រាជធានីភ្នំពេញ ៖ បុរសម្នាក់ត្រូវបានសមត្ថកិច្ចអះអាងថា ជាមេបញ្ជាការរងអាវុធហត្ថលើផ្ទៃប្រទេស សង្ស័យជិះម៉ូតូរអិលដីខ្សាច់ដួលអូសនឹងថ្នល់បែកមុខសន្លប់ស្តូក បង្កឱ្យមានការភ្ញាក់ផ្អើល កាលពីវេលាម៉ោង០៩ និង១០នាទីយប់ថ្ងៃទី៣០ សីហា ស្ថិតត្រង់ចំណុចផ្លួវ1003 កែងនិងផ្លួវ327 ក្នុងសង្កាត់ភ្នំពេញថ្មី ខណ្ឌសែនសុខ ។
ប្រភពឱ្យដឹងថា មុនពេលកើតហេតុ ខណៈដែលប្រជាពលរដ្ឋធ្វើដំណើរត្រង់ចំណុចខាងលើ បានប្រទះឃើញបុរសម្នាក់ស្លៀកពាក់ឯកសណ្ឋានកងរាជអាវុធហត្ថលើផ្ទៃប្រទេស បានដេកដួលផ្កាប់មុខនៅជិតម៉ូតូមួយគ្រឿង ម៉ាកណៃហត ពណ៌ខៀវ ពាក់ស្លាកលេខខេមរភូមិន្ទ 1-2328 ដោយមិនមាននរណាម្នាក់ដឹងពីមូលហេតុច្បាស់លាស់នោះទេ ទើបប្រញាប់រាយការណ៍ទៅខាងកម្លាំងសមត្ថកិច្ច ក៏ដូចជាកម្លាំងកងរាជអាវុធហត្ថដែលប្រចាំការអោយមកជួយអន្តរាគមន៍ ។
សមត្ថកិច្ចអោយដឹងថា បុរសរងគ្រោះឈ្មោះជុំ សុជិត ជាមេបញ្ជាការរងនៃកងរាជអាវុធហត្ថលើផ្ទៃប្រទេស ហើយបើតាមការ
ពិនិត្យស្លាកស្នាមឱ្យដឹងថា មានស្នាមម៉ូតូជិះមកពីជើងទៅត្បូងតាមផ្លួវ1003 ។ លុះមកដល់ចំណុចកើតហេតុ គ្មានអ្នកណាម្នាក់ដឹងថា ជនរងគ្រោះដួលដោយសារមូលហេតុអ្វីនោះទេ តែសង្ស័យថា ជនរងគ្រោះរអិលដីខ្សាច់ ដែលនៅចិញ្ចើមថ្នល់នោះ ហើយត្រូវដួលអូសបែកមុខមាត់ដូច្នេះ។
ក្រោយពេលកើតហេតុ សមត្ថកិច្ចមូលដ្ឋាន ក៏ដូចជាកម្លាំងអាវុធហត្ថខណ្ឌសែនសុខ បានទាក់ទងទៅកាន់រថយន្តសង្គ្រោះគ្លីនិកឯកជនដឹកទៅកាន់មន្ទីរពេទ្យព្រះកេតុមាលា ដើម្បីសង្គ្រោះ ។ ចំណែកឯម៉ូតូជនរងគ្រោះវិញ ត្រូវបានកម្លាំងអាវុធហត្ថជិះយកទៅរក្សាទុកនៅមូលដ្ឋានអាវុធហត្ថខណ្ឌសែនសុខ រង់ចាំម្ចាស់ម៉ូតូមកទទួលយកទៅវិញ ៕
ចែករំលែកព័តមាននេះ