ខេត្តកំពង់ធំ ៖ កាលរសៀលថ្ងៃទី៣១ ខែសីហា ឆ្នាំ២០១៦នេះ ស្ថិតនៅតាមបណ្តោយផ្លូវជាតិលេខ៧១ ក្នុងភូមិត្រស់ ឃុំបល្ល័ង្ក ស្រុកបារាយណ៍ មានករណីគ្រោះថ្នាក់ចរាចរណ៍មួយរវាងរថយន្តកូរ៉ូឡាមួយគ្រឿងបុកជាមួយនឹងម៉ូតូមួយគ្រឿង បណ្ដាលឲ្យអ្នកបើកបរម៉ូតូរងរបួសជាទម្ងន់។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្តកូរ៉ូឡាពណ៌ខ្មៅមួយគ្រឿង ពាក់ស្លាកលេខភ្នំពេញ 2S-5914 បើកបរក្នុងល្បឿនយ៉ាងលឿនពីលិចទៅកើតបញ្ច្រាសទិសដៅគ្នាជាមួយនឹងម៉ូតូសេ១២៥ ពណ៌ក្រហម ពាក់ផ្លាកលេខ បាត់ដំបង1L-3120 ដែលជិះអែបខាងផ្លូវរបស់គេ ខណៈនោះស្រាប់តែរថយន្តបង្កមិនដឹងជាមូលហេតុអីបានជាបើកជ្រុលចង្កូតទៅបុកម៉ូតូជនរងគ្រោះពេញទំហឹងបណ្តាលឲ្យរងរបួសជាទម្ងន់នៅនឹងកន្លែងកើតហេតុ ធ្វើឲ្យរថយន្តជ្រុះកាងមុខ ចំណែកអ្នកបើកបររថយន្តបង្កក៏បានបន្ថែមល្បឿនបើករត់គេចខ្លួនពីកន្លែងកើតហេតុដោយមិននៅទទួលខុសត្រូវរហូតមកដល់ទឹកដីស្រុកសន្ទុកទើបត្រូវបានលោក ស្រី សំណាង មេបញ្ជាការកងរាជអាវុធហត្ថស្រុកសន្ទុកបញ្ជាកម្លាំងឲ្យកងកម្លាំងរបស់លោកស្ទាក់ចាប់បាន រួចប្រគល់ទៅឲ្យខាងសមត្ថកិច្ចចរាចរណ៍ស្រុកទាំងពីរ។
អ្នកបើកបរឈ្មោះ ឡូ សុជាតា ភេទប្រុស អាយុ៣៥ឆ្នាំ មានទីលំនៅភូមិថ្មី សង្កាត់ស្វាយដង្គំ ក្រុងសៀមរាប ខេត្តសៀមរាប។ ហើយខាងនគរបាលចរាចរណ៍ ស្រុកសន្ទុកក៏បានប្រគល់ឲ្យទៅខាងស្រុកបារាយណ៍វិញ ពីព្រោះករណីនេះបានកើតឡើងនៅក្នុងទឹកដីនៃស្រុកបាយរាយណ៍ រីឯខាងជនរងគ្រោះរងរបួសធ្ងន់សន្លប់បាត់ស្មារតីត្រូវបញ្ជូនទៅសង្គ្រោះនៅមន្ទីរពេទ្យបង្អែកសន្ទុក -បារាយណ៍ ដោយសារតែរបួសធ្ងន់ធ្ងរពេកក៏ត្រូវស្លាប់នៅក្នុងមន្ទីរពេទ្យ។ ជនរងគ្រោះមិនទាន់ស្គាល់អត្តសញ្ញាណនៅឡើយទេ អាយុប្រហែលជាង៣០ឆ្នាំ ពាក់អាវពណ៌ស ស្លៀកខោខ្មៅ។
ក្រោយពេលកើតហេតុបន្ទាប់ពីធ្វើការវាស់វែងរួច រថយន្ត និងម៉ូតូ រួមនឹងអ្នកបើកបររថយន្តត្រូវបាននាំយកទៅកាន់អធិការដ្ឋាននគរបាលស្រុកបារាយណ៍ដើម្បីចាត់ការតាមផ្លូវច្បាប់។ ដំណឹងនេះក៏ជាការអំពាវនាវដល់គ្រុមគ្រួសារនៃសពសូមទំនាក់ទំនងមកកាន់លោក សន តាល់ អធិការរងនគរបាលស្រុកបារាយណ៍ទទួលផ្នែកចារចរណ៍តាមលេខទូរស័ព្ទរបស់លោក ០១២ ៦៩ ៣៥ ៦៩ ដើម្បីទទួលយកសពទៅធ្វើបុណ្យតាមប្រពៃណី។
ចែករំលែកព័តមាននេះ