រាជធានីភ្នំពេញ ៖ ធនាគារជាតិនៃកម្ពុជា បានប្រារព្ធពិធីបើកវគ្គគូលែនលើកទី៤ កម្រិតមូលដ្ឋានស្តីពី «ភាពជាអ្នកដឹកនាំ» ដល់មន្ត្រីបុគ្គលិករបស់ធនាគារជាតិនៃកម្ពុជា ក្នុងគោលបំណងចែករំលែកព័ត៌មាន
រាជធានីភ្នំពេញ ៖ ធនាគារជាតិនៃកម្ពុជា បានប្រារព្ធពិធីបើកវគ្គគូលែនលើកទី៤ កម្រិតមូលដ្ឋានស្តីពី «ភាពជាអ្នកដឹកនាំ» ដល់មន្ត្រីបុគ្គលិករបស់ធនាគារជាតិនៃកម្ពុជា ក្នុងគោលបំណងចែករំលែកព័ត៌មាន និងផ្ទេរចំណេះដឹង ចំណេះធ្វើ និងបទពិសោធន៍អនុវត្តការងារជាក់ស្តែងដល់អ្នកជំនាន់ក្រោយ ដើម្បីបន្តនិរន្តរភាពការងារឆ្ពោះទៅរកការអភិវឌ្ឍក្នុងក្របខ័ណ្ឌនៃសមាហរណកម្ម និងសេរីភាវូបនីយកម្មសេដ្ឋកិច្ចនៅក្នុងតំបន់ និងពិភពលោកនាពេលបច្ចុប្បន្ន ។
ថ្លែងក្នុងពិធីបើកវគ្គកាលពីព្រឹកថ្ងៃទី២៩ សីហា កន្លងមកនេះ លោក ជា ចាន់តូ ទេសាភិបាលធនាគារជាតិនៃកម្ពុជា បានលើកឡើងថា វគ្គនេះគឺជាយន្តការបណ្តុះបណ្តាលផ្ទៃក្នុងមួយលើជំនាញផ្នែកទន់ ដែលធនាគារជាតិនៃកម្ពុជាបានផ្តួចផ្តើមបង្កើត និងអនុវត្តឡើងក្រោមរូបភាពជាការបណ្តុះបណ្តាលនៅនឹងកន្លែង ដោយប្រើប្រាស់ធនធានផ្ទាល់ទាំងផ្នែកប្រាជ្ញា និងផ្នែកសម្ភារ ក្នុងគោលបំណងចែករំលែកចំណេះដឹង ចំណេះធ្វើ និងបទពិសោធន៍អនុវត្តការងារជាក់ស្តែង ជាពិសេសផ្នែកទ្រឹស្តី និងការអនុវត្តក្របខ័ណ្ឌ ភាពជាអ្នកដឹកនាំជូនមន្ត្រីបុគ្គលិកដែលជាអ្នកបន្តវេន ។
លោកទេសាភិបាលថ្លែងថា ៖ « បើយើងក្រឡេកមើលពីបទពិសោធន៍កន្លងមកក្នុងដំណាក់កាលវិបត្តិសេដ្ឋកិច្ច ការរៀបចំនិងអនុវត្តយុទ្ធសាស្ត្រនានាសម្រាប់ដោះស្រាយវិបត្តិកុំឱ្យមានឥទ្ធិពលខ្លាំងក្លាមកលើសេដ្ឋកិច្ចនិងសង្គមនោះ បានបង្ហាញយ៉ាងជាក់ច្បាស់អំពីសមត្ថភាពជាអ្នកដឹកនាំ និងម្ចាស់ការលើសភាពការណ៍របស់ថ្នាក់ដឹកនាំនៃធនាគារកណ្តាល ។ ដោយមើលឃើញពីសារសំខាន់នៃចំណេះដឹងទាក់ទងនឹងភាពជាអ្នកដឹកនាំនេះហើយ ទើបធនាគារកណ្តាល និងអង្គការអន្តរជាតិនានា តួយ៉ាងដូចជាមជ្ឈមណ្ឌលស៊ាសិនជាដើម បានចាប់ផ្តើមយកចិត្តទុកដាក់និងរៀបចំវគ្គបណ្តុះបណ្តាលស្តីពីភាពជាអ្នកដឹកនាំនៅក្នុងធនាគារកណ្តាល និងប្រធានបទពាក់ព័ន្ធផ្សេងៗទៀតជារៀងរាល់ឆ្នាំ ក្នុងគោលបំណងពង្រឹងសមត្ថភាព និងប្រសិទ្ធភាពការងារតាមរយៈការសិក្សាស្វែងយល់ទៅលើបញ្ហាប្រឈមនានាក្នុងការដឹកនាំ សមត្ថភាពដឹកនាំ និងនិន្នាការវិវត្តថ្មីៗលើការកសាងសមត្ថភាពសម្រាប់អ្នកដឹកនាំក្នុងនាមជាបុគ្គល និងស្ថាប័ន » ។
លោកលើកឡើងថា ចំពោះធនាគារជាតិនៃកម្ពុជាវិញ ការបណ្តុះបណ្តាលទាក់ទងនឹងភាពជាអ្នកដឹកនាំ ត្រូវបានធ្វើឡើងក្រោមរូបភាពជាការចាត់បញ្ជូនមន្ត្រីបុគ្គលិកចូលរួមវគ្គសិក្សា និងសិក្ខាសាលាជាមួយធនាគារកណ្តាលជាដៃគូ និងស្ថាប័នអន្តរជាតិផ្សេងៗ ។ ប៉ុន្តែបើទោះបីជាយើងខិតខំបណ្តុះបណ្តាលមន្ត្រីយើងយ៉ាងច្រើនក៏ដោយ ក៏យើងនៅតែទទួលស្គាល់ថា សមត្ថភាពធនធានមនុស្សក្នុងជំនាញភាពជាអ្នកដឹកនាំនេះមិនទាន់គ្រប់គ្រាន់នៅឡើយ ។ ហេតុនេះហើយ ទើបធនាគារជាតិនៃកម្ពុជាបានរៀបចំវគ្គគូលែន បណ្តុះបណ្តាលកម្រិតមូលដ្ឋានស្តីពីភាពជាអ្នកដឹកនាំនេះឡើង ដោយមានការចូលរួមធ្វើបទឧទ្ទេសនាមពីមន្ត្រីដែលមានបទពិសោធន៍ខ្ពស់ក្នុងការដឹកនាំអនុវត្តការងារប្រចាំថ្ងៃ និងធ្លាប់ឆ្លងកាត់វគ្គបណ្តុះបណ្តាលភាពជាអ្នកដឹកនាំនៅឯបរទេស ៕
ចែករំលែកព័តមាននេះ