ខេត្តព្រះសីហនុ ៖ ដើម្បីឲ្យការរៀបចំពិធីបុណ្យសមុទ្រទទួលបានជោគជ័យបន្តទៀតនោះ នាព្រឹកថ្ងៃទី២៩ សីហា នៅសាលាខេត្ត លោក ថោង ខុន រដ្ឋមន្ត្រីក្រសួងទេសចរណ៍ និងលោកយន្ត មីន អភិបាលខេត្ត ដោយមានការចូលរួមពីតំណាងទីស្តីការ គណៈរដ្ឋមន្ត្រី ក្រសួងទេសចរណ៍ ក្រសួងវប្បធម៌ និងវិចិត្រសិល្បៈ អាជ្ញាធរខេត្ត មន្ទីរជំនាញ សមត្ថកិច្ចពាក់ព័ន្ធជុំវិញខេត្ត និងតំណាងផែ្នកឯកជនពាក់ព័ន្ធវិស័យទេសចរណ៍ បានជួបប្រជុំគ្នា ដើម្បីពិភាក្សាអំពីការត្រៀមរៀបចំពិធីបុណ្យសមុទ្រ ។
មន្ត្រីក្រសួងទេសចរណ៍បានឲ្យដឹងថា ពិធីបុណ្យសមុទ្រឆ្នាំ២០១៦នេះ គ្រោងរៀបចំពីថ្ងៃទី៣០-៣១ ធ្នូ ឆ្នាំ២០១៦ និងថ្ងៃទី០១ ខែមករា ឆ្នាំ២០១៧ នៅខេត្តព្រះសីហនុ ហើយនេះគឺជាលើកទី០២ផងដែរ សម្រាប់ខេត្តព្រះសីហនុ ដែលទទួលធ្វើជាម្ចាស់ផ្ទះរៀប ចំពិធីបុណ្យសមុទ្រ បន្ទាប់ពីការរៀបចំលើកទី១ប្រកបដោយជោគជ័យកាលពីឆ្នាំ២០១១ កន្លងទៅ ។
មន្ត្រីក្រសួងទេសចរណ៍បញ្ជាក់ថា កិច្ចប្រជុំបានធ្វើការពិភាក្សា និងដាក់ចេញនូវផែនការសកម្មភាពសំខាន់ៗឆ្ពោះទៅការរៀបចំពិធី បុណ្យ សមុទ្រឆ្នាំ២០១៦ខាងមុខ មានដូចជា ៖
ទី១-ការរៀបចំអភិវឌ្ឍន៍ហេដ្ឋារចនាសម្ព័ន្ធ ផ្លូវថ្មីៗ និងប្រព័ន្ធទឹក ភ្លើងនៅទីក្រុង
ទី២-ការរៀបចំកែសម្រួលរចនាសម្ព័ន្ធ និងអភិវឌ្ឍន៍ឆ្នេរខ្សាច់កម្សាន្តថ្មី
ទី៣-ការពង្រឹងសន្តិសុខ សណ្តាប់ធ្នាប់ អនាម័យទីក្រុង និងតំបន់ឆ្នេរកម្សាន្ត
ទី៤-ការពង្រឹងគុណភាពសេវាកម្មទេសចរណ៍ ផលិតផលទេសចរណ៍ បដិសណ្ឋារកិច្ចល្អ និងចលនាប្រជាជនរៀបចំផ្ទះស្នាក់សម្រាប់ទេសចរ
ទី៥-ការរៀបចំព្រឹត្តិការណ៍កីឡាទេសចរណ៍តំបន់ឆ្នេរខ្សាច់ និងកីឡាលើទឹក
ទី៦-ការរៀបចំព្រឹត្តិការណ៍ពិព័រណ៍ផលិតផលទេសចរណ៍ថ្មីៗ ពិព័រណ៍ពាណិជ្ជកម្ម ផលិតផលក្នុងស្រុក និងពិព័រណ៍ម្ហូបអាហារ
ទី៧-ការរៀបចំកម្មវិធីក្នុងព្រឹត្តិការណ៍បុណ្យសមុទ្រឲ្យល្អ មានលក្ខណៈពិសេស និងមានភាពទាក់ទាញជាងឆ្នាំកន្លងមក
ទី៨-ការរៀបចំសកម្មភាពបុរេព្រឹត្តិការណ៍ ឆ្ពោះទៅរកបុណ្យសមុទ្រដូចជា ចលនាប្រឡងប្រណាំងទីក្រុងស្អាត ឆ្នេរស្អាត (កែលំអសណ្តាប់ធ្នាប់ សោភ័ណភាពទីក្រុង សណ្តាប់ធ្នាប់ សោភ័ណភាពឆ្នេរខ្សាច់កម្សាន្ត…) ការពង្រឹង និងបង្កើនគុណភាពសេវាកម្មទេសចរណ៍ ការរៀបចំសិក្ខាសាលា វេទិកាស្តីពីការគ្រប់គ្រង និងអភិវឌ្ឍន៍តំបន់ឆ្នេរសមុទ្រ ការរៀបចំព្រឹត្តិការណ៍ទេសចរកីឡានៅតាមតំបន់ទេសចរណ៍នានា
ទី៩-ការរៀបចំជំរុញការផ្សព្វផ្សាយព្រឹត្តិការណ៍បុណ្យសមុទ្រចាប់ពីឥឡូវនេះតទៅ។
លោករដ្ឋមន្ត្រី ថោង ខុន បានណែនាំឲ្យគណៈអភិបាលខេត្ត សមត្ថកិច្ច និងមន្ទីរជំនាញពាក់ព័ន្ធជុំវិញខេត្ត ខិតខំរៀបចំគ្រប់គ្រងនិងអភិវឌ្ឍតំបន់ឆ្នេរសមុទ្រឲ្យបានល្អ ស័ក្តិសមជាសមាជិកក្លិបឆ្នេរសមុទ្រដែលស្អាតបំផុតលើសកលលោក និងការប្រសិទ្ធនាមឆ្នេរសមុទ្រកម្ពុជា តារារះនាទិសនីរតី ធ្វើយ៉ាងណាឲ្យព្រឹត្តិការណ៍បុណ្យសមុទ្រក្លាយជាព្រឹត្តិការណ៍របស់ប្រជាពលរដ្ឋគ្រប់រូប និងគ្រប់គ្រួសារ ។ លោករដ្ឋមន្ត្រីបន្តថា ទាំងអស់គ្នាត្រូវចាត់ទុកបុណ្យសមុទ្រជាឱកាសមួយដ៏ល្អដើម្បីជំរុញការអភិវឌ្ឍទីក្រុងព្រះ សី ហនុ ជាគោលដៅទេសចរណ៍មួយដ៏ទាក់ទាញ ៕
ចែករំលែកព័តមាននេះ