យោងតាម YONHAP ថា សមាជិកសភាមួយក្រុមរបស់គណបក្ស SAENURI ជាគណបក្សកាន់អំណាចនៅកូរ៉េខាងត្បូងក្នុងវេទិកានុយក្លេអ៊ែរមួយបានលើកឡើងកាលពីថ្ងៃទី២៨ សីហា ថា កងម៉ារីនកូរ៉េខាងត្បូងត្រូវមាន
យោងតាម YONHAP ថា សមាជិកសភាមួយក្រុមរបស់គណបក្ស SAENURI ជាគណបក្សកាន់អំណាចនៅកូរ៉េខាងត្បូងក្នុងវេទិកានុយក្លេអ៊ែរមួយបានលើកឡើងកាលពីថ្ងៃទី២៨ សីហា ថា កងម៉ារីនកូរ៉េខាងត្បូងត្រូវមាននាវាមុជទឹកនុយក្លេអ៊ែរ ដើម្បីទប់ទល់នឹងការគំរាមកំហែងដោយមីស៊ីលសមុទ្រ-ដីបាលីស្ទិកយុទ្ធសាស្ត្រ MSBS របស់ក្រុងព្យុងយ៉ាង ព្រមទាំងដើម្បីប៉ុនប៉ងស្វែងរកដំណោះស្រាយមួយចំពោះបញ្ហាមីស៊ីលកូរ៉េខាងជើង ។
សមាជិកសភាទាំងនេះក្នុងសេចក្តីប្រកាសព័ត៌មានមួយស្នើថា កងទ័ពរបស់យើងត្រូវដាក់ពង្រាយជាបន្ទាន់បណ្តានាវាមុជទឹកនុយក្លេអ៊ែរដែលមានសមត្ថភាពតាមដាន ពួនស្ទាក់ និងវាយប្រហារដើម្បីរារាំងទាំងស្រុងការបង្កហេតុដោយមីស៊ីល MSBS របស់កូរ៉េខាងជើង ។
ក្រុមសមាជិកសភានេះដែលមានគ្នា២២នាក់ ដឹកនាំដោយលោក WON YOO CHUL ជាប់ឆ្នោត៥ដងហើយ ។ លោក WON ថ្លែងថា កូរ៉េខាងត្បូងហ៊ុមព័ទ្ធដោយសមុទ្រ និងមានឆ្នេរសមុទ្រ៣ រងការគំរាមកំហែងដោយមីស៊ីល MSBS របស់កូរ៉េខាងជើង ។ ការដាក់ពង្រាយនាវាមុជទឹកនុយក្លេអ៊ែរគឺចាំបាច់ដើម្បីទប់ទល់នឹងការបង្កហេតុទាំងនោះ ។
វេទិកានេះក៏បានថ្កោលទោសយ៉ាងខ្លាំងផងដែរចំពោះការបាញ់មីស៊ីល MSBS របស់កូរ៉េខាងជើងដោយនិយាយថា នេះជាអំពើបង្កហេតុមួយពុំអាចអត់ឱនឱ្យបានដែលរំលោភបំពានលើបណ្តាដំណោះស្រាយរបស់ក្រុមប្រឹក្សាសន្តិសុខ អ.ស.ប ហើយអបអរសាទរការអនុម័តសេចក្តីថ្លែងការណ៍មួយរបស់ក្រុមប្រឹក្សាសន្តិសុខដែលបរិហារកូរ៉េខាង ជើង។
ក្រុមសមាជិកសភានេះក៏ស្នើផងដែរដល់សភាជាតិឱ្យអនុម័តដោយឆាប់រហ័សបំផុតនូវសេចក្តីសម្រេចចិត្តមួយ ដែលថ្កោលទោសការបង្កហេតុដោយមីស៊ីល MSBS របស់កូរ៉េខាងជើង ។ ក្រុមនេះបន្តថា ក្រុងព្យុងយ៉ាងត្រូវបញ្ឈប់ការបង្កហេតុខាងយោធានានាដែលគំរាមកំហែងពុំត្រឹមតែអាស៊ីភាគឦសានប៉ុណ្ណោះទេ តែដល់ពិភពលោកទាំងមូលទៀតផង ។ កូរ៉េខាងជើងត្រូវប្រកាន់យកមាគ៌ាសន្តិភាព និងភាពរុងរឿង ហើយការសាកល្បងនុយក្លេអ៊ែរ និងការបាញ់មីស៊ីលនានានឹងគ្រាន់តែជាការបំផ្លាញខ្លួនឯងប៉ុណ្ណោះ។
យោងតាមសមាជិកសភាទាំងនេះថា មីស៊ីល MSBS កូរ៉េខាងជើងអាចមានគ្រោះថ្នាក់ខ្លាំងជាងមីស៊ីលដី-ដី ព្រោះវាបាញ់ចេញពីនាវាមុជទឹកដែលពិបាកកំណត់ដឹង ។
បច្ចុប្បន្នកងម៉ារីនកូរ៉េខាងត្បូងមាននាវាមុជទឹក១៧គ្រឿង តែពុំមាននាវាមុជទឹកនុយក្លេអ៊ែរមួយគ្រឿងណាឡើយ ៕
ចែករំលែកព័តមាននេះ