រាជធានីភ្នំពេញ ៖ ប្រធានគណបក្សសង្គ្រោះជាតិលោក សម រង្ស៊ី ដែលកំពុងនិរទេសខ្លួននៅក្រៅប្រទេស បានហៅប្រធានគណបក្សហ្វ៊ុនស៊ិនប៉ិច ថាលក់ឧត្តមគតិខ្លួនដែលប្រជារាស្ត្រខំផ្តល់សេចក្តីទុកចិត្ត ។
យោងតាមវីដេអូឃ្លីបដែលបង្ហោះលើបណ្តាញសង្គមហ្វេសប៊ុកឈ្មោះ MJ Cnrp France លោក សម រង្ស៊ី បានលើកឡើងក្នុងពិធីជួបសំណេះសំណាលជាមួយសកម្មជននៅប្រទេសបារាំងថា គណបក្សសង្គ្រោះជាតិមានគោលនយោបាយ និងបំណងច្បាស់លាស់ក្នុងការសង្គ្រោះជាតិ ពិសេសនោះបុព្វហេតុច្បាស់លាស់ទើបមានការគាំទ្រពីប្រជារាស្ត្រ ។
លោកបញ្ជាក់ថា «យើងត្រូវរក្សាភាពស្មោះត្រង់ជាមួយប្រជារាស្ត្រ និងឧត្តមគតិខ្លួន ។ ជាងនេះទៀត យើងត្រូវមានអ្នកដឹកនាំត្រឹមត្រូវមិនបែកខ្ចាយ ដូចជាអ្នកដឹកនាំមួយចំនួននោះទេ។ ដូចជាសម័យគណបក្សហ្វ៊ុនស៊ិនប៉ិចនោះ យើងមានការសោកស្តាយ ព្រោះអ្នកដឹកនាំលះបង់ឧត្តមគិតដើមរបស់ខ្លួន» ។
ប្រធានគណបក្សសង្គ្រោះជាតិបានហៅប្រធានគណបក្សហ្វ៊ុនស៊ិនប៉ិចថា កាលទទួលបានការគាំទ្រពីប្រជាពលរដ្ឋហើយបែរជាមិនគោរពតាមឆន្ទៈរាស្ត្រ និងបែរជាក្បត់រាស្ត្រទៅវិញ។ ចំណែកគណបក្សសង្គ្រោះជាតិ មិនដួចជាគណបក្សហ្វ៊ុនស៊ិនប៉ិចនោះទេ ទោះបីជាគេធ្វើបាប និងបំបែកបំបាក់ តែមេដឹកនាំគណបក្សសង្គ្រោះជាតិមិនបែកបាក់នោះទេ ។
លោក សម រង្ស៊ី បានលើកឡើងទៀតថា គណបក្សកាន់អំណាចបានខិតខំបំបែកបំបាក់គណបក្សសង្គ្រោះជាតិ និងបានជួយសម្រួលដល់គណបក្សតូចៗដែលទើបបង្កើត ។ ផ្ទុយទៅវិញគណបក្សសង្គ្រោះជាតិមិនខ្លាចទេ ព្រោះថាបរិបទនយោបាយបច្ចុប្បន្ននេះមិនដូចលើកមុននោះទេ ។
លោក សម រង្ស៊ី លើកឡើងទៀតថា គណបក្សកាន់អំណាចបាននិងកំពុងធ្វើបាបគណបក្សប្រឆាំង ចំណែកគណបក្សផ្សេងៗទៀតគណបក្សកាន់អំណាចមិនធ្វើទេ ។ ជាងនេះទៀត គណបក្សនោះថែមទាំងបានជួយផ្តល់និងផ្គត់ផ្គង់ដល់គណបក្សតូចៗដែលទើបបង្កើតថ្មីថែមទៀត សម្រាប់វាយប្រហារមកលើគណបក្សប្រឆាំង ។
ទោះជាយ៉ាងណាក្តី លោក សម រង្ស៊ី បានសម្តែងសុទិដ្ឋិនិយមថា មានតែគណបក្សសង្គ្រោះជាតិប៉ុណ្ណោះដែលនាំមកនូវការផ្លាស់ប្តូរប្រទេសជាតិ ។ ប៉ុន្តែត្រង់ចំណុចនេះមន្ត្រីជាន់ខ្ពស់គណបក្សប្រជាជនកម្ពុជាធ្លាប់លើកឡើងថាជាក្តីសុបិន ព្រោះថាការបោះឆ្នោតមិនទាន់មកដល់ ដូច្នេះមិនទាន់អាចទស្សន៍ទាយជាមុនបានទេ ។
ចំពោះការលើកឡើងរបស់ប្រធានគណបក្សសង្គ្រោះជាតិនេះ គេមិនទាន់ឃើញមានប្រតិកម្មយ៉ាងណាពីថ្នាក់ដឹកនាំគណបក្សហ្វ៊ុនស៊ិនប៉ិចនៅឡើយទេ ។ មានការកត់សម្គាល់ថា ប្រធានគណបក្សប្រឆាំងតែងតែរិះគន់គណបក្សហ្វ៊ុនស៊ិនប៉ិចជារឿយៗ ខណៈគណបក្សហ្វ៊ុនស៊ិនប៉ិចធ្លាប់បានដឹកនាំប្រទេស ។ ពិសេសទៀតគណបក្សហ្វ៊ុនស៊ិនប៉ិចធ្លាប់បណ្តេញលោកសម រង្ស៊ី ចេញពីបក្សទៀតផងកាលគ្រាដំបូង ៕
ចែករំលែកព័តមាននេះ