ខេត្តកំពង់ឆ្នាំង ៖ ក្មួយៗកុមារកំព្រានៅមណ្ឌលកុមារកំព្រា មានក្តីសប្បាយរីករាយយ៉ាងខ្លាំង ពេលបានទទួលអាហារឆ្ងាញ់មួយពេល ដែលជាការចំណាយថវិកា១លានរៀលរបស់ លោកជំទាវ វណ្ណ លុយ សមាជិកាកិត្តិយស កាកបាទក្រហមកម្ពុជា និងថវិកា២០ម៉ឺនរៀល របស់លោកជំទាវ កែ ចន្ទ័មុនី តំណាងរាស្ត្រមណ្ឌលកំពង់ឆ្នាំង ។ ពិធីរៀបចំអាហារឆ្ងាញ់មួយពេលដល់កុមារកំព្រានេះ បានធ្វើឡើងកាលពីថ្ងៃសៅរ៍ចុងសប្តាហ៍កន្លងទៅនេះ ។
តំណាងកុមារកំព្រាម្នាក់ក្នុងចំណោមកុមារកំព្រា៤៩នាក់ ដែលកំពុងរស់នៅក្នុងមណ្ឌលកុមារកំព្រាខេត្តកំពង់ឆ្នាំង បានថ្លែង អំណរគុណ លោកជំទាវ លោកស្រីទាំងអស់ ដែលបានផ្តល់ថវិកាសម្រាប់ធ្វើម្ហូបឆ្ងាញ់មួយពេលដល់ពួកគេជាកុមារកំព្រាក្នុងមណ្ឌល និងបានជូនពរ ដល់លោកជំទាវទាំងអស់ ដែលជាសមាជិកាកាកបាទក្រហមកម្ពុជា ក៏ដូចជាតំណាងឱ្យសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន សូមជួបតែពុទ្ធពរទាំង៤ប្រការ គឺ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ ។ម្យ៉ាងវិញ ទៀត ដើម្បីជាកិច្ចតបស្នងដល់លោកជំទាវ ពួកគេជាកុមារកំព្រានឹងខិតខំរៀនសូត្រឱ្យបានពូកែ និងស្តាប់ការអប់រំរបស់លោកគ្រូ អ្នកគ្រូក្នុងមណ្ឌល ។
សូមបញ្ជាក់ថា បច្ចុប្បន្ននេះកុមារកំព្រាកំពុងរស់នៅក្នុងមណ្ឌលកុមារកំព្រាខេត្តកំពង់ឆ្នាំងមានចំនួន៤៩នាក់ ។ កុមារទាំងនោះ បានទទួលការស្នាក់នៅ និងទទួលរបបអាហារប្រចាំថ្ងៃពីរាជរដ្ឋាភិបាល ។ ចំណែកការរៀនសូត្រ គឺបានទៅរៀននៅតាមសាលារៀនចំណេះទូទៅនានានៅក្នុងក្រុងកំពង់ឆ្នាំង ។ កុមារកំព្រាទាំងនោះ ត្រូវបានប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត ទទួលយកពីភូមិ-ឃុំនានាក្នុងខេត្ត ដែលខ្លះឪពុកម្តាយលែងលះគ្នា ឪពុកបែកទៅមានប្រពន្ធចុងទុកកូនឱ្យនៅជាមួយម្តាយ ហើយម្តាយចេញទៅរកស៊ីចោលរាប់ឆ្នាំ បន្តទុកឱ្យរស់នៅជាមួយជីដូនជាដើម ។
លោកជំទាវ វណ្ណ លុយ សមាជិកាកិត្តិយស កាកបាទក្រហមកម្ពុជា និងលោកជំទាវ កែ ច័ន្ទមុនី តំណាងរាស្ត្រមណ្ឌលកំពង់ឆ្នាំង បានផ្តាំផ្ញើដល់ក្មួយៗកុមារកំព្រាទាំងអស់ ត្រូវយកចិត្តទុកដាក់ស្តាប់លោកគ្រូអ្នកគ្រូនៅក្នុងមណ្ឌលដែលអប់រំក្មួយៗឱ្យដើរផ្លូវល្អ ចេះពីរបៀបរស់នៅក្នុងមណ្ឌល ចេះពីសុជីវធម៌ សីលធម៌ និងអនាម័យខ្លួនប្រាណជាដើម ។ ចំណែកនៅសាលារៀន ត្រូវខិតខំរៀនសូត្រ ស្តាប់អ្នកគ្រូលោកគ្រូ ដែលខិតខំបង្ហាត់បង្រៀន និងត្រូវតាំងចិត្តខិតខំរៀនសូត្រឱ្យបានពូកែ បានពិន្ទុល្អប្រចាំខែ ប្រចាំ ត្រីមាស ។ ជាចុងក្រោយ លោកជំទាវទាំងពីរបានផ្តាំថា បើក្មួយៗខំរៀន បានពូកែ លោកជំទាវនឹងលើកទឹកចិត្តផ្តល់ប្រាក់ឧបត្ថម្ភធ្វើម្ហូបឆ្ងាញ់ដូចថ្ងៃនេះជូនក្មួយៗបន្តទៀត ។
សូមបញ្ជាក់ថា ម្ហូបឆ្ងាញ់ដែលក្មួយៗបានទទួលទានមួយពេលក្នុងថ្ងៃនោះមាន មាន់បំពង ត្រីឆ្តោដុត ឡុកឡាក់សាច់គោ និងសម្ល ម្ជូរគ្រឿងឆ្អឹងជំនីរជ្រូក ៕
ចែករំលែកព័តមាននេះ