នារីរូបស្រស់ម្នាក់ស្រវឹងជោគជាំ បង្កគ្រោះថ្នាក់ចរាចរណ៍
រាជធានីភ្នំពេញ ៖ ករណីគ្រោះថ្នាក់ចរាចរណ៍ដែលរថយន្តបុកក្បាលនាគថ្មពុះចែកទ្រូងផ្លូវហើយខ្ទាតក្បាលនាគថ្មនោះទៅប៉ះរថយន្តមួយគ្រឿងទៀតរងការខូចខាតទៅមុខលែងរួច។
រាជធានីភ្នំពេញ ៖ ករណីគ្រោះថ្នាក់ចរាចរណ៍ដែលរថយន្តបុកក្បាលនាគថ្មពុះចែកទ្រូងផ្លូវហើយខ្ទាតក្បាលនាគថ្មនោះទៅប៉ះរថយន្តមួយគ្រឿងទៀតរងការខូចខាតទៅមុខលែងរួច។ហេតុការណ៍នេះបានកើតឡើងកាលពីវេលាម៉ោង០៩និង០០នាទី យប់ថ្ងៃទី៣១ ខែសីហានេះត្រង់ចំណុចមុខក្រសួងការងារ តាមបណ្ដោយមហាវិថីសហព័ន្ធរុស្សី ស្ថិតក្នុងក្រុម៦១ សង្កាត់ទឹកល្អក់១ ខណ្ឌទួលគោក។ រថយន្តបង្កម៉ាកព្រូសពណ៌ទឹកប្រាក់ ពាក់ស្លាកលេខ 2T-6662បើកបរដោយនារីរូបស្រស់ម្នាក់ ក្នុងទិសដៅពីកើតទៅលិចក្នុងស្ថានភាពស្រវឹងជោគជាំ។
ចំណែករថយន្តរងគ្រោះមួយគ្រឿងនោះម៉ាក ឡិចស៊ីសពណ៌សំបកឪឡឹក ពាក់ស្លាកលេខ ភ្នំពេញ 2AE-5876 បើកបរដោយបុរសម្នាក់ មិនស្គាល់អត្តសញ្ញាណ ក្នុងទិសដៅពីលិចទៅកើត។ តាមប្រភពពីកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្តបង្កខាងលើបើកបរតែម្នាក់ឯងក្នុងស្ថានភាពស្រវឹងជោគជាំ លុះមកដល់ចំណុចកើតហេតុរថយន្តខាងលើបានរេចង្កូតទៅបុកក្បាលនាគថ្មពុះចែកទ្រូងផ្លូវ បណ្ដាលឲ្យបាក់អស់ចំនួនពីរកង់ ហើយភ្លាមនោះក្បាលនាគបានខ្ទាតទៅបុករថយន្តរងគ្រោះខាងលើដែលមកពីទិសខាងលិច បណ្ដាលឲ្យបែកកង់មុខខាងឆ្វេងទៅមុខលែងរួច។
ខណៈជាមួយគ្នានោះដែររថយន្តបង្កបានព្យាយាមបើករត់គេច តែដោយសារតែរថយន្តបែកកង់មុខខាងឆ្វេងហើយធ្លាយធុងទឹកទៀតនោះ ទើបធ្វើឲ្យរថយន្តថយក្រោយបានតែបន្តិចក៏ទៅលែងរួច។ ក្រោយពេលកើតហេតុរថយន្តទាំង២ ត្រូវបានខាងជំនាញចរាចរណ៍ក្រុងធ្វើការវាស់វែង និងអូសយកទៅរក្សាទុកនៅស្នងការរាជធានី រង់ចាំការដោះស្រាយតាមនីតិវិធីជាក្រោយ៕
ចែករំលែកព័តមាននេះ