រាជធានីភ្នំពេញ ៖ អ្នកបើកបរយន្តហោះ (ពីឡុត) ជនជាតិអង់គ្លេសម្នាក់ កាលពីព្រឹកថ្ងៃទី៣០ ខែសីហា ឆ្នាំ២០១៦ ត្រូវបានសមត្ថកិច្ចនគរបាលចរាចរផ្លូវគោក ឃាត់ខ្លួនបញ្ជូនមកកាន់សាលាដំបូងរាជធានីភ្នំពេញ
រាជធានីភ្នំពេញ ៖ អ្នកបើកបរយន្តហោះ (ពីឡុត) ជនជាតិអង់គ្លេសម្នាក់ កាលពីព្រឹកថ្ងៃទី៣០ ខែសីហា ឆ្នាំ២០១៦ ត្រូវបានសមត្ថកិច្ចនគរបាលចរាចរផ្លូវគោក ឃាត់ខ្លួនបញ្ជូនមកកាន់សាលាដំបូងរាជធានីភ្នំពេញ ពាក់ព័ន្ធករណីបើកបររថយន្តបុកមនុស្សស្លាប់២នាក់ ។
គួរបញ្ជាក់ថា ហេតុការណ៍នោះបានកើតឡើងកាលពីវេលាម៉ោង៣និង៣០នាទីរសៀល ថ្ងៃទី២៨ ខែសីហា ឆ្នាំ២០១៦ នៅលើកំណាត់ផ្លូវជាតិលេខ៣ ក្នុងភូមិទួលកី សង្កាត់ភ្លើងឆេះទេះខណ្ឌពោធិ៍សែនជ័យ ។ បុរសជនជាតិអង់គ្លេសរូបនេះឈ្មោះ DUNCAN GILES STEWART អាយុ៤៦ឆ្នាំ មុខរបរបើកបរឧទ្ធម្ភាគចក្រនៅប្រទេសអង់គ្លេស ស្នាក់នៅប្រទេសកម្ពុជា ជាមួយប្រពន្ធជនជាតិខ្មែរ ។
ប្រភពព័ត៌មានពីកន្លែងកើតហេតុបានឲ្យដឹងថា ដំបូងគេឃើញម៉ូតូមួយគ្រឿង ជិះគ្នាពីរនាក់ មកដល់ចំណុចខាងលើ ស្រាប់តែមានរថយន្តម៉ាកអីុស៊ុយហ្ស៊ុយមួយគ្រឿង បើកបរដោយជនជនជាតិអង់គ្លេស រួមដំណើរជាមួយប្រពន្ធក្នុងល្បឿនលឿន ក៏ជ្រុលទៅបុកម៉ូតូជនរងគ្រោះ បណ្តាលឲ្យស្លាប់ភ្លាមនៅកន្លែងកើតហេតុ ។ បន្ទាប់មកសពជនរងគ្រោះត្រូវបានសមត្ថកិច្ចទាក់ទងទៅក្រុមគ្រួសារ ដើម្បីយកទៅធ្វើតាមប្រពៃណី ។ ចំណែកជនបង្កត្រូវបានសមត្ថកិច្ចឃាត់ខ្លួន រួចបញ្ជូនទៅការិយាល័យនគរបាលចរាចរផ្លូវគោក ធ្វើការដោះស្រាយតាមច្បាប់ ។
នៅថ្ងៃទី២៩ ខែសីហា ឆ្នាំ២០១៦ បុរសជនជាតិអង់គ្លេសរូបនេះ កំពុងធ្វើកាសម្របសម្រួលជាមួយក្រុមគ្រួសារជនរងគ្រោះនៅឡើយ ដើម្បីដោះស្រាយសំណងរដ្ឋប្បវេណី ។ នគរបាលចរាចរផ្លូវគោកបានរាយការណ៍ថា បុរសជនជាតិអង់គ្លេសរូបនេះ បានបើករថយន្តវ៉ាជែងរថយន្តមួយគ្រឿងទៀត តែចៃដន្យបានបុកម៉ូតូ១គ្រឿងដែលបើកបញ្ច្រាសទិសគ្នា បណ្ដាលឲ្យបុកអ្នកជិះម៉ូតូស្លាប់ទាំង២នាក់ ។ ក្រោយកើតហេតុបុរសជនជាតិអង់គ្លេសនោះមិនបានរត់គេចខ្លួនទេ គឺគាត់បានរង់ចាំរហូតដល់សមត្ថកិច្ចមកដល់កន្លែងកើតហេតុនាំខ្លួនគាត់តែម្ដង ។
ប្រភពព័ត៌មានពីសាលាដំបូងឲ្យដឹថា សំណុំរឿងនេះ ត្រូវបានបញ្ចប់សំណងជនរងគ្រោះរួចរាល់ហើយ ពោលគឺបណ្តឹងរដ្ឋប្បវេណីត្រូវបានរលាត់ ដូច្នេះនៅជាប់តែបណ្តឹងអាជ្ញាធរទេ ៕
ចែករំលែកព័តមាននេះ