូនគ្នាទៅរកពេទ្យព្យាបាលរបួស ឬទៅទំនាក់ទំនងសុំជំនួយមកអូសទាញរថយន្តឡើងវិញ។
ប្រភពព័ត៌មានពីកន្លែងកើតហេតុគេបានសន្និដ្ឋានថា រថយន្តស្ទួចនោះធ្វើដំណើរតាមផ្លូវជាតិលេខ៩មកពីខេត្តព្រះវិហារ លុះដល់ចំណុចផ្លូវបំបែកក្រុងស្ទឹងត្រែងបត់ស្តាំទៅផ្លូវលេខ៧ក៏ក្រឡាប់ធ្លាក់ចូលស្នាមភ្លោះ ដោយសារតែអ្នកបើកបរប្រើប្រាស់ល្បឿនលឿនដល់ផ្លូវបត់បួងចង្កូតមិនទាន់ទើបក្រឡាប់បែបនេះ។ ប្រភពដដែលបន្តថានៅចំណុចផ្លូវបំបែកនោះជាផ្លូវកែងអក្សតេបត់ខ្លាំង ហើយមើលមិនដឹងថាជាផ្លូវបត់ដោយសារបាំងដើមឈើ ចំណែកស្លាកសញ្ញាផ្លូវបំបែកប្រកៀកនឹងផ្លូវបត់ដែលធ្វើឲ្យអ្នកបើកបរគ្រប់គ្នាខ្វះស្មារតីប្រុងប្រយ័ត្នបណ្តាលគ្រោះថ្នាក់បែបនេះ។
ទាក់ទិនហេតុការណ៍គ្រោះថ្នាក់ចរាចណ៍ខាងលើនោះ គេពុំបានឃើញមន្ត្រីនគរបាលចរាចណ៍ណាម្នាក់ចុះទៅត្រួតពិនិត្យលើមូលហេតុនៃគ្រោះថ្នាក់នោះទេ ចំណែករថយន្តគ្រោះថ្នាក់នោះក៏ពុំមានមនុស្សនៅរង់ចាំដែរ។ តាមការជាក់ស្តែងរថយន្តខាងលើនោះជាប្រភេទរថយន្តស្ទួចម៉ាកហ៊ីយ៉ាន់ដាយ ពណ៌ស បាញ់ថ្នាំពណ៌ស្លាទុំលាយ ពាក់ស្លាកលេខភ្នំពេញ ៣C-៧១៣៣។ គួរបញ្ជាក់ថារថយន្តជាច្រើនគ្រឿងសុទ្ធសឹងជាប្រភេទរថយន្តធុនធំដែលបើកបរតាមផ្លូវជាតិលេខ៩បត់ស្តាំឆ្លងផ្លូវលេខ៧ឆ្ពោះទៅអូរពង់ ភូមិរាជានុកូល សង្កាត់ស្ទឹងត្រែង តែងខ្វះការប្រុងប្រយ័ត្ន និងក្រឡាប់ជាញឹកញាប់ដោយសារកត្តាអ្នកបើកបរប្រើប្រាស់ល្បឿនលឿន និងកត្តាផ្លូវបំបែករៀងជាអក្សតេ បត់ខ្លាំងបាំងដើមឈើមើលផ្លូវមិនឃើញទើបយកចង្កូតមិនទាន់ ក៏ក្រឡាប់តែម្តង។
មតិមួយចំនួនពីក្រុមអ្នកបើកបរថានៅចំណុចផ្លូវអក្សតេនោះពុំគួរដាំដើមឈើអមផ្លូវនោះទេគួរកាប់ដើមឈើនោះចោលហើយដាក់ជំនួសនូវបង្គោលបិទចំណាំងផ្លាតវិញទើបនៅពេលយប់អ្នកបើករបរដឹងបានថាជាផ្លូវអក្សតេ ហើយដើមឈើទាំងនោះវាមិនមានផលប្រយោជន៍ដល់អ្នកបើកបរតែវាធ្វើឲ្យគ្រោះថ្នាក់វិញ។ គេកត់សម្គាល់ថារាល់ករណីរថយន្តធុនធំក្រឡាប់នៅចំណុចផ្លូវបំបែកនោះគេមិនដែលឃើញមន្ត្រីនគរបាលចរាចណ៍ណាម្នាក់នៅពិនិត្យ និងវាស់វែងនោះទេ តែប្រសិនរថយន្តទាំងនោះមានបង្កប់ឈើ ទើបមានអ្នកសម្របសម្រួលវាស់វែង៕
ចែករំលែកព័តមាននេះ