រាជធានីភ្នំពេញ ៖ ក្រុមហ៊ុនទ្រូម៉ាន់នី ដែលជាភ្នាក់ងារផ្ទេរប្រាក់ដ៏ធំមួយនៅកម្ពុជា បានបន្តសហការជាមួយក្រុមហ៊ុនជាច្រើនដើម្បីសម្រួលដល់ប្រជាពលរដ្ឋទូទាំងប្រទេស ក្នុងការបង់ប្រាក់ ផ្ទេរប្រាក់ និងបង់វិក្កយបត្រតាមភ្នាក់ងាររបស់ខ្លួន ។ ជាក់ស្ដែងកាលពីថ្ងៃទី ២៦ សីហា ២០១៦ ក្រុមហ៊ុនទ្រូម៉ាន់នី បានសហការជាមួយក្រុមហ៊ុន GL Finance ដើម្បីឱ្យអតិថិជនរបស់ក្រុមហ៊ុន GL Finance បង់វិក្កយបត្រទៅក្រុមហ៊ុន GL Finance តាមភ្នាក់ងារទ្រូម៉ាន់នី ដែលនៅជិតបំផុត ដោយមិនចាំបាច់ធ្វើដំណើរមកកាន់ការិយាល័យរបស់ក្រុមហ៊ុន GL Finance ដូចមុនទៀតឡើយ ។
លោក រីគី អីុហ្ស៊ីហ្គាមី ( Riki Ishigami) នាយកប្រតិបត្តិក្រុមហ៊ុន GL Finance បានឱ្យដឹងថា GL Finance ជាក្រុមហ៊ុនបុត្រសម្ព័ន្ធរបស់ក្រុមហ៊ុន GL Holding (សិង្ហបុរី) ដែលជាក្រុមហ៊ុនហិរញ្ញវត្ថុក្នុងតំបន់របស់ក្រុមហ៊ុន Group Lease PCL ដែលបានចុះឈ្មោះក្នុងទីផ្សារមូលបត្រនៅក្នុងប្រទេសថៃ ហើយជាក្រុមហ៊ុនភតិសន្យាហិរញ្ញវត្ថុធំជាងគេ និងលើកដំបូងនៅក្នុងប្រទេសកម្ពុជា ។ ក្នុងអំឡុងពេល៤ឆ្នាំនៅក្នុងប្រទេសកម្ពុជា ក្រុមហ៊ុន GL Financeបានសម្រេចនូវលទ្ធផលធំៗរបស់ខ្លួន ដូចជាការកើនឡើងនូវបុគ្គលិកពីជាង១០នាក់ រហូតដល់៧០០នាក់ គ្របដណ្ដប់ប្រតិបត្តិការនៅទូទាំងប្រទេសតាមរយៈក្រុមការងារមានជិត២០០ទីតាំង និងទទួលបានអតិថិជនរាប់ម៉ឺននាក់ ។
លោកបន្តថា ចំពោះកិច្ចសហការជាមួយក្រុមហ៊ុន ទ្រូម៉ាន់នី ជាជំហានផ្សេងៗទៀត របស់ក្រុមហ៊ុន GL Finance ដែលបានអនុវត្តដើម្បីផ្ដល់នូវជម្រើសនៃការទូទាត់កាន់តែច្រើនបន្ថែមលើជម្រើសពេលបច្ចុប្បន្នរបស់ខ្លួនដល់អតិថិជន ។ នេះជាព្រឹត្តិការណ៍ដ៏សំខាន់បន្ថែមមួយទៀតក្នុងកិច្ចសហប្រតិបត្តិការរវាងក្រុមហ៊ុន GL Finance និងទ្រូម៉ាន់នី ។ ក្នុងភាពជាដៃគូនេះ ភ្នាក់ងារទាំងអស់របស់ទ្រូម៉ាន់នី នាពេលបច្ចុប្បន្ន និងពេលអនាគត ដែលមានជិត៥ពាន់ភ្នាក់ងារ នឹងអាចជំរុញការផ្ដល់សេវាភតិសន្យាហិរញ្ញវត្ថុរបស់ក្រុមហ៊ុន GL Finance ដោយប្រើ GL Digital Finance Application របស់ក្រុមហ៊ុន GL Finance ។ ពួកគេអាចក្លាយជាសមាជិកនៃបណ្ដាញភ្នាក់ងារចែកចាយរបស់ក្រុមហ៊ុន GL Finance ហើយនៅពេលដែលក្រុមហ៊ុន GL Finance ផ្ដល់សេវាភតិសន្យាហិរញ្ញវត្ថុទៅអតិថិជនណែនាំរបស់ខ្លួន ភ្នាក់ងារទ្រូម៉ាន់នី អាចទទួលបានកម្រៃជើងសារពីក្រុមហ៊ុន GL Finance ផងដែរ ។
លោក គង់ មាន នាយកគ្រប់គ្រងទូទៅ នៃក្រុមហ៊ុន ទ្រូម៉ាន់នី ប្រចាំកម្ពុជាបានថ្លែងថា ទ្រូម៉ាន់នី ចូលមកទីផ្សារប្រទេសកម្ពុជា គឺដោយសារតែមើលឃើញថា ប្រជាជនកម្ពុជាបច្ចុប្បន្នប្រហែល៨០ទៅ៩០% មិនបានប្រើប្រាស់សេវាកម្មធនាគារ ដូចនេះសេវាកម្មទ្រូម៉ាន់នី អាចជួយសម្រួលដល់ការផ្ទេរប្រាក់ ដក និងដាក់ប្រាក់បានយ៉ាងងាយស្រួល ។
គួរបញ្ជាក់ថា ជាមួយសេវាកម្មផ្ទេរប្រាក់របស់ទ្រូម៉ាន់នី អតិថិជនចំណាយត្រឹមតែ២.៥០០រៀលប៉ុណ្ណោះក្នុងការផ្ទេរម្ដង ខណៈពេលដែលកាលពីមុនធ្លាប់តែចំណាយច្រើនក្នុងការផ្ទេរប្រាក់ក្នុងមួយប្រតិបត្តិការ ។ ដូចនេះ សេវាកម្មផ្ទេរប្រាក់របស់ទ្រូម៉ាន់នី គឺអាចជួយសន្សំសំចៃប្រាក់ពីការផ្ទេរប្រាក់បានច្រើនដល់ប្រជាជនកម្ពុជា ៕
ចែករំលែកព័តមាននេះ