រាជធានីភ្នំពេញ ៖ សាលក្រមសាលាដំបូងរាជធានីភ្នំពេញ នៅថ្ងៃទី៣១ ខែសីហា ឆ្នាំ២០១៦ បានប្រកាសសាលក្រមផ្តន្ទាទោសលើសំណុំរឿងឃាតកម្មសម្លាប់សង្សារជានិស្សិតរៀននៅ សាលាវ៉ាន់ដាគណនេយ្យ រួចយកសពទៅទម្លាក់ចោលក្នុងទន្លេក្បែរសាលាបឋមសិក្សាជ្រោយចង្វា ត្រើយខាងកើត ដាក់ពន្ធនាគារអស់១ជីវិត និងសំណងជនរងគ្រោះលើទឹកប្រាក់ចំនួន២០លានរៀល។ សាលក្រមនេះបានបើកផ្លូវ និងទុកពេលឲ្យភាគីណាមួយមិនសុខចិត្តប្តឹងជំទាស់តាមកំណត់ច្បាប់។
ជនជាប់ចោទក្នុងសំណុំរឿងនេះ ឈ្មោះ ហុង កាលីឌីន ភេទប្រុស អាយុ២៧ឆ្នាំ មុខរបរជាមន្ត្រីនគរបាល ទើបជាប់កាតព្វកិច្ច នគរបាលព្រហ្មទណ្ឌក្រសួងមហាផ្ទៃ អាសយដ្ឋានស្នាក់នៅផ្ទះរបស់ខ្លួនលេខ ១០៤ ផ្លូវ៤៣០ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ ជាជនញៀនថ្នាំ។ គួរបញ្ជាក់ថា សំណុំរឿងនេះត្រូវបានសាលាដំបូងរាជធានីភ្នំពេញ លើកយកមកបើកសវនាការសួរដេញដោល២-៣លើករួចមកហើយ ប៉ុន្តែចុងក្រោយមិនបានកំណត់ថ្ងៃប្រកាសសាលក្រមច្បាស់លាស់ទេ ទើបត្រូវបានប្រកាសនៅថ្ងៃទី៣១ ខែសីហានេះ។
នេះជាពេលវេលាសវនាការកន្លងមក នៅព្រឹកថ្ងៃទី២៣ ខែមិថុនា ឆ្នាំ២០១៦ ក្រុមប្រឹក្សាជំនុំជម្រះសាលាដំបូងរាជធានីភ្នំពេញ បានបន្តសវនាការលើសំណុំរឿងឃាតកម្មសំលាប់និស្សិតស្រីហើយយកសាកសពទៅទម្លាក់ចោលក្នុងទឹកទន្លេក្បែរសាលាបឋមសិក្សាជ្រោយចង្វាត្រើយខាងកើត។ សវនាការនេះបន្តក្រោយពេលតុលាការបានចាត់របៀបឲ្យមានការស៊ើបអង្កេតបន្ថែមអស់រយៈពេល៦ខែកន្លងមក។ ក្រោយពីអង្គសវនាការសាកសួរដេញដោលចប់សព្វគ្រប់ ប្រធានក្រុមប្រឹក្សា បានលើកពេលប្រកាសសាលក្រម ដោយគ្មានថ្ងៃកំណត់។
សូមរំលឹកថាកាលពីព្រឹកថ្ងៃទី០១ ខែធ្នូ ឆ្នាំ២០១៥ ក្រុមប្រឹក្សាជំនុំជម្រះសាលាដំបូងរាជធានីភ្នំពេញ បានបន្តសវនាការរឿងក្ដី មន្ត្រីនគរបាលក្រសួងមហាផ្ទៃ សម្លាប់សង្សារជានិសិត្ស សាលាវ៉ាន់ដាគណនេយ្យ រួចយកសពទៅទម្លាក់ចោលក្នុងទន្លេក្បែរសាលាបឋមសិក្សាជ្រោយចង្វា ត្រើយខាងកើត។ ក្នុងការបន្តសវនាការថ្ងៃនេះតុលាការផ្ដោតសំខាន់តែទៅលើការសាកសួរលើសាក្សី និងជនជាប់ចោទផ្ទាល់តែម្ដង។ សាក្សីសំខាន់ក្នុងការដោះបន្ទុកឲ្យជនជាប់ចោទក្នុងសវនាការនេះគឺ ឪពុកម្ដាយ បងប្អូនបង្កើត របស់ជនជាប់ចោទ ដែលពួកគេបានឆ្លើយបំភ្លឺបដិសេធមិនដែលស្គាល់ជនរងគ្រោះដែលបានស្លាប់ដោយទារុណកម្មយ៉ាងឃោរឃៅ។ ក្រុមគ្រួសាររបស់ជនរងគ្រោះបានទាមទារសំណងចំនួន១០ម៉ឺនដុល្លារពីជនជាប់ចោទ។
តំណាងអយ្យការបានស្នើឲ្យមានការចាត់របៀបស៊ើបអង្កេតបន្ថែមលើការឆ្លើយឆ្លងគ្នាក្នុងទូរស័ព្ទ រវាងជនជាប់ចោទ និងសាក្សីមួយចំនួន។ ការធ្វើកោសល្យវិច្ច័យលើទឹកកាមដែលដកហូតពីសាកសពជនរងគ្រោះ និងចម្លើយសាក្សីមួយចំនួនទៀតជាដើម។ នៅវេលាម៉ោង៤និង១៩នាទីល្ងាច សវនាការបានប្រកាសបិទ និងចាត់របៀបដើម្បីស៊ើបអង្កេតបន្ថែមដូចជា ១.ឲ្យសាកសួរបន្ថែមលើសាក្សី ២. ឲ្យធ្វើកោសល្យវិច្ច័យលើទឹករំអិល ៣. ឲ្យស្រង់យករបាយការណ៍ការសន្ទនាតាមទូរស័ព្ទ ៤.សាកសួរបន្ថែមលើគ្រូពេទ្យដែលមកចាក់ថ្នាំឲ្យជនរងគ្រោះ៥.ឲ្យថតយកសំឡេងសន្ទនាតាមទូរស័ព្ទ។
សូមបញ្ជាក់ទៀតថា ក្នុងសវនាការនាពេលកន្លងមក ជនដៃដល់បានបដិសេធចំពោះការចោទប្រកាន់អំពីការសម្លាប់សង្សាររបស់ខ្លួនឈ្មោះ សុង ដាវីន។ ក្នុងសវនាការឈ្មោះ ហុង កាលីឌីន ដែលជាជនជាប់ចោទបានឆ្លើយថា នៅយប់ថ្ងៃទី០៣ ខែតុលា ឆ្នាំ២០១៤ ខ្លួននឹងសង្សារ សុង ដាវីន បានដេកនៅក្នុងផ្ទះរបស់គេជាមួយគ្នារហូតដល់ថ្ងៃទី០៥ ខែតុលា ទើបខ្លួនគេដឹកសង្សារទៅផ្សារផេនសល ហើយចាប់តាំងពីពេលនោះមកពួកគេមិនបានជួបគ្នាទេ។ ចំណែកសាក្សីម្នាក់ ជាបងស្រីជីដូនមួយរបស់សព សុង ដាវីន បានបញ្ជាក់ថា ក្រោយពេលប្អូនខ្លួនចេញទៅជាមួយ ហុង កាលីឌីន នៅថ្ងៃទី៤-៥ ខែតុលា សុង ដាវីន បានយកទូរស័ព្ទរបស់ កាលីឌីន ទាក់ទងមកខ្លួន។ លុះដល់ថ្ងៃទី០៦ ខែតុលាស្រាប់តែទាក់ទងលែងបាន រហូតដល់យប់ថ្ងៃទី០៧ ខែតុលា ទើបដឹងថាប្អូនស្រីស្លាប់បាត់ទៅហើយ។
ចំណែកឈ្មោះ ហុង កាលីឌីន បានទូរស័ព្ទមកសួរពីសាកសពថែមទៀត។ ដោយសារតែអស់ម៉ោងរដ្ឋបាល នៅវេលាម៉ោង០៥ល្ងាច ថ្ងៃទី៣០ ខែតុលា ចៅក្រមបានសម្រេចផ្អាកសវនាការ ហើយនឹងបន្តនៅថ្ងៃទី០១ ខែធ្នូ ឆ្នាំ២០១៥។ គួររំលឹកថា កាលពីព្រឹកថ្ងៃទី១៤ ខែតុលា ឆ្នាំ២០១៤ នៅហាងកាហ្វេដាលីន ស្ថិតក្នុងសង្កាត់បឹងព្រលឹត ខណ្ឌ៧មករា សមត្ថកិច្ចបានឆែកឆេរចាប់ខ្លួនបុរសម្នាក់ពាក់ព័ន្ធនឹងការសម្លាប់នារីម្នាក់ជានិស្សិតឆ្នាំទី១សាលាវ៉ាន់ដាគណនេយ្យ ហើយយកសពទៅបោះចោលក្នុងទឹកទន្លេ។
សេចក្តីរាយការណ៍បានបញ្ជាក់ឲ្យដឹងទៀតថា នៅព្រឹកថ្ងៃទី១៤ ខែតុលា ជនសង្ស័យឈ្មោះ ហុង កាលីឌីន អាយុ២៧ឆ្នាំ បានត្រូវនគរបាលព្រហ្មទណ្ឌក្រសួងមហាផ្ទៃសហការណ៍ជាមួយ លោក សៀង សុខ ព្រះរាជអាជ្ញារងអមសាលាដំបូងរាជធានីភ្នំពេញ និងមានការចូលរួមពីអាជ្ញាធរមូលដ្ឋាន បាននាំជនសង្ស័យមកឆែកឆេរនៅផ្ទះរបស់ខ្លួនលេខ១០៤ ផ្លូវ៤៣០ សង្កាត់ផ្សារដើមថ្កូវ ខណ្ឌចំការមន ដើម្បីរកវត្ថុតាងពាក់ព័ន្ធនឹងការជួញដូរគ្រឿងញៀន និងករណីរំលោភធ្វើទារុណកម្មសម្លាប់ស្ត្រីជានិស្សិតខាងលើ។
ស្ត្រីវ័យក្មេងម្នាក់ ត្រូវបានឃាតកមិនស្គាល់មុខរំលោភរួចធ្វើទារុណកម្មជាំពេញខ្លួនប្រាណរហូតដល់ស្លាប់ ហើយដឹកសពយកទៅទម្លាក់ចោលនៅក្នុងទឹកទន្លេ មុខសាលាបឋមសិក្សាជ្រោយចង្វា ខាងត្បូងស្ពានជ្រោយចង្វាប្រហែលកន្លះគីទ្បូម៉ែត្រ ស្ថិតក្នុងភូមិទី២ សង្កាត់ជ្រោយចង្វា ខណ្ឌជ្រោយចង្វា។ ហេតុការណ៍នេះ បានធ្វើឱ្យមានការភ្ញាក់ផ្អើលទ្បើងកាលពីម៉ោងប្រមាណ៦ព្រឹក ថ្ងៃទី០៧ ខែតុលា នៅពេលដែលប្រជាពលរដ្ឋធ្វើដំណើរទៅហាត់ប្រាណប្រទះឃើញសពអណ្តែតទឹក។ ដំបូងឡើយសពស្ត្រីរូបនេះ ពុំត្រូវបានគេស្គាល់អត្តសញ្ញាណនៅទ្បើយទេ មានអាយុប្រហែលជិត២០ឆ្នាំ ស្លៀករ៉ូបរាត្រីពណ៌ទឹកប៊ិច អណ្តែតផ្កាប់មុខចម្ងាយប្រមាណ៣ម៉ែត្រពីច្រាំងទន្លេ។
មន្ត្រីនគរបាលប៉ុស្តិ៍ជ្រោយចង្វាបានឱ្យដឹងថា នៅព្រឹកថ្ងៃទី០៧ ខែតុលានោះ មានអ្នកហាត់ប្រាណបានទៅឈប់ឈរលេងនៅក្បែរបង្កាន់ដៃច្រាំងទន្លេ ក៏ប្រទះឃើញសពស្ត្រីម្នាក់នោះអណ្តែតទឹកផ្កាប់មុខ។ មុនដំបូងអ្នកហាត់ប្រាណរូបនេះ ស្មានថាជាតុក្កតាអណ្តែតទឹក លុះក្រោយមកទើបដឹងថា ជាសពស្ត្រីវ័យក្មេងម្នាក់ ទើបធ្វើឱ្យមានការភ្ញាក់ផ្អើលដល់មនុស្សម្នាគ្រប់គ្នាតែម្តង។ នាព្រឹកនោះ នៅមាត់ច្រាំងទន្លេពោរពេញទៅដោយមនុស្សម្នាត្រៀបត្រា មកចោមរោមមើល ហើយសមត្ថកិច្ច និងអាជ្ញាធរក៏បានចាត់ចែងស្រង់សព ដោយជួលទូកអូសតាមទឹកយកទៅកាន់ឈាបនដ្ឋានវត្តប្រជុំសាគរ ហៅវត្តថ្មី ដើម្បីត្រួតពិនិត្យសពនៅទីនោះ។
បុរសខ្មែរឥស្លាមម្នាក់បានឱ្យដឹងថា កាលពីវេលាម៉ោងប្រមាណ៨និង៣០នាទីយប់ ថ្ងៃទី០៥ ខែតុលា នៅពេលរូបគាត់ទៅរាំលេងកម្សាន្តនៅរង្គសាលមេគង្គតាមផ្លូវជាតិលេខ៥ បានប្រទះឃើញស្ត្រីរូបនោះ រួមជាមួយមិត្តភក្តិទាំងអស់៦នាក់ ក្នុងនោះមានភេទទី៣ម្នាក់ផង ចូលរាំលេងនៅក្នុងក្លិបនោះដែរ។ លុះរំលងបានមួយយប់ នៅព្រឹកថ្ងៃទី០៧ ខែតុលា ស្រាប់តែប្រទះឃើញស្ត្រីរូបនេះ ក្លាយជាសពអណ្តែតទឹកទៅវិញ។ តាមការត្រួតពិនិត្យរបស់សមត្ថកិច្ចបង្ហាញថា ស្ត្រីរូបនេះទើបតែស្លាប់ថ្មីៗមានស្នាមជាំពេញដងខ្លួន ហើយប្រដាប់ភេទមានទឹកកាមដែរ។
ប្រសិនបើលង់ទឹក ច្បាស់ជាផឹកទឹកពេញពោះហើយ តែសពគ្មានសញ្ញាបែបនេះទេ គឺមានន័យថា ត្រូវគេសម្លាប់រួចយកមកទម្លាក់ទឹក។ សមត្ថកិច្ចបានធ្វើការសន្និដ្ឋានថា ស្ត្រីរូបនេះអាចត្រូវបុរសដែលជាឃាតក និងត្រូវអាចជាប្រុសស្នេហ៍នាំនាងទៅរួមរ័កនៅកន្លែងណាមួយហើយវាយធ្វើទារុណកម្មជាំពេញខ្លួន រហូតដល់ស្លាប់ ក៏ដឹកសពយកទៅទម្លាក់ទឹកតែម្តង។ តាមរយៈការរកឃើញទឹកកាមនៅក្នុងប្រដាប់ភេទ បញ្ជាក់ថាឃាតកអាចរំលោភសេពសន្ថវៈរហូតបានសម្រេច ហើយវាយធ្វើបាបរហូតដល់ស្លាប់ រួចទើបដឹកសពយកទៅបោះចោលក្នុងទឹក។
សពស្ត្រីរូបនេះ អាចត្រូវបានឃាតករដឹកយកទៅបោះចូលក្នុងទឹកទន្លេនៅវេលាប្រមាណពាក់កណ្តាលអធ្រាត្រ ព្រោះតាមស្ថានភាពសពគឺទើបតែស្លាប់ថ្មីៗ។ ទោះបីជាយ៉ាងណា គេពុំដឹងថាឃាតកមានគំនុំអ្វីជាមួយនារីរូបនេះទេ ទើបបានជាវាយធ្វើទារុណកម្មយ៉ាងឃោរឃៅជាំពេញខ្លួនប្រាណ រហូតដល់ស្លាប់បែបនេះ។ ក្រោយមកទើបក្រុមគ្រួសារបានអះអាងថា នារីរងគ្រោះឈ្មោះ សុង ដាវី អាយុ២០ឆ្នាំ ជានិស្សិតឆ្នាំទី១ នៃវិទ្យាស្ថានវ៉ាន់ដាគណនេយ្យ និងមានទីលំនៅក្នុងផ្ទះជួលម្តុំផ្សារ បឹងត្របែក បា្លហ្សា និងមានស្រុកកំណើតក្នុងភូមិភ្នំដែក ឃុំរមណីយ៍ ស្រុករវៀង ខេត្តព្រះវិហារ៕
ចែករំលែកព័តមាននេះ